Read dyu Mariki ka kitabu 8 Bible Online

Mariki ka kitabu 8 - dyu bible

Mariki ka kitabu 8

¹Loon dɔ la, jamaba lajɛnnin tun be Yezu kɔrɔ tugu. Foyi tun te jama fɛ k'a dumu minkɛ, a y'a ka kalandenw wele k'a fɔ u ye ko:

²«Jama nin hinɛ be ne la, bari, u be ni ne ye, a tile saba ye bii ye, foyi t'u fɛ k'a dumu.

³Ni ne ye sira d'u kɔngɔtɔlaman ma, u barika bena dɛsɛ sira la, bari u dɔw bɔyɔrɔ ka jan.»

⁴A ka kalandenw y'a jaabi ko: «Anw bena se ka dumuni sɔrɔ yɔrɔ jumɛn yan kongokolon nin kɔnɔ ka mɔgɔ nunu fa?»

⁵Yezu y'u ɲininga ko: «Burukun joli le b'aw fɛ?» U ko burukun wolonwula.

⁶A y'a fɔ jama ye k'u ka sigi duguma. A ye burukun wolonwula ta ka barika la Ala ye. O kɔ, a y'o karikari k'u d'a ka kalandenw ma k'u k'a tilan. U y'a tilan jama cɛ.

⁷Jigɛmisɛn damani tun b'u fɛ fana. Yezu ye barika la Ala ye o la, k'a fɔ a ka kalandenw ye k'u k'o fana tilan jama cɛ.

⁸U ye dumuni kɛ fɔɔ ka fa. U ye dumuni tɔɔ cɛ ka segi wolonwula fa n'a ye.

⁹Mɔgɔ minw tun y'o dumuni kɛ, olu tun be mɔgɔ waa naani ɲɔgɔn bɔ. O kɔ, Yezu y'a fɔ u ye k'u ka taga soo.

¹⁰O yɔrɔnin bɛɛ, Yezu n'a ka kalandenw donna kurun kɔnɔ ka taga Dalimanuta mara la.

¹¹ *Fariziɲɛw tagara Yezu sɛgɛrɛ ka sɔsɔli daminɛ n'a ye. U tun b'a fɛ k'a kɔrɔbɔ minkɛ, u y'a ɲini a fɛ ko a ka kabako dɔ kɛ ka bɔ sankolo la.

¹² Yezu ninakilila ni fanga ye k'a fɔ ko: «Mun na bii mɔgɔ nunu b'a fɛ ne ka kabako dɔ kɛ? Tiɲɛ na, ne b'a fɔ aw ye ko kabako si tena kɛ k'a yira u la.»

¹³O kɔ, Yezu bɔra u kɔrɔ ka taga don kurun kɔnɔ tugu ka taga baa kɔ.

¹⁴Kalandenw tun ɲinɛna ka buru ta. Foyi tun t'u fɛ kurun kɔnɔ fɔɔ burukun kelenpe.

¹⁵ Yezu y'u ladi ko: «Aw k'aw yɛrɛ kɔlɔsi *Fariziɲɛw ka burufununan ni *Erɔdi ta ma.»

¹⁶Kalandenw y'a fɔ ɲɔgɔn ye ko: «Buru t'an fɛ minkɛ, o le y'a to Yezu be kuma ten.»

¹⁷Yezu bɔra u ka kuma kala ma, a y'u ɲininga ko: «Mun na aw b'a fɔra ɲɔgɔn ye ko: ‹Buru t'an fɛ minkɛ,› k'o le y'a to ne be kuma ten? Aw te faamuli kɛ halibi wa? Aw hakili ka dɔgɔ wa?

¹⁸ Ɲaa b'aw fɛ, aw do te yeli kɛ. Tulo b'aw fɛ, aw do te mɛnni kɛ.

¹⁹Ne ye burukun duuru karikari k'a di cɛɛ waa duuru ma tuma min na, aw hakili t'o la wa? Aw ye segi joli fa n'a tɔɔ ye?» U y'a jaabi ko segi tan ni fila.

²⁰A y'u ɲininga tugu ko: «Ne ye burukun wolonwula tilantilan k'u di mɔgɔ waa naani ma tuma min na, aw ye segi joli fa n'a tɔɔ ye?» U y'a jaabi ko segi wolonwula.

²¹Yezu y'a fɔ u ye ko: «Aw te koo faamu halibi wa?»

²²Yezu n'a ka kalandenw tagara Bɛtisayida. Mɔgɔ dɔw tagara Yezu sɛgɛrɛ ni fiɲɛntɔ dɔ ye. U ye Yezu daali ko a ka sabali ka maga o fiɲɛntɔ nin na k'a kɛnɛya.

²³A y'a bolo minɛ ka bɔ n'a ye dugu kɔnɔ. O kɔ, a y'a daji mɔ fiɲɛntɔ nin ɲaa na k'a bolo la a kan k'a ɲininga ko: «I ɲaa be fɛɛn dɔ la wa?»

²⁴Fiɲɛntɔ y'a ɲaa yɛlɛ k'a fɔ ko: «Ne ɲaa be mɔgɔw la, u be i n'a fɔ yiriw nga u be taamana.»

²⁵Yezu y'a bolo la cɛɛ ɲaa kan tugu. O kɔ, cɛɛ y'a ɲaa yɛlɛ, a ye fɛɛn bɛɛ ye ka ɲa.

²⁶O tuma na, Yezu y'a fɔ a ye ko: «Tilen ka taga soo, i kana taga bɔ dugu nin kɔnɔ yɛrɛ.»

²⁷Yezu n'a ka kalandenw tagara Filipu ka Sezare dafɛduguw la. K'u to sira kan, a y'a ka kalandenw ɲininga ko: «Mɔgɔw b'a fɔra ko ne ye jɔn ye?»

²⁸ U y'a jaabi ko: «Dɔw ko i ye Zan batizelikɛla ye, dɔw ko i ye Eli ye, dɔw fana ko i ye kiraw dɔ ye.»

²⁹ Yezu y'u ɲininga tugu ko: «Aw do, aw b'a miiri ko ne ye jɔn ye?» Piyɛri y'a jaabi ko: «I ye Ala ka Mɔgɔ wolomanin nin ye.»

³⁰O la, Yezu y'a fɔ k'a gwɛlɛya u ye k'u kana o fɔ mɔgɔ si ye.

³¹O kɔ, Yezu ye kuma ta k'a ka kalandenw kalan. A y'a fɔ u ye ko: «Wajibi lo Mɔgɔ Dencɛ ka tɔɔrɔ kosɔbɛ. Cɛkɔrɔbaw ni sarakalasebagaw kuntigiw, ani sariya karamɔgɔw bena ban a la, u ben'a faga, nga tile sabanan loon a faganin kɔ, a bena kunun.»

³²A y'o kuma nin fɔ u ye k'a gwɛ. O la, Piyɛri tagara n'a ye gɛrɛn na k'a daminɛ k'a jalaki.

³³Nga Yezu y'a ɲaa yɛlɛma k'a ka kalanden tɔw filɛ k'a fɔ Piyɛri ye ko: «E Sutana nin, taga ka bɔ n kɔrɔ, bari i ka miiriya ni Ala ta te kelen ye, i be miiri i n'a fɔ adamaden tɔw.»

³⁴ O kɔ, Yezu y'a ka kalandenw ni jama wele k'a fɔ u ye ko: «Ni mɔgɔ min b'a fɛ ka tugu ne kɔ, o tigi kana miiri a yɛrɛ ka nafa koo la. A k'a ka gwengwenlɔgɔ ɲun ka tugu ne kɔ.

³⁵ Mɔgɔ o mɔgɔ b'a fɛ k'a nii kisi, o tigi bena bɔnɔ a la. Nga ni mɔgɔ min bɔnɔna a nii na ne ni kibaru diman kosɔn, o tigi ben'a nii kisi.

³⁶A be mun ɲa mɔgɔ ye ka diɲɛ fɛɛn bɛɛ sɔrɔ n'a bɔnɔna a nii na?

³⁷Mɔgɔ be se ka mun di Ala ma min b'a nii sɔngɔ bɔ?

³⁸Bii mɔgɔw banna Ala la, u be hakɛ kɛ. Ni mɔgɔ min maloyara olu ɲana ka ne koo fɔ, ne bena na n Faa ka sebagaya la tuma min na ni mɛlɛkɛ senumanw ye, Mɔgɔ Dencɛ fana bena maloya k'a fɔ k'o tigi ye a ka kalanden ye.»