Read dyu Mariki ka kitabu 2 Bible Online

Mariki ka kitabu 2 - dyu bible

Mariki ka kitabu 2

¹Tile dama tɛmɛnin kɔ, Yezu segira ka taga Kafaranamu. Mɔgɔw y'a mɛn ko a be soo kɔnɔ minkɛ,

²jamaba tagara lajɛn a fɛ fɔɔ lɔyɔrɔ dɛsɛra, hali kɛnɛma boon daa la. Yezu tun be Ala ka kuma fɔra u ye.

³O tuma na, mɔgɔ naani tagar'a fɛ ni muruku dɔ ye.

⁴U tun te se ka gwɛrɛ Yezu la jama kosɔn minkɛ, a tun be boon kɔnɔ yɔrɔ min na, u yɛlɛla k'o yɔrɔ sanfɛla walaka ka muruku jigi ni juru ye o woo fɛ k'a lanin to dilan kan.

⁵Yezu y'a ye k'o mɔgɔw nunu lara ale la minkɛ, a y'a fɔ muruku nin ye ko: «N teri, i ka hakɛw yafara.»

⁶O y'a sɔrɔ sariya karamɔgɔ dɔw siginin tun be yen. U y'a daminɛ ka miiri ko

⁷mun na cɛɛ nin be kuma ten, ko a be Ala tɔgɔ cɛn, ko jɔn le be se ka mɔgɔ ka hakɛw yafa ni Ala kelen tɛ.

⁸O yɔrɔnin kelen, Yezu y'u ka miiriya lɔn a yɛrɛ ma, a y'a fɔ u ye ko: «Mun na aw be miiri ten?

⁹K'a fɔ muruku ye ko: ‹I ka hakɛw yafara›, walima k'a fɔ a ye ko: ‹Wili k'i ka dilan ta ka taama›, o kuma fila la, jumɛn fɔ ka nɔgɔ?

¹⁰Nga n b'a fɛ aw k'a lɔn ko see be Mɔgɔ Dencɛ ye ka mɔgɔ ka hakɛw yafa k'a to diɲɛ na.» O kɔ, a y'a fɔ muruku ye ko:

¹¹«N b'a fɔ i ye, wili k'i ka dilan ta ka taga soo.»

¹²O yɔrɔnin bɛɛ, cɛɛ nin wilila k'a ka dilan ta ka bɔ u bɛɛ ɲana. U bɛɛ kabakoyara fɔɔ u tun be Ala tanu n'u b'a fɔ ko: «An ma nin ɲɔgɔn ye abada!»

¹³Yezu bɔra ka taga Galile bada la tugu. Jama bɛɛ tagar'a fɛ yen. A y'u kalan.

¹⁴A tɛmɛtɔ, a ye Alife dencɛ Levi siginin ye lɛnpominɛlaw ka baarakɛyɔrɔ la. Yezu y'a fɔ a ye ko: «Tugu ne kɔ.» Levi wilila ka tugu a kɔ.

¹⁵O kɔ, ka Yezu n'a ka kalandenw to dumuni na Levi ka soo, ni hakɛkɛla caaman tun sigira n'u ye ka dumuni kɛ, bari olu ɲɔgɔn caaman tun be to ka tugu Yezu kɔ.

¹⁶Sariya karamɔgɔ minw ye *Fariziɲɛw ye, olu dɔw y'a ye ko Yezu n'o mɔgɔw be dumuni kɛra ɲɔgɔn fɛ minkɛ, u y'a ka kalandenw ɲininga ko: «Mun na a be dumuni kɛ ni lɛnpominɛlaw ani hakɛkɛlaw ye?»

¹⁷Yezu y'u ka kuma mɛn minkɛ, a y'a fɔ u ye ko: «Mɔgɔ minw ka kɛnɛ, olu mako te furakɛla la, banabagatɔw le mako b'a la. Ne ma na mɔgɔtilenninw wele, nga ne nana hakɛkɛlaw le wele.»

¹⁸Loon dɔ, Zan ka kalandenw ni *Fariziɲɛw tun be suun na. Mɔgɔ dɔw tagara Yezu ɲininga ko: «Mun na Fariziɲɛw ka kalandenw ni Zan taw be suun don k'a sɔrɔ e taw te suun don?»

¹⁹Yezu ye talen la u ye a yɛrɛ ka koo la ko: «Kɔɲɔcɛ teriw be se ka suun don k'u ni kɔɲɔcɛ to ɲɔgɔn fɛ wa? K'u ni kɔɲɔcɛ to ɲɔgɔn fɛ, u te se ka suun don.

²⁰Nga, loon dɔ bena se, kɔɲɔcɛ bena bɔsi u la, u bena suun don o loon na.

²¹«Mɔgɔ si te fani kunkurunkura bari fani kɔrɔman na. N'o kɛra, fani kunkurunnin kuraman nin bena fani kɔrɔman sama k'a faran. A faranyɔrɔ bena boɲa ni fɔlɔta ye.

²²Mɔgɔ si te duvɛnkɛnɛ don foroko kɔrɔman kɔnɔ. N'o kɛra, duvɛnkɛnɛ bena foroko faran, foroko bena cɛn, duvɛn bena bɔn. Nga duvɛnkɛnɛ ka kan ka don forokokuraw le kɔnɔ.»

²³ Lafiɲɛlon dɔ la, Yezu n'a ka kalandenw tɛmɛtɔ foro dɔw furancɛ la, a ka kalandenw y'a daminɛ ka suman dɔw tigɛ.

²⁴*Fariziɲɛw ye Yezu ɲininga ko: «A filɛ u be min kɛra lafiɲɛlon na! O daganin tɛ!»

²⁵ Yezu y'u jaabi ko: «Kɔngɔ ye Dawuda n'a kɔmɔgɔw minɛ tuma min na k'a sɔrɔ dumunifɛn tun t'u fɛ, a ye min kɛ, aw m'o kalan ka ye wa?

²⁶ A donna Ala ka soo kɔnɔ sarakalasebagaw kuntigiba Abiyatari ka tile la. Buru minw tun bilanin be Ala ye, a ye olu dɔ dumu ka tila ka dɔ d'a kɔmɔgɔw ma, k'a sɔrɔ mɔgɔ si tun man kan k'olu dumu fɔɔ sarakalasebagaw dɔrɔn.»

²⁷O kɔ, Yezu y'a fɔ u ye ko: «Ala ye lafiɲɛlon sigi mɔgɔ nafa kosɔn, a ma mɔgɔ dan lafiɲɛlon kosɔn.

²⁸O le y'a to Mɔgɔ Dencɛ ye lafiɲɛlon fana kuntigi ye.»