Read dyu Luka ka kitabu 11 Bible Online

Luka ka kitabu 11 - dyu bible

Luka ka kitabu 11

¹Loon dɔ, Yezu tun be Ala daalila yɔrɔ dɔ. A tilara tuma min na, a ka kalandenw la kelen y'a fɔ a ye ko: «Matigi, an dege Aladali la i n'a fɔ Zan y'a taw dege cogo min na.»

²A y'a fɔ u ye ko: «N'aw be Ala daali tuma min na, aw k'a fɔ ko: ‹An Faa, i tɔgɔ ka boɲa. I ka masaya ka na.

³An ka makoya dumuni d'an ma loon o loon.

⁴I k'an ka hakɛw yafa an ma, bari an fana be yafa tɔw ma n'u filila anw ma. Kan'a to kɔrɔbɔli ka se an ma.› »

⁵Yezu y'a fɔ u ye tugu ko: «Ni aw dɔ tagar'a tericɛ fɛ dugutilama k'a fɔ a ye ko: ‹N teri, ɲa ne ma ni burukun saba ye,

⁶bari ne tericɛ dɔ bɔra dugu la ka na n fɛ, dumunifɛn foyi te n fɛ k'a d'a ma,›

⁷n'a teri nin tora soo kɔnɔ k'a jaabi ko: ‹Kana n tɔɔrɔ, daa sɔgɔra ka ban, ne ni n deenw lara fana, ne te se ka wili ka buru d'i ma,›

⁸ne b'a fɔ aw ye ko n'a ma wili k'a d'a ma teriya kosɔn, a bena wili k'a makoyafɛn bɛɛ d'a ma, bari a tericɛ b'a sigɛnna.

⁹«Ayiwa, ne b'a fɔ aw ye ko aw k'aw ka makoyafɛn daali Ala fɛ, a bena o d'aw ma. Aw mako be fɛɛn min na, aw k'o ɲini, aw ben'o sɔrɔ. Aw ka daa kɔkɔ, daa bena yɛlɛ aw ye,

¹⁰bari mɔgɔ o mɔgɔ man'a makoyafɛn daali Ala fɛ, Ala ben'a di o tigi ma. Min man'a makoyafɛn ɲini, o tigi b'o sɔrɔ. Daa bena yɛlɛ daa kɔkɔbaga ye.

¹¹Denfa jumɛn be sɔn ka saa di a deen ma, k'a sɔrɔ a ye jigɛ daali a fɛ?

¹²Walima denfa jumɛn be sɔn ka bunteni di a deen ma, k'a sɔrɔ deen ye sisɛfan le daali a fɛ?

¹³Aw minw ka jugu, n'aw be sɔn ka fɛnɲumanw di aw deenw ma, aw Faa min be sankolo la, ale tena Nii Senuman di a daalibagaw ma ka tɛmɛ aw ka fɛɛn ditaw kan wa?»

¹⁴Yezu ye cɛɛ dɔ kɛnɛya jina tun ye min kɛ bobo ye. Jina bɔra cɛɛ la tuma min na, a y'a daminɛ ka kuma fɔɔ jama kabakoyara.

¹⁵ Nga u dɔw y'a fɔ ko: «A be jinaw gwɛn jinaw kuntigi Belezebuli le barika la.»

¹⁶ Dɔw tun b'a fɛ ka Yezu kɔrɔbɔ, o la, u y'a fɔ a ye ko a ka kabako dɔ kɛ min bena kɛ taamasiɲɛ ye k'a yira ko a ka sebagaya be bɔ Ala fɛ.

¹⁷Yezu y'u ka miiriya lɔn minkɛ, a y'a fɔ u ye ko: «Ni jamana min mɔgɔw be ɲɔgɔn kɛlɛ, o jamana nin te se ka ɲa. U ka soow bena ci.

¹⁸O tuma na, ni Sutana y'a yɛrɛ kɛlɛ, a ka masaya bena taga ɲa cogo di? Bari aw b'a fɔra ko jinaw kuntigi Belezebuli le be see dira ne ma ka se ka jinaw gwɛn.

¹⁹Ni ne be jinaw gwɛn Belezebuli barika la, o tuma na, aw ka kalandenw b'u gwɛn jɔn le barika la? Olu yɛrɛ bena kɛ aw jalakibagaw ye.

²⁰Nga ni ne be jinaw gwɛn Ala barika la, o b'a yira ko Ala ka masaya sera aw fɛ.

²¹«Ni maramafɛn be cɛɛ barikaman bolo n'a b'a ka soo kɔlɔsira, a ka soo kɔnɔ fɛɛnw be sutara la.

²²Nga ni cɛɛ wɛrɛ cunna ale kan min fanga ka bon n'a ta ye, o b'a ka maramafɛn bɔsi a la, a jigi lanin tun be min kan. O la, a b'a ka soo kɔnɔ fɛɛnw bɛɛ cɛ k'u di mɔgɔ wɛrɛw ma.

²³ «Mɔgɔ min te ne ɲiin ye, o ye ne jugu le ye. Mɔgɔ min te ne dɛmɛ ka ɲani kɛ, o tigi be cɛnni le kɛ.

²⁴«Ni jina gwɛnna ka bɔ cɛɛ dɔ la, a be taga yaalayaala kongo kɔnɔ, janko ka lafiɲɛyɔrɔ ɲini yen. N'a m'o sɔrɔ, a b'a fɔ ko ale bena segi a bɔyɔrɔkɔrɔ la.

