Read dyu Mariki ka kitabu 15 Bible Online

Mariki ka kitabu 15 - dyu bible

Mariki ka kitabu 15

¹Sɔgɔma joona, sanni tile ka bɔ, sarakalasebagaw kuntigiw ni sariya karamɔgɔw ni cɛkɔrɔbaw, ani zuwifuw ka kititigɛlaw bɛɛ ye ɲɔgɔn ye Yezu ka koo la. U y'a siri ka taga don Pilati bolo.

²Pilati y'a ɲininga ko: «I ye zuwifuw ka masacɛ ye wa?» Yezu y'a jaabi ko: «I yɛrɛ y'a fɔ.»

³Sarakalasebagaw kuntigiw y'a jalaki kosɔbɛ.

⁴Pilati y'a ɲininga tugu ko: «I te foyi fɔ wa? U b'i jalakira koo minw bɛɛ la, i m'o mɛn wa?»

⁵Nga Yezu ma foyi fɔ tugu. O ye Pilati kabakoya.

⁶Saan o saan *Hɔrɔnya ɲanagwɛ tuma na, Pilati tun be kasoden dɔ bila ka kɛɲɛ ni jama ka laɲini ye.

⁷O y'a sɔrɔ cɛɛ dɔ tun be yen min tɔgɔ ko Barabasi. O tun be kaso la n'a murutiɲɔgɔnw ye o waati la, bari u tun ye mɔgɔ dɔ faga tuma min na u murutira Ɔrɔmu faamaw ma.

⁸Jama tagara Pilati fɛ k'a daali ko: «I be to ka koo min kɛ an ye saan o saan Hɔrɔnya ɲanagwɛ tuma na, o kɛ an ye.»

⁹Pilati y'u ɲininga ko: «Aw b'a fɛ ne ka zuwifuw ka masacɛ le bila wa?»

¹⁰Pilati tun y'a lɔn ko ɲagoya le y'a to sarakalasebagaw kuntigiw ye Yezu don ale bolo.

¹¹Nga sarakalasebagaw kuntigiw ye jama kɔnɔnasu k'u ka Pilati daali ko a ka Barabasi bila.

¹²Pilati y'u ɲininga tugu ko: «O tuma na, aw be min wele zuwifuw ka masacɛ, aw b'a fɛ ne ka mun kɛ o la?»

¹³U pɛrɛnna ko: «A gwengwen lɔgɔ kan!»

¹⁴Pilati y'u ɲininga tugu ko: «Mun na? A ye kojugu jumɛn kɛ?» U pɛrɛnna ka tɛmɛ fɔlɔta kan ko: «A gwengwen lɔgɔ kan!»

¹⁵Pilati tun b'a fɛ ka jama sago kɛ minkɛ, a ye Barabasi bila. A ye mɔgɔ bila ka Yezu bugɔ ni golokami ye, ka sɔrɔ k'a don sɔlidasiw bolo k'u ka taga gwengwen lɔgɔ kan.

¹⁶Sɔlidasiw tagara ni Yezu ye Zude mara kuntigi ka luu kɔnɔ. U ye sɔlidasi tɔw bɛɛ wele k'u lajɛn yen.

¹⁷U ye deleke wuleman don a kaan na, ka ŋɔni dan k'a la a kuun na i ko masafugulan.

¹⁸O kɔ, u tora k'a fɔ ko: «I dansɛ, zuwifuw ka masacɛ»,

¹⁹ka to k'a bugɔ a kuun na ni bere ye, k'u daji tu a kan, ani k'u kunbiri gwan a kɔrɔ i n'a fɔ u b'a boɲa.

²⁰U yɛlɛla a ma ka ban tuma min na, u ye deleke wuleman nin bɔ a kaan na, k'a yɛrɛ ka deleke ta k'a don a la. U bɔra ka taga n'a ye a gwengwenyɔrɔ la.

²¹ U taatɔ ni Yezu ye a gwengwenyɔrɔ la, u ye cɛɛ dɔ tɛmɛtɔ ye ka bɔ kongo la. Sirɛnika tun lo min tɔgɔ ko Simɔn. Alɛkisandiri ni Urufusi facɛ lo. Sɔlidasiw y'a karaba ka Yezu gwengwenlɔgɔ ta.

²²U tagara ni Yezu ye yɔrɔ dɔ la u be min wele u ka kaan na ko Gɔligota, o kɔrɔ ko kungolo yɔrɔ.

²³U ye fura dɔ ɲagami duvɛn na k'u b'a d'a ma a k'a min, nga a banna.

²⁴ O kɔ, u y'a gwengwen lɔgɔ kan. U ye kala la ka Yezu ka faniw tilan ɲɔgɔn cɛ. U ye kala la waasa k'a lɔn min ka kan ka min sɔrɔ.

²⁵U y'a gwengwen lɔgɔ kan tuma min na, o y'a sɔrɔ tilekun bɔra a be lɛrɛ saba bɔ.

