Read dyu Mariki ka kitabu 7 Bible Online

Mariki ka kitabu 7 - dyu bible

Mariki ka kitabu 7

¹*Fariziɲɛw ni sariya karamɔgɔ dɔw bɔra Zeruzalɛmu ka taga lajɛn Yezu kɔrɔ.

²U y'a ye ko a ka kalanden dɔw be dumuni kɛra n'u tigɛ nɔgɔninw ye, bari u tun m'u tigɛw ko ka kɛɲɛ ni Fariziɲɛw ka landa ye.

³Tiɲɛ na, Fariziɲɛw ni zuwifu tɔw si te dumuni kɛ n'u m'u tigɛw ko ka ɲa ka kɛɲɛ n'u faaw ka landa ye.

⁴Hali n'u kɔsegira ka bɔ lɔgɔ la, u te dumuni kɛ n'u ma ko fɔlɔ. U be landa caaman bato fana i n'a fɔ jifilenw kocogo, ani duunw ni nigɛdagaw kocogo.

⁵O le y'a to Fariziɲɛw ni sariya karamɔgɔw ye Yezu ɲininga ko: «Mun na e ka kalandenw te an bɛmaw ka landa bato? Mun na u be dumuni kɛ n'u tigɛ nɔgɔninw ye?»

⁶ Yezu y'u jaabi ko: «Filakanfɔ nunu! Ezayi ye kirayakuma min fɔ aw koo la, o bɛnna kosɔbɛ. A y'a sɛbɛn ko Ala y'a fɔ ko: ‹Mɔgɔ nunu be ne boɲa u daa dama le la, nga u dusu yɔrɔ ka jan ne la.

⁷U be ne bato gwansan, bari u be ɲɔgɔn kalan koo minw na, o ye adamadenw ka sariya dama le ye.› »

⁸Yezu y'a fɔ u ye k'u be Ala ka sariyaw to yen ka mɔgɔw ka landaw bato.

⁹A y'a fɔ u ye tugu ko: «Aw be sababu sɔrɔ ka ban Ala ka sariya la k'aw ka landaw kɛ.

¹⁰ Musa y'a fɔ ko mɔgɔ k'a baa n'a faa boɲa, ko ni mɔgɔ min y'a faa, walima a baa nɛni, k'o tigi ka kan ka faga.

¹¹Nga aw b'a fɔ ko ni mɔgɔ dɔ y'a fɔ a faa, walima a baa ye ko ale tun ka kan k'a dɛmɛ ni fɛɛn min ye, ko a y'o di Ala ma,

¹²aw b'a kɛ o tigi t'a faa, walima a baa dɛmɛ n'a bololafɛn si ye tugu.

¹³O cogo la, aw be ɲɔgɔn kalan landa minw na, aw be Ala ka kuma kɛ kumafu ye olu kosɔn. Aw b'o bɔɲɔgɔnko caaman kɛ.»

¹⁴Yezu ye jama wele tugu k'a fɔ u ye ko: «Aw bɛɛ k'aw tulo malɔ ka n ka kuma faamu:

¹⁵Mɔgɔ be fɛɛn o fɛɛn don a daa la, o te se k'a nɔgɔ, nga min be bɔ a dusu la, o le b'a nɔgɔ. [

¹⁶Ni tulo be min fɛ ka mɛnni kɛ, o ka mɛnni kɛ.]»

¹⁷Yezu bɔra jama kɔrɔ ka taga don soo kɔnɔ tuma min na, a ka kalandenw y'a ɲininga o kuma kɔrɔ la.

¹⁸A y'u jaabi ko: «Aw fana ye hakilitanw ye wa? Aw m'a lɔn ko mɔgɔ be fɛɛn o fɛɛn don a daa la, k'o te se k'a nɔgɔ wa?

