Read dyu Mariki ka kitabu 3 Bible Online

Mariki ka kitabu 3 - dyu bible

Mariki ka kitabu 3

¹Waati wɛrɛ, Yezu segira ka don kalanso kɔnɔ. Cɛɛ bolofaganin dɔ tun be yen.

²Mɔgɔ minw tun be yen, u tun be Yezu kɔlɔsira yala n'a bena o cɛɛ kɛnɛya lafiɲɛlon na, janko u ka se k'a jalaki.

³Yezu y'a fɔ cɛɛ bolofaganin ye ko: «Wili ka na lɔ yan mɔgɔw bɛɛ ɲafɛ.»

⁴O kɔ, Yezu y'u ɲininga ko: «A daganin be ka koɲuman kɛ lafiɲɛlon na wa, walima ka kojugu kɛ? Ka mɔgɔ kisi wa, walima k'a faga?» U m'a jaabi.

⁵Yezu diminin y'u filɛfilɛ, a ɲaa sisira u ka tulogwɛlɛya kosɔn. A y'a fɔ cɛɛ ye ko: «I bolo jan.» A y'a jan, a kɛnɛyara.

⁶O yɔrɔnin bɛɛ, *Fariziɲɛw bɔra ka taga ɲɔgɔn ye ni masacɛ *Erɔdi kɔmɔgɔw ye ka Yezu fagacogo ɲini.

⁷Yezu n'a ka kalandenw bɔra o yɔrɔ la ka taga Galile bada la. Jamaba tugura a kɔ. U dɔw bɔra Galile mara yɛrɛ la, dɔw bɔra Zude mara la,

⁸dɔw bɔra Idume mara la. Dɔw bɔra Zeruzalɛmu, dɔw bɔra Zurudɛn baji kɔfɛ, dɔw fana bɔra Tiri ni Sidɔn gɛrɛfɛduguw la. O jamaba tagara Yezu sɛgɛrɛ, bari u tun y'a ka kɛwaliw kibaru mɛn.

⁹ A y'a fɔ a ka kalandenw ye k'u ka kurunfitini dɔ labɛn ale ye, janko jama kana na ale ɲɔtiɲɔti.

¹⁰Yezu tun be mɔgɔ caaman kɛnɛya, o kama banabagatɔ bɛɛ tun be girin a nɔɔ fɛ, janko u ka se ka maga a la.

¹¹Ni jinatɔw y'a ye tuma o tuma, u tun b'u kunbiri gwan a kɔrɔ ka pɛrɛn ko: «I ye Ala Dencɛ ye.»

¹²Nga Yezu tun b'a gwɛlɛya u ma k'u kana ale koo fɔ mɔgɔ si ye.

¹³O kɔ, Yezu yɛlɛla kulu dɔ kan k'a sagolamɔgɔw wele. U tagar'a fɛ.

¹⁴A ye mɔgɔ tan ni fila woloma olu cɛma k'u kɛ cidenw ye, janko u ka kɛ a taamaɲɔgɔnw ye an'a ka to k'u ci ka taga waajuli kɛ.

¹⁵A ye see d'u ma ka jinaw gwɛn.

¹⁶A ye mɔgɔ tan ni fila minw woloma, olu tɔgɔ filɛ: Simɔn, Yezu y'o tɔgɔ la ko Piyɛri, o kɔrɔ ko fara,

¹⁷ani Zebede ka dencɛ fila, Zaki n'a dɔgɔcɛ Zan, Yezu ye olu tɔgɔ la ko Bowanɛrizɛsi, o kɔrɔ ko mɔgɔ minw ka fari i n'a fɔ sanpɛrɛn,

¹⁸Andere ni Filipu, Baritelemi ni Matiyo, Toma ni Alife dencɛ Zaki, Tade ni Simɔn u be min wele Fasodenŋana,

¹⁹ani Zuda Isikariyɔti min ye Yezu don a juguw bolo.

²⁰O kɔ, Yezu tagara soo. Jamaba tagara lajɛn yen tugu fɔɔ Yezu n'a ka kalandenw tun te se ka waati yɛrɛ sɔrɔ ka dumuni kɛ.

²¹Yezu ka somɔgɔw y'o kibaru mɛn minkɛ, u tagara k'u b'a minɛ bari u tun be miiri ko a kuun wilila.

²² Sariya karamɔgɔ minw bɔra Zeruzalɛmu ka taga yen, olu ko: «Jinaw kuntigi Belezebuli b'a fɛ.» Ani ko: «Ale lo be see dir'a ma ka jinaw gwɛn ka bɔ mɔgɔw la.»

²³Yezu y'u wele ka talen la u ye. A ko: «Sutana be se k'a yɛrɛ gwɛn cogo di?

²⁴Ni jamana min ka mɔgɔw be ɲɔgɔn kɛlɛ, o jamana nin te se ka ɲa.

²⁵Ni somɔgɔ minw be ɲɔgɔn kɛlɛ, o soo nin be ci.

²⁶O la, ni Sutana tun be wili a yɛrɛ kama, a ka masaya tun bena nagasi. O masaya tun tena se ka mɛn, o tun bena ban joona.

²⁷«Mɔgɔ si te se ka don cɛɛ barikaman ka soo kɔnɔ k'a bololafɛnw cɛ n'a m'o cɛɛ minɛ k'a siri fɔlɔ. N'a y'a siri, o tuma na, a be se k'a ka sokɔnɔfɛnw bɛɛ cɛ.

²⁸«Tiɲɛ na, ne b'a fɔ aw ye ko mɔgɔw ka hakɛ bɛɛ, n'u ka Ala tɔgɔcɛn kuma bɛɛ be se ka yafa,

²⁹ nga ni mɔgɔ o mɔgɔ ye Nii Senuman tɔgɔ cɛn, Ala tena yafa o tigi ma fewu. O tigi ye hakɛ yafabali kɛ.»

³⁰Yezu y'o fɔ bari sariya karamɔgɔw tun ko jina b'a fɛ.

³¹Yezu baa n'a dɔgɔninw tagara lɔ kɛnɛma. U ye mɔgɔ bila ka taga Yezu wele.

³²Mɔgɔ caaman siginin tun be yen ka Yezu lamini. Dɔ y'a fɔ a ye ko: «Hakɛ to. I baa n'i dɔgɔninw lɔnin be kɛnɛma, u b'a fɛ k'i ye.»

³³Yezu y'a jaabi ko: «Jɔn ye ne baa ye? Jɔn ni jɔn ye ne dɔgɔninw ye?»

³⁴O kɔ, mɔgɔ minw siginin tun be yen k'a lamini, a ye olu filɛ k'a fɔ ko: «Ne baa ni ne dɔgɔninw filɛ yan.

³⁵Mɔgɔ o mɔgɔ be Ala sago kɛ, o tigi ye ne dɔgɔcɛ, walima ne dɔgɔmuso, walima ne baa ye.»