Read dyu Luka ka kitabu 10 Bible Online

Luka ka kitabu 10 - dyu bible

Luka ka kitabu 10

¹O kɔ, Matigi ye kalanden bi wolonwula ni fila wɛrɛ woloma. A yɛrɛ tun ka kan ka taga duguba ni dugudennin minw na, a y'u ci ka taga o yɔrɔw la a yɛrɛ ɲa mɔgɔ fila fila.

²A y'a fɔ u ye ko: «Suman tigɛta ka ca, nga baarakɛlaw man ca. Aw ka forotigi daali a ka baarakɛlaw ci ka taga ka suman tigɛ.

³Ayiwa, aw ka taga! Ne b'aw ci i n'a fɔ sagadenw, waraw cɛma.

⁴Aw kana wari ta, ni dugutagaminan, ni sanbara. Aw kana lɔ mɔgɔ si fɛ sira kan foli kama.

⁵N'aw sera dugu min na ka don luu min kɔnɔ, aw ka kɔn k'a fɔ ko hɛrɛ ka kɛ luu nin kɔnɔ mɔgɔw ye.

⁶N'o y'a sɔrɔ ni mɔgɔ dɔ be luu nin kɔnɔ n'a be hɛrɛ ɲinina, o tigi bena aw ka hɛrɛ foli duba sɔrɔ. N'o tɛ, aw ka hɛrɛ foli n'a duba bena segi aw ma.

⁷ Aw ka to o luu kɔnɔ. U mana fɛɛn o fɛɛn d'aw ma, aw k'o dumu, bari baarakɛla ka kan n'a ka sara ye. Aw kana bɔ jatigiso dɔ la ka yɛlɛma dɔ wɛrɛ la.

⁸N'aw donna dugu min na, n'u y'aw ladon ka ɲa, u mana dumunifɛn min d'aw ma, aw k'o dumu.

⁹Aw k'o dugu banabagatɔw kɛnɛya, k'a fɔ dugu mɔgɔw ye ko: ‹Ala ka masaya tuma sera aw fɛ.›

¹⁰ N'aw donna dugu min na, n'u m'aw ladon ka ɲa, aw ka bɔ ka lɔ u ka forobayɔrɔ la k'a fɔ u ye ko:

¹¹‹Hali aw ka dugu buguri min nɔrɔla an seen na, an b'o furanfuran ka bɔ an seen na k'a to aw ye. Nga aw k'a lɔn ko Ala ka masaya waati sera.›

¹² «Ne b'a fɔ aw ye k'o loon na, Sodɔmukaw ka tɔɔrɔ bena nɔgɔya ka tɛmɛ o dugu mɔgɔ nunu ta kan.

¹³ «Aw Korazɛnkaw ni Bɛtisayidakaw, bɔnɛ bena kɛ aw ta ye, bari ne ye kabako minw kɛ aw fɛ, ni olu tun kɛra Tirikaw ni Sidɔnkaw fɛ, bii tun y'a sɔrɔ u ye dusukasifani don, ka bugurigwɛ mɔn u yɛrɛ la k'u sɔɔn yɛlɛma.

¹⁴Tiɲɛ na, kiti loon na, Tirikaw ni Sidɔnkaw ka tɔɔrɔ bena nɔgɔya ka tɛmɛ aw ta kan.

¹⁵ Aw Kafaranamukaw, aw ka dugu bena taga ɲa wa? Abada! A bena halaki pewu.»

¹⁶ O kɔ, a y'a fɔ a ka kalandenw ye ko: «Mɔgɔ minw mana aw lamɛn, o tigiw be ne yɛrɛ le lamɛn. Mɔgɔ minw mana ban k'aw ladon, u banna ka ne yɛrɛ le ladon. Ni mɔgɔ minw banna ka ne ladon, o be banna ne cibaga le la.»

¹⁷Kalanden bi wolonwula ni fila nunu segira ni nisɔndiya ye ka n'a fɔ Yezu ye ko: «Matigi, i tɔgɔ barika la, hali jinaw tun te se ka ban an ka fɔta ma.»

¹⁸A y'a fɔ u ye ko: «Ne ye Sutana bentɔ ye ka bɔ sankolo la i ko sanmanamana.

¹⁹ N kɔni ye see d'aw ma ka taama saaw ni bunteniw kan, ani ka see d'aw ma k'aw jugu Sutana ka sebagaya nagasi. Fɛnjugu si ka dabari tena se aw kɔrɔ.

²⁰Aw kana nisɔndiya bari jinaw tun te se ka ban aw ka fɔta ma. Nga aw ka nisɔndiya bari Ala y'aw tɔgɔ sɛbɛn a fɛ sankolo la.»

²¹O waati yɛrɛ la, Yezu nisɔndiyara kosɔbɛ Nii Senuman barika la k'a fɔ ko: «N be barika la i ye n Faa, sankolo ni dugukolo masa, bari, i ye koo minw dogo lɔnnikɛlaw ni hakilitigiw la, i ye olu yira denmisɛnw na. I y'a kɛ ten bari a diyara i ye tiɲɛ na.»