¹⁹Bari o te don a dusu la, nga o be don a kɔnɔ la, o kɔ, a be taga banakɔ.» O cogo la, Yezu y'a yira a ka kuma fɛ ko dumunifɛn bɛɛ be se ka dumu.

²⁰A y'a fɔ u ye fana ko: «Fɛɛn minw be bɔ mɔgɔ dusu la, olu le b'a nɔgɔ.

²¹Miiriyajuguw be bɔ mɔgɔ dusu le la, ani kakalaya, ni soɲali, ani mɔgɔfaga,

²²ɲamɔgɔya, wasabaliya, juguya, namara, mɔgɔkolonya, ɲagoya, nɛnili, yɛrɛboɲa, ani miiribaliya.

²³Kojugu nunu bɛɛ be bɔ mɔgɔ dusu la, olu le b'a nɔgɔ.»

²⁴O kɔ, Yezu bɔra zuwifuw ka mara la ka taga Tiri gɛrɛfɛdugu dɔ la. A jigira mɔgɔ dɔ ka soo. A tun t'a fɛ mɔgɔ si k'a lɔn ko ale b'o soo nin kɔnɔ, nga mɔgɔw nana bɔ a kala ma.

²⁵Muso dɔ tun be yen, jina tun b'a denmuso la. A ye Yezu kibaru mɛn dɔrɔn, a tagar'a kunbiri gwan Yezu kɔrɔ.

²⁶O muso tun te zuwifu ye. A wolola Siri gɛrɛfɛ jamana dɔ la min tɔgɔ ko Fenisi. A ye Yezu daali ko a ka jina gwɛn ka bɔ a denmuso la.

²⁷Nga Yezu ye talen la a ye ko: «A to denmisɛnw ka dumuni kɛ fɔlɔ bari a daganin tɛ ka denmisɛn ka dumuni ta k'a fili wuluw ye.»

²⁸A ye Yezu jaabi ko: «Matigi, o ye tiɲɛ ye, nga ka denmisɛnw to dumuni na, dumuni murumuru minw be ben, wuluw b'o dumu.»

²⁹O tuma na, Yezu y'a fɔ a ye ko: «I ka kuma nin kosɔn, jina bɔra i denmuso la ka ban. Segi ka taga soo.»

³⁰Muso segira ka taga soo. A tagara deen lanin sɔrɔ kalaka kan. Jina tun bɔra a la ka ban.

³¹Yezu bɔra Tiri mara la ka taga tɛmɛ Sidɔn, ka Dugu Tan mara cɛɛ tigɛ ka sɔrɔ ka taga Galile baa faan fɛ.

³²Mɔgɔ dɔw tagar'a sɛgɛrɛ ni cɛɛ tulogweren dɔ ye. A tun te se ka kuma ka ɲa fana. U ye Yezu daali ko a k'a bolo la cɛɛ kan k'a kɛnɛya.

³³O la, Yezu tagara n'a ye a danna. A y'a bolokunnadenw don cɛɛ tulo la k'a daji mɔ a nɛnkun na.

³⁴O kɔ, Yezu y'a ɲaa kɔrɔta sanfɛ ka ninakili ni fanga ye k'a fɔ a ye u ka kaan na ko: «Efata!» O kɔrɔ ko i tulo ka yɛlɛ.

³⁵O yɔrɔnin bɛɛ, cɛɛ tulo yɛlɛla, a nɛnjuru fonina, a y'a daminɛ ka kuma ka ɲa.

³⁶Yezu y'a fɔ u ye k'a gwɛlɛya k'u kan'a fɔ mɔgɔ si ye. Nga a tora k'a gwɛlɛya u ma cogo min na, u tora ka koo nin kibaru jɛnsɛn ten.

³⁷Mɔgɔw kabakoyaninba tun b'a fɔra ko: «A be koo minw kɛ, o bɛɛ ka ɲi kosɔbɛ! A be tulogwerenw yɛrɛ tulo yɛlɛ, k'a kɛ bobow be kuma.»