Read dyu Mariki ka kitabu 9 Bible Online

Mariki ka kitabu 9 - dyu bible

Mariki ka kitabu 9

¹A y'a fɔ u ye tugu ko: «Tiɲɛ na, ne b'a fɔ aw ye ko aw minw be yan, aw dɔw tena sa n'u ma Ala ka masaya natɔ ye ni fanga ye.»

² Tile wɔɔrɔ o kɔ, Yezu tagara ni Piyɛri ni Zaki ani Zan ye kulu jamanjan dɔ kan u danna. A cogo yɛlɛmana u ɲana.

³A ka faniw gwɛra parapara ka manamana cogo dɔ la fɔɔ mɔgɔ si te dugukolo kan min be se ka fani ko, a ka gwɛ k'o bɔ.

⁴Kalanden saba nunu ye Eli ni Musa ye. U fila tun be kumana ni Yezu ye.

⁵O la, Piyɛri ye kuma ta k'a fɔ Yezu ye ko: «Karamɔgɔ, a ka ɲi an ka to yan. Anw bena bugu saba lɔ, e ta kelen, Musa ta kelen, Eli ta kelen.»

⁶Piyɛri tun ka kan ka min fɔ, a m'o lɔn bari olu kalandenw tun siranna kosɔbɛ.

⁷Sankaba dɔ jigira k'u datugu. Kumakan dɔ bɔra o sankaba la k'a fɔ ko: «Nin ye ne Dencɛ kanunin ye, aw ka mɛnni kɛ a fɛ.»

⁸O yɔrɔnin bɛɛ, kalanden nunu y'u gɛrɛfɛlaw filɛ, nga u ma mɔgɔ si ye tugu ni Yezu kelen tɛ.

⁹U jigitɔ ka bɔ kulu kan, Yezu y'a fɔ u ye k'a gwɛlɛya k'u ye koo min ye, k'u kana o lakali mɔgɔ si ye, fɔɔ ni Mɔgɔ Dencɛ kununna a sanin kɔ.

¹⁰U y'o kuma nin bato, nga u tora ka ɲɔgɔn ɲininga ko ka kunun i sanin kɔ, k'o kɔrɔ ye mun ye.

¹¹ U ye Yezu ɲininga ko: «Mun na sariya karamɔgɔw ko Eli ka kan ka na kisibaga ɲa?»

¹²A y'u jaabi ko: «Tiɲɛ lo. Eli ka kan ka na fɛɛn bɛɛ labɛn fɔlɔ, nga mun na a fɔra Ala ka kuma na ko Mɔgɔ Dencɛ ka kan ka tɔɔrɔ kosɔbɛ, ko mɔgɔw bena ban a la?

¹³Ayiwa, ne b'a fɔ aw ye ko Eli nana ka ban, ko mɔgɔw y'u yɛrɛ sago kɛ a la i ko a fɔra Ala ka kuma na a ka koo la cogo min na.»

¹⁴Yezu ni Piyɛri ni Zaki ani Zan kɔsegira kalanden tɔw fɛ tuma min na, u tagar'a sɔrɔ jamaba y'u lamini. Sariya karamɔgɔ dɔw tun be sɔsɔli kɛra ni kalandenw ye.

¹⁵Yezu tagara bari jama na. Mɔgɔw y'a ye dɔrɔn, u girinna ka taga fo.

¹⁶Yezu y'a ka kalandenw ɲininga ko: «Aw ni sariya karamɔgɔw be ɲɔgɔn sɔsɔra mun lo la?»

¹⁷Cɛɛ dɔ tora jama cɛma k'a jaabi ko: «Karamɔgɔ, jina be n dencɛ la. A y'a kɛ bobo ye, o le y'a to, n nana n'a ye i fɛ.

¹⁸N'a wilila a kan yɔrɔ o yɔrɔ, a b'a ta k'a ben duguma, a daa be kanga, a b'a ɲiiw ɲimi, a be ja kankan. Ne y'i ka kalandenw daali k'u ka jina gwɛn ka bɔ a la, nga u ma se.»

¹⁹Yezu y'a fɔ u ye ko: «Aw bii mɔgɔ minw te la Ala la, ne bena to aw fɛ fɔɔ tuma jumɛn? Aw ka na n'a ye.»

²⁰U tagara n'a ye Yezu fɛ. Jina ye Yezu ye dɔrɔn, a ye kanbelen nin yuguyugu kosɔbɛ. Kanbelen nin benna duguma ka kolonkolon. A daa kangara.

²¹Yezu ye kanbelen nin faa ɲininga ko: «Kabini tuma jumɛn jina nin b'a tɔɔrɔ ten?» A y'a jaabi ko: «Kabin'a denmisɛn tuma.

²²Siɲɛ caaman, jina y'a ta k'a ben tasuma na ani jii la janko a ka faga. Nga n'i be se ka fɛɛn dɔ kɛ, hinɛ an na k'an dɛmɛ.»

²³Yezu y'a fɔ a ye ko: «Mun na i ko: ‹N'i be se›? Ni mɔgɔ min lara Ala la, Ala be se ka fɛɛn bɛɛ kɛ o tigi ye.»

²⁴O yɔrɔnin bɛɛ, kanbelen nin faa pɛrɛnna ko: «Ne lara Ala la. Ne dɛmɛ janko ne kana sigasiga.»

²⁵Yezu y'a ye ko jama be girinna ka na u kɔrɔ minkɛ, a ye kuma gwɛlɛya jina ma k'a fɔ a ye ko: «E min be mɔgɔ kɛ bobo ni tulogweren ye, n b'a fɔ i ye, bɔ kanbelen nin na, i kana don a la tugu.»