²⁵N'a segira tuma min na, a be taga o yɔrɔ sɔrɔ a labɛnnin lo i n'a fɔ mɔgɔ ye boon furan ka kɛ cogo min na.

²⁶O la, a be taga jina wolonwula wele, minw ka fari n'ale ye. U be na don o tigi la. A cogo bena juguya ka tɛmɛ a ka fɔlɔta kan.»

²⁷Yezu y'o kuma nunu fɔ ka ban minkɛ, muso dɔ y'a kaan kɔrɔta jama cɛma k'a fɔ a ye ko: «Muso min y'i wolo, o dagamunin lo.»

²⁸Nga Yezu y'a jaabi ko: «Mɔgɔ min be Ala ka kuma lamɛn, k'a bato, o le dagamunin lo.»

²⁹ Jama tun be cayara Yezu kɔrɔ minkɛ, a y'a fɔ u ye ko: «Bii mɔgɔw ka jugu. U be kabako le fɛ. Nga kabako si tena kɛ k'a yira u la ni kira Zonasi ta ɲɔgɔn tɛ.

³⁰ Zonasi kɛra taamasiɲɛ ye Ninivukaw fɛ cogo min na, Mɔgɔ Dencɛ fana bena kɛ taamasiɲɛ ye bii mɔgɔw fɛ ten.

³¹ Kiti tigɛlon na, worodugu ɲafan fɛ masamuso bena bii mɔgɔw jalaki, bari a bɔra fɔɔ dugukolo daan na ka na Solomani ka hakilitigiyakumaw lamɛn. Ayiwa, mɔgɔ be yan min hakili ka bon ni Solomani ta ye.

³² Kiti tigɛlon na, Ninivukaw bena bii mɔgɔw jalaki, bari Zonasi ye waajuli min kɛ Ninivu dugu kɔnɔ, Ninivukaw sɔnna o ma. U nimisara ka faran u ka kojuguw la. A filɛ, mɔgɔ be yan min ka bon ni Zonasi ye.

³³ «Mɔgɔ si te fitinɛ mana k'a bila yɔrɔdogonin na, walima gongo jukɔrɔ, nga a b'a bila fɛɛn dɔ kan janko mɔgɔ minw be don soo kɔnɔ, u ka yeli kɛ.

³⁴«Mɔgɔ ɲaa kɛra i n'a fɔ a fari fitinɛ. N'i ɲaa ma cɛn, i be yeli kɛ. Nga n'i ɲaa cɛnna, i te yeli kɛ.

³⁵O la, i ka kɔlɔsili kɛ k'a filɛ, yeelen min b'i la, n'o ma kɛ dibi ye.

³⁶N'i yɔrɔ bɛɛ be yeelen na, ni dibi si te yen, a bena to yeelen na i n'a fɔ fitinɛ be yeelen bɔ cogo min na.»

³⁷Yezu tilara a ka kuma na tuma min na, *Fariziɲɛ dɔ y'a ɲini a fɛ ko a ka taga dumuni kɛ ale ka soo. A tagara se, a sigira dumuni na.

³⁸Fariziɲɛ nin y'a kɔlɔsi minkɛ ko Yezu m'a tigɛ ko ka kɛɲɛ n'u ka landa ye ka sɔrɔ ka sigi dumuni na, o y'a kabakoya.

³⁹Matigi y'a fɔ a ye ko: «Aw Fariziɲɛw kɔni be ten. Aw be jifilenw ni tasaw kɔfɛlaw ko k'u gwɛ, k'a sɔrɔ benkanni ani juguya le fanin be aw kɔnɔ.

⁴⁰Naloman nunu! Ala min ye kɛnɛmala dilan, o tuma na, ale ma kɔnɔna fana dilan wa?

⁴¹Fɛɛn min b'aw ka minanw kɔnɔ, aw y'o di dɛsɛbagatɔw ma, o la, aw ka koo bɛɛ bena saniya.

⁴² «Aw, Fariziɲɛw, bɔnɛ ye aw ta ye, bari aw be jija ka nanaye ni nanfuraburu sifa bɛɛ jaka bɔ. Ala be tilenninya ni kanuya minw fɛ, aw b'olu to yen. Aw tun ka kan ka olu le kɛ ka dɔ nunu fara o kan.

⁴³«Aw, Fariziɲɛw, bɔnɛ ye aw ta ye, bari aw be sigiyɔrɔɲumanw le fɛ kalansow kɔnɔ, aw b'a fɛ mɔgɔw k'aw fo forobayɔrɔw la.

⁴⁴Bɔnɛ ye aw ta ye, bari aw kɛra i n'a fɔ kaburuw, minw te ye, mɔgɔw be taama u kan n'u t'a kala ma.»

⁴⁵O la, sariya karamɔgɔ dɔ y'a fɔ Yezu ye ko: «Karamɔgɔ, n'i kumana ten, i be don anw fana gasi la.»

⁴⁶A y'a jaabi ko: «Bɔnɛ ye aw sariya karamɔgɔw fana ta ye, bari aw be mɔgɔw bila doni gwiliman ɲun na, k'a sɔrɔ aw t'u dɛmɛ hali dɔɔni yɛrɛ a ɲunni na.

⁴⁷Aw faaw ye kira minw faga, aw minw be u ka kaburuw lalaga k'u lɔ sisan, bɔnɛ ye aw ta ye.

⁴⁸Aw b'a yira ten ko aw faaw tun ye min kɛ, k'o bɛnna aw ma, bari, olu ye kