Read dyu Mariki ka kitabu 14 Bible Online

Mariki ka kitabu 14 - dyu bible

Mariki ka kitabu 14

¹ A tun tora tile fila *Hɔrɔnya ɲanagwɛ ni *Buru funubali ɲanagwɛ ka se. O y'a sɔrɔ sarakalasebagaw kuntigiw ni sariya karamɔgɔw tun bena se ka Yezu minɛ dogo la cogo min na k'a faga, u tun b'o cogo le ɲinina.

²U tun b'a fɔra k'u man kan k'a minɛ ɲanagwɛ tuma na, ko n'o tɛ, mɔgɔw bena muruti.

³ Ka Yezu to dumuni na farisogobanatigi Simɔn ka soo Betani, muso dɔ donna ni daga cɛɲumanin dɔ ye. Daga nin tun dilannin be ni kabakuru dɔ ye min be wele alabatiri. A fanin tun be tulu kasadiman dɔ la min sɔngɔ ka gwɛlɛ kosɔbɛ. A y'a daa yɛlɛ ka tulu nin bɔn Yezu kuun na.

⁴Mɔgɔ minw tun be yen, olu dɔw dimina k'a fɔ ɲɔgɔn ye ko: «Mun na a ye tulu kasadiman nin cɛn ten?

⁵A tun be se ka feere ka warigwɛ deen kɛmɛ saba ni kɔ sɔrɔ k'o di fantanw ma.» U dimina muso nin kɔrɔ kosɔbɛ k'a kɔrɔfɔ.

⁶Nga Yezu y'a fɔ u ye ko: «Aw k'a to yen. Mun na aw b'a dusu kasi? A ye koɲuman le kɛ ne ye ten.

⁷ Aw bena to ni fantanw ye tuma bɛɛ. N'aw b'a fɛ ka koɲuman kɛ u ye tuma o tuma, aw be se k'a kɛ u ye. Nga ne tena to n'aw ye tuma bɛɛ.

⁸A y'a seko le kɛ. A kɔnna ka ne fari kasa diya ni tulu nin ye ne suu donko kama.

⁹Tiɲɛ na, ne b'a fɔ aw ye ko kibaru diman mana fɔ diɲɛ yɔrɔ o yɔrɔ, muso nin ye min kɛ, a tɔgɔ bena fɔ mɔgɔw hakili be to a la.»

¹⁰Zuda Isikariyɔti, n'o tun ye kalanden tan ni fila dɔ ye, o tagar'a fɔ sarakalasebagaw kuntigiw ye ko ale b'a fɛ ka Yezu don u bolo.

¹¹A ka kuma diyara u ye kosɔbɛ. U bɛnn'a la k'u bena wari hakɛ dɔ d'a ma. Zuda bena cogoɲuman min sɔrɔ ka Yezu don u bolo, a y'a daminɛ k'o ɲini.

¹²*Buru funubali ɲanagwɛ loon fɔlɔ, sagaden tun be faga loon min na ka kɛ *Hɔrɔnya ɲanagwɛ saraka ye, Yezu ka kalandenw y'a ɲininga ko: «I b'a fɛ an ka taga Hɔrɔnya ɲanagwɛ dumuni labɛn i ye yɔrɔ jumɛn?»

¹³O la, Yezu y'a ka kalandenw fila ci. A y'a fɔ u ye ko: «Aw ye taga dugu kɔnɔ. Aw ni cɛɛ dɔ bena ɲɔgɔn kunbɛn, duun fanin be jii la a kuun na, aw ye tugu a kɔ.

¹⁴O cɛɛ bena taga don luu min kɔnɔ, aw k'a fɔ o lutigi ye ko karamɔgɔ ko a n'a ka kalandenw bena Hɔrɔnya ɲanagwɛ dumuni kɛ boon min kɔnɔ, k'o be min.

¹⁵A bena bonba dɔ yira aw la sangaso kɔnɔ min labɛnnin lo. An mako bena se fɛɛn minw ma, o bɛɛ b'a kɔnɔ. Aw ka Hɔrɔnya ɲanagwɛ dumuni labɛn an ye o yɔrɔ la.»