²⁶Jina kulera ka kanbelen nin yuguyugu kosɔbɛ ka bɔ a la. Kanbelen nin benna ka kirin ka kɛ i n'a fɔ suu fɔɔ mɔgɔ bɛɛ tun ko a sara.

²⁷Nga Yezu ye kanbelen nin bolo minɛ k'a wili. A wilila ka lɔ.

²⁸Yezu tagara soo tuma min na, k'a to n'a ka kalandenw ye u danna, u y'a ɲininga ko: «Mun na anw ma se ka jina nin gwɛn?»

²⁹A y'u jaabi ko: «Mɔgɔ te se ka jina nin ɲɔgɔn gwɛn cogo si la n'a ma Ala daali.»

³⁰Yezu n'a ka kalandenw wilila ka bɔ o yɔrɔ la ka taga tɛmɛ Galile mara la. Yezu tun t'a fɛ mɔgɔw ka bɔ u tɛmɛtɔ kala ma,

³¹bari a tun b'a ka kalandenw kalanna. A tun b'a fɔra ko: «U bena Mɔgɔ Dencɛ don mɔgɔjuguw bolo, k'a faga, tile saba a faganin kɔ, a bena kunun.»

³²Nga kalandenw tun t'o kuma faamu, u tun be siran k'a ɲininga o kuma kɔrɔ la fana.

³³Yezu n'a ka kalandenw sera Kafaranamu. U donna soo kɔnɔ tuma min na, a y'u ɲininga ko: «Aw tun be mun sɔsɔli lo la sira kan?»

³⁴ Nga u jera, bari u tun be ɲɔgɔn sɔsɔra sira kan ko jɔn le ye kuntigi ye u cɛma.

³⁵ O tuma na, Yezu sigira k'a fɔ u mɔgɔ tan ni fila bɛɛ ye ko: «Ni mɔgɔ dɔ b'a fɛ ka kɛ ɲamɔgɔ ye, o tigi ka kan ka kɛ bɛɛ kɔmɔgɔ ye ani bɛɛ ka baaraden ye.»

³⁶A ye denmisɛn dɔ minɛ k'o lɔ u cɛma. O kɔ, a y'a ta a disi la k'a fɔ u ye ko:

³⁷ «Ni mɔgɔ min ye denmisɛn nin ɲɔgɔn minɛ ka ɲa ne kosɔn, o tigi ye ne le minɛ ka ɲa. Mɔgɔ min ye ne minɛ ka ɲa, o tigi ma o kɛ ne ye, nga a ye ne cibaga le minɛ ka ɲa.»

³⁸Zan y'a fɔ Yezu ye ko: «Karamɔgɔ, an ye cɛɛ dɔ ye, a be jinaw gwɛn ka bɔ mɔgɔw la i tɔgɔ la. An y'a bali k'o kɛ, bari an dɔ tɛ.»

³⁹Yezu y'a jaabi ko: «Aw kan'a bali, sabu, mɔgɔ si te se ka kabako kɛ ne tɔgɔ la ka tila ka ne tɔgɔjugu fɔ o yɔrɔnin bɛɛ.

⁴⁰ Mɔgɔ min te an jugu ye, o ye an ɲiin ye.

⁴¹ Mɔgɔ o mɔgɔ mana filen ɲaa kelen jii minta d'aw ma bari aw ye ne ta ye, tiɲɛ na, ne b'a fɔ aw ye k'o tigi tena bɔnɔ o tɔnɔ na.

⁴²«Denmisɛn minw ye lanaya sɔrɔ, ni mɔgɔ dɔ kɛra sababu ye k'olu dɔ kunna cɛn, yanni a tigi k'o kɛ, ni kabakuru belebeleba tun sirila a kaan na k'a fili kɔgɔji kɔnɔ, o tun ka fisa a ma.

⁴³ N'i bolo be kɛ sababu ye k'i don kojugu la, a tigɛ k'a bɔ i la. I ka don arijana na n'i bolo kelen ye, o ka fisa bolo fila ka to i fɛ, i ka taga jahanama tasuma fagabali la. [

⁴⁴Tumu minw be don mɔgɔ la o yɔrɔ la, olu te sa. O yɔrɔ tasuma te faga.]

⁴⁵N'i seen be kɛ sababu ye k'i don kojugu la, a tigɛ k'a bɔ i la. I ka don arijana na n'i seen kelen ye, o ka fisa seen fila ka to i fɛ, i ka fili jahanama na. [

⁴⁶Tumu minw be mɔgɔ tɔɔrɔ o yɔrɔ la, olu te sa. O yɔrɔ tasuma fana te faga fewu.]

⁴⁷ N'i ɲaa be kɛ sababu ye k'i don kojugu la, a wɔgɔbi. I ka don Ala ka masaya la n'i ɲaden kelen ye, o ka fisa ɲaa fila ka to i fɛ, i ka fili jahanama na.

⁴⁸ Tumu minw be don mɔgɔ la o yɔrɔ la, olu te sa. O yɔrɔ tasuma fana te faga.

⁴⁹U tun be kɔgɔ kɛ sarakafɛn dɔw la cogo min na k'u mara, u te cɛn, tɔɔrɔ bena kɛ tasuma ye mɔgɔ bɛɛ ma k'u dusu saniya, k'u mara Ala ye ten.

⁵⁰ «Kɔgɔ ye fɛnɲuman ye, nga n'a ka timiya bɔra a la, aw ben'a timiya ni mun ye? Aw ka kɔgɔ dɔn aw yɛrɛ la, ka to hɛrɛ la aw ni ɲɔgɔ cɛ.»