²⁶U y'a gwengwen kuun min na, u y'o sɛbɛn walaka dɔ kan ko: «Zuwifuw ka masacɛ.»

²⁷U ye benkannikɛla fila gwengwen lɔgɔ dɔw kan Yezu gɛrɛfɛ. Kelen tun b'a kinibolo fɛ, kelen tun b'a numanbolo fɛ. [

²⁸ O cogo la, min sɛbɛnnin be Ala ka kuma na ko: «U y'a jati kojugukɛlaw dɔ ye», o dafara.]

²⁹ Mɔgɔ minw tun be tɛmɛna, u tun b'u kuun karikari ka Yezu nɛni ko: «Anhaan! E min be se ka Alabatosoba ci k'a lɔ kura ye tile saba kɔnɔ,

³⁰jigi ka bɔ gwengwenlɔgɔ kan k'i yɛrɛ kisi.»

³¹O cogo kelen na, sarakalasebagaw kuntigiw ni sariya karamɔgɔw tun be yɛlɛ Yezu ma n'u b'a fɔ ɲɔgɔn ye ko: «A ye mɔgɔ wɛrɛw kisi, nga a te se k'a yɛrɛ kisi.

³²N'a ye Ala ka Mɔgɔ wolomanin nin ye, Isirayɛli ka masacɛ, a ka jigi ka bɔ gwengwenlɔgɔ kan sisan. N'an ye o ye, an bena la a la.» U tun ye mɔgɔ minw gwengwen lɔgɔ kan Yezu gɛrɛfɛ, olu fana tun b'a nɛnina.

³³Tilegwangwan fɛ, dibi donna yɔrɔ bɛɛ fɔɔ ka lɛrɛ saba kɛ.

³⁴ Tile sumana tuma min na, Yezu pɛrɛnna u ka kaan na ko: «Eloyi, Eloyi, lamasabakitani?» O kɔrɔ ko: «Ne ka Ala, ne ka Ala, mun na i ye ne bila?»

³⁵Mɔgɔ minw tun be yen, u dɔw y'o pɛrɛnkan mɛn minkɛ, u y'a fɔ ko: «Aw k'aw tulo malɔ. A be kira Eli welela.»

³⁶ U dɔ bolila ka taga fuu ta, k'a don vinɛgiri la, k'a bila bere jamanjan dɔ kunna, ko a b'a di Yezu ma a k'a min. O cɛɛ nin y'a fɔ ko: «Aw ye lɔ. An ben'a filɛ yala ni Eli bena na a bɔ gwengwenlɔgɔ nin na.»

³⁷Yezu kulera ka sɔrɔ ka sa.

³⁸ O tuma na, Alabatosoba cɛtigɛfani faranna fila ye k'a daminɛ sanfɛ fɔɔ duguma.

³⁹Sɔlidasi kɛmɛ kuntigi min tun lɔnin be Yezu ɲafɛ, o y'a ye ko a sara ten minkɛ, a y'a fɔ ko: «Siga t'a la, cɛɛ nin tun ye Ala Deen ye.»

⁴⁰ Muso dɔw fana lɔnin tun be yɔrɔjan k'o koow filɛ. Magidala Mariyamu, Zaki fitini ni Zoze bamuso Mariyamu, ani Salome tun b'o musow cɛma.

⁴¹Yezu tun be Galile mara la tuma min na, olu tun be to ka tugu a kɔ k'a dɛmɛ. Muso caaman tun b'u cɛma fana minw tun tagara ni Yezu ye Zeruzalɛmu.

⁴²Lafiɲɛlon labɛnlon wuladafɛ tun lo. O dugusagwɛ tun bena kɛ lafiɲɛlon ye.

⁴³Arimateka Yusufu y'a jaa gwɛlɛya ka taga Pilati sɛgɛrɛ ka Yezu suu daali a fɛ janko lafiɲɛlon koow kana ɲagami. Yusufu tun ye mɔgɔbaba ye zuwifuw ka kititigɛlaw cɛma. Ale fana tun be Ala ka masaya waati kɔnɔna.

⁴⁴Pilati y'a mɛn ko Yezu sara joona ten minkɛ, o y'a kabakoya. A ye sɔlidasi kuntigi wele k'a ɲininga yala ni Yezu satuma mɛnna.

⁴⁵A ye kunnafoni sɔrɔ ka bɔ sɔlidasi kuntigi fɛ tuma min na, a sɔnna Yusufu ka taga Yezu suu ta.

⁴⁶Yusufu tagara bagi san. O kɔ, a tagara Yezu suu bɔ gwengwenlɔgɔ kan ka bagi nin meleke a la. U tun ye kaburu min sogi farakulu la, a y'a suu don o kɔnɔ. O kɔ, a ye kabakuru belebeleba dɔ kolonkolon ka kaburu datugu n'a ye.

⁴⁷Magidala Mariyamu ani Zoze bamuso Mariyamu ye Yezu suu donyɔrɔ filɛ.