¹⁶O kalanden nunu tagara don dugu kɔnɔ. Yezu tun y'a fɔ u ye cogo min na, a kɛra ten fana. U ye Hɔrɔnya ɲanagwɛ dumuni labɛn yen.

¹⁷Sufɛ, Yezu n'a ka kalanden tan ni fila tagara don o boon kɔnɔ.

¹⁸ K'u siginin to dumuni na, Yezu y'a fɔ u ye ko: «Tiɲɛ na, ne b'a fɔ aw ye ko aw minw be dumuni kɛra ni ne ye, aw dɔ bena ne don mɔgɔjuguw bolo.»

¹⁹Kalandenw dusu kasira. U y'a ɲininga kelen kelen ko: «Ne lo wa?»

²⁰A y'u jaabi ko: «Aw mɔgɔ tan ni fila nunu dɔ lo. A tigi b'a bolo donna minan kelen kɔnɔ ni ne ye.

²¹Mɔgɔ Dencɛ bena sa i ko a fɔra Ala ka kuma na a ka koo la cogo min na, nga min ben'a don mɔgɔw bolo, bɔnɛ bena o tigi sɔrɔ. N'o tigi yɛrɛ tun ma wolo, o tun ka fisa a ma.»

²²Ka Yezu n'a ka kalandenw to dumuni na, a ye buru ta ka barika la Ala ye. O kɔ, a y'a karikari k'a di a ka kalandenw ma, k'a fɔ u ye ko: «Aw k'a minɛ, nin ye ne fari ye.»

²³O kɔ, a ye duvɛn ta ka barika la Ala ye, k'a d'u ma. U bɛɛ ye dɔ min.

²⁴ A y'a fɔ u ye ko: «Nin ye ne joli ye, joli min be Ala ka layidu dafa, joli min bena bɔn mɔgɔ bɛɛ kosɔn.

²⁵Tiɲɛ na, ne b'a fɔ aw ye ko ne tena duvɛn min tugu, fɔɔ loon min na ne bena duvɛnkɛnɛ min Ala ka masaya la.»

²⁶U ye dɔnkiliw la Ala ye ka ban tuma min na, u bɔra ka taga Olivuyirikulu kan.

²⁷ Yezu y'a fɔ a ka kalandenw ye ko: «Aw bɛɛ bena boli ka ne to, bari a fɔra Ala ka kuma na ko: ‹Ne bena sagadɛndɛbaga bugɔ, sagaw be jɛnsɛn.› »

²⁸ Yezu tagara ɲa ni kuma ye k'a fɔ ko: «Ni ne kununna n sanin kɔ tuma min na, ne bena bila aw ɲa Galile mara la.»

²⁹Piyɛri y'a fɔ a ye ko: «Hali ni bɛɛ bolila, ne kɔni tena boli fewu.»

³⁰Yezu y'a fɔ a ye ko: «Tiɲɛ na, ne b'a fɔ i ye ko bii suu nin na yɛrɛ, sanni dondo ka kasi siɲɛ fila, i ben'a fɔ siɲɛ saba ko i te ne lɔn.»

³¹Nga, Piyɛri y'a daa gwɛlɛya k'a fɔ Yezu ye ko: «Hali ni ne ka kan ka sa n'i ye, ne kɔni ten'a fɔ ko n t'i lɔn fewu.» Tɔw bɛɛ fana y'a fɔ ten.

³²Yezu n'a ka kalandenw tagara dugu kɔfɛ yɔrɔ dɔ la min tɔgɔ ko Zɛtisemane. A y'a fɔ a ka kalandenw ye ko: «Aw ye sigi yan, ne be taga Ala daali.»

³³A tagara ɲafɛ dɔɔni ni Piyɛri ni Zaki ani Zan ye. A hakili daminɛna ka ɲagami. A kɔnɔ gwanna.

³⁴A y'a fɔ u ye ko: «Dusukasi bena n faga. Aw ye to yan yɔrɔ la, aw kana sinɔgɔ.»

³⁵A tagara ɲafɛ dɔɔni k'a kunbiri gwan ka Ala daali k'o waati tɔɔrɔ kana ale sɔrɔ n'a ma kɛ wajibi ye.

³⁶A ko: «Ne Faa, i be se fɛɛn bɛɛ la. Ne kisi tɔɔrɔ nin ma. Nga ne sago kana kɛ, fɔɔ e sago.»

³⁷O kɔ, a segira ka na kalanden saba nunu fɛ ka u sɔrɔ sinɔgɔ la. A y'a fɔ Piyɛri ye ko: «Simɔn, i be sinɔgɔ wa? I ma se ka to ɲaa na hali waati dɔɔni yɛrɛ wa?

³⁸Aw ye to ɲaa na ka Ala daali waasa aw kana don kɔrɔbɔli la. Koɲumankɛ miiriya be mɔgɔw kɔnɔ, nga a kɛ see t'u ye.»

³⁹A bɔra u kɔrɔ tugu ka taga Ala daali fɔlɔta cogo la.

⁴⁰A kɔsegira tugu ka n'a sɔrɔ u be sinɔgɔra, bari sinɔgɔ tun b'u la kosɔbɛ. U kununna, u m'a lɔn u bena kuma min fɔ a ye.

⁴¹A siɲɛ sabanan, a segira u fɛ tuma min na, a y'a fɔ u ye ko: «Aw be sinɔgɔra ka lafiɲɛ halibi wa? A banna. Waati sera. U bena Mɔgɔ Dencɛ don hakɛkɛlaw bolo.

⁴²Aw ye wili an ka taga. Min be ne don u bolo, ale natɔ filɛ.»

⁴³Ka Yezu to kuma na, Zuda min tun ye kalanden tan ni fila nunu dɔ ye, ale sera o yɔrɔnin bɛɛ ni jama ye. Murujanjan ni berew tun b'u bolo. Sarakalasebagaw kuntigiw ni sariya karamɔgɔw ani cɛkɔrɔbaw le tun y'u ci.

⁴⁴Yezu janfabaga Zuda tun y'a fɔ jama ye ko: «Ne bena cɛɛ min fo ka n bolo meleke a kaan na, o le ye Yezu ye. Aw k'a minɛ ka taga n'a ye. Aw taatɔ, aw b'a kɔlɔsi ka ɲa.»

⁴⁵Zuda sera dɔrɔn, a sinna Yezu ma k'a fɔ a ye ko: «Karamɔgɔ!» O kɔ, a y'a bolo meleke Yezu kaan na.

⁴⁶O tuma na, mɔgɔ nunu ye Yezu minɛ.

⁴⁷Yezu ka kalanden dɔ y'a ka murujanjan bɔ ka sarakalasebagaw kuntigiba ka baaraden tulo tigɛ.

⁴⁸Yezu ye kuma ta k'a fɔ jama ye ko: «Aw nana ni murujan ni berew ye ka ne minɛ, i n'a fɔ ne ye benkannikɛla ye.

⁴⁹ Ne tun b'aw cɛma loon o loon Alabatosoba kɔnɔ ka mɔgɔw kalan, aw ma ne minɛ. Nga a kɛra ten janko min fɔra ne ka koo la Ala ka kuma na, o ka dafa.»

⁵⁰Kalandenw bɛɛ bolila k'a to.

⁵¹Kanbelen dɔ tun be Yezu nɔɔ fɛ, a tun ye birifani dɔrɔn meleke a yɛrɛ la. Mɔgɔ dɔw bɔra jama cɛma k'a minɛ.

⁵²Nga, a y'a yɛrɛ fosi ka birifani to u bolo ka boli ka tunu n'a farilakolon ye.

⁵³Mɔgɔ minw tun ye Yezu minɛ, u tagara n'a ye sarakalasebagaw kuntigiba ka soo. Sarakalasebagaw kuntigiw ni cɛkɔrɔbaw ani sariya karamɔgɔw bɛɛ tagara lajɛn yen.

⁵⁴Piyɛri tun tugura a kɔ ka furancɛba to u ni ɲɔgɔn cɛ, fɔɔ ka taga don sarakalasebagaw kuntigiba ka luu kɔnɔ. A sigira ni yɔrɔ kɔlɔsibagaw ye tasuma gɛrɛfɛ k'a fari ja.

⁵⁵O y'a sɔrɔ, sarakalasebagaw kuntigiw ni zuwifuw ka kititigɛlaw bɛɛ tun be seereya ɲinina Yezu kama janko ka se k'a faga. Nga u ma foyi sɔrɔ.

⁵⁶Mɔgɔ caaman ye galon tigɛ ka la a kan, nga, u kaan ma kɛ kelen ye.

⁵⁷Dɔw wilila ka galon tigɛ ka la a kan ko:

⁵⁸ «An y'a mɛn a daa la ko mɔgɔw ye nin Alabatosoba min lɔ, ko ale bena o ci ka dɔ wɛrɛ lɔ tile saba kɔnɔ, ko mɔgɔw tena o lɔ.»

⁵⁹Nga, hali o kuma nin faan fɛ, u kaan ma kɛ kelen ye.

⁶⁰O tuma na, sarakalasebagaw kuntigiba wilila ka taga lɔ jama cɛma ka Yezu ɲininga ko: «Mɔgɔ nunu be kuma min fɔra i ka koo la, i te foyi fɔ o la wa?»

⁶¹Nga Yezu jera, a ma foyi fɔ. Sarakalasebagaw kuntigiba y'a ɲininga tugu ko: «Ele lo ye Ala ka Mɔgɔ wolomanin nin ye wa, Nɔɔrɔtigi Ala Dencɛ?»

⁶² Yezu y'a jaabi ko: «Ɔnhɔn. Ne lo. Aw bena Mɔgɔ Dencɛ siginin ye Setigi Ala kinibolo fɛ. O kɔ, aw ben'a natɔ ye sankabaw cɛma.»

⁶³Sarakalasebagaw kuntigiba dimina fɔɔ a y'a kannadeleke faran k'a fɔ ko: «An mako te mɔgɔ la tugu k'a jalaki.

⁶⁴ Aw ye Ala tɔgɔ cɛnkuma mɛn a daa la kɛ! Aw be mun miiri?» U bɛɛ y'a fɔ ko a ka kan ka faga.

⁶⁵Dɔw y'a daminɛ k'u daji tu Yezu kan. U y'a ɲaa siri ka sɔrɔ k'a bugɔ ni bolokuruw ye k'a ɲininga ko: «Jɔn y'i bugɔ?» O kɔ, Alabatosoba kɔlɔsibagaw y'a minɛ k'a tulo fata, k'a fata.

⁶⁶Ka Piyɛri to luu kɔnɔ duguma, muso dɔ sera. O muso nin tun be baara kɛ sarakalasebagaw kuntigiba fɛ.

⁶⁷A ye Piyɛri ye n'a b'a fari jara tasuma na. A ye Piyɛri ɲada filɛ ka ɲa k'a fɔ a ye ko: «I fana tun be ni Nazarɛtika Yezu ye.»

⁶⁸Piyɛri y'a sɔsɔ. A ko: «N t'a lɔn. Ne m'i ka kuma faamu.» Piyɛri bɔra ka taga lɔ luu daa la. Dondo kasira.

⁶⁹O kɔ, o muso kelen nin ye Piyɛri ye tugu k'a fɔ o yɔrɔ mɔgɔw ye ko: «Cɛɛ nin ye u dɔ ye.»

⁷⁰Piyɛri y'a sɔsɔ tugu. Waati dɔɔni o kɔ, o yɔrɔ mɔgɔw y'a fɔ Piyɛri ye tugu ko: «Siga t'a la, i ye u dɔ ye, bari i fana ye Galileka ye.»

⁷¹O tuma na, Piyɛri kalila ko: «Ni ne ye galon tigɛ aw ye, Ala kana n to! Aw be kuma cɛɛ min koo la, ne t'o lɔn.»

⁷²O yɔrɔnin bɛɛ, dondo kasira a siɲɛ filanan. Yezu tun y'a fɔ Piyɛri ye ko: «Sanni dondo ka kasi siɲɛ fila, i ben'a fɔ siɲɛ saba ko i te ne lɔn.» Piyɛri hakili jigira o kuma na. A y'a daminɛ ka kasi.