²² O kɔ, a y'a fɔ mɔgɔw ye ko: «N Faa ye fɛɛn bɛɛ di ne ma. Mɔgɔ si te Dencɛ lɔn n'a Faa dɔrɔn tɛ, mɔgɔ si te Faa fana lɔn, fɔɔ Dencɛ kelenpe. Ni Dencɛ b'a fɛ ko mɔgɔ min k'a Faa lɔn, o tigi ben'a lɔn.»

²³O kɔ, a y'a ɲaa yɛlɛma ka sin a ka kalandenw ma k'a fɔ u dɔrɔn ye ko: «Koo minw be kɛra nin ye, aw minw be olu yera, aw dagamunin lo.

²⁴Bari aw be koo minw yera, ne b'a fɔ aw ye ko kira caaman ni masacɛ caaman tun b'a fɛ k'o ye, nga u ma se k'o ye. Aw be min mɛnna, u tun b'a fɛ k'o mɛn, nga u m'o mɛn.»

²⁵Sariya karamɔgɔ dɔ tun b'a fɛ ka Yezu kɔrɔbɔ. O la, a wilila k'a ɲininga ko: «Karamɔgɔ, ne ka kan ka mun kɛ ka nii banbali sɔrɔ?»

²⁶Yezu fana y'ale ɲininga ko: «Mun lo fɔra sariyasɛbɛ kɔnɔ? N'i b'a kalan, i b'o faamu cogo di?»

²⁷ A y'a jaabi ko: «I ka Matigi i ka Ala kanu n'i dusu bɛɛ ye, an'i kɔnɔ bɛɛ ye, n'i fanga bɛɛ ye, an'i hakili bɛɛ ye. I k'i mɔgɔɲɔgɔn kanu i n'a fɔ i yɛrɛ.»

²⁸ Yezu y'a fɔ a ye ko: «I ka jaabili ɲana. A kɛ o cogo la, i bena hɛrɛ banbali sɔrɔ.»

²⁹Nga sariya karamɔgɔ nin tun b'a fɛ ka joo di a yɛrɛ ma. O la, a ye Yezu ɲininga ko: «Jɔn le ye ne mɔgɔɲɔgɔn ye?»

³⁰Yezu y'a jaabi ko: «Cɛɛ dɔ tun bɔra Zeruzalɛmu n'a be tagara Zeriko. Benkannikɛlaw girinn'a kan, k'a ka faniw n'a bololafɛnw bɛɛ bɔsi a la, ka tila k'a bugɔ fɔɔ k'a kirin ka taga k'a to sira kan.

³¹O y'a sɔrɔ sarakalasebaga dɔ tun b'o sira kelen kan ka na. A ye cɛɛ mandiminin ye tuma min na, a faranna ka tɛmɛ sira faan dɔ fɛ.

³²Levi kɔmɔgɔw dɔ fana nana se o cɛɛ ma, a y'a ye ka tɛmɛ sira faan dɔ fɛ. [1]

³³ Nga Samarika dɔ dugutagatɔ nana se cɛɛ nin ma, a y'a ye minkɛ, a hinɛ donn'a la kosɔbɛ.

³⁴A gwɛrɛl'a la k'a ka jolidaw ko, ka fura kɛ u la, k'u siri. O kɔ, a y'a ta k'a la a ka fali kan ka taga n'a ye lonan jigiyɔrɔ dɔ la, k'a janto a la yen.

³⁵O dugusagwɛ, a ye warigwɛ deen fila di jatigicɛ ma k'a fɔ a ye ko a k'a janto a la. Ko n'a ye musaka minw kɛ ka tɛmɛ wari hakɛ nin kan, ko n'ale kɔsegira tuma min na, ale bena o sara a ye.»

³⁶Yezu sɔrɔla ka sariya karamɔgɔ nin ɲininga ko: «Benkannikɛlaw ye cɛɛ min mandimi wo, e ka miiri la, mɔgɔ saba nunu na, jumɛn y'o cɛɛ mɔgɔɲɔgɔn ye?»

³⁷A y'a jaabi ko: «A hinɛ donna min na.» Yezu ko a ma: «I fana ka taga o ɲɔgɔn kɛ.»

³⁸ K'u to taama na, Yezu sera dugu dɔ kɔnɔ n'a ka kalandenw ye. U jigira muso dɔ fɛ min tɔgɔ ko Marita.

³⁹Marita dɔgɔmuso tun be yen n'o tɔgɔ ko Mariyamu. Ale tagara sigi Matigi gɛrɛfɛ ka to k'a ka kalan lamɛn.

⁴⁰Gwabaaraw kɛnin tun be ka Marita degun. A nan'a fɔ Yezu ye ko: «Matigi, n dɔgɔmuso be sigi ka ne kelen to baara la, o ka ɲi wa? I t'a fɔ a ye ko a ka wili ka na n dɛmɛ wa?»

⁴¹Nga Matigi y'a jaabi ko: «Marita, Marita, i be boliboli k'i hakili ɲagami koo caaman na gwansan,

⁴²k'a sɔrɔ mɔgɔ mako be fɛɛn kelen dama le la. Mariyamu y'o le ta, mɔgɔ si tena se ka min bɔsi a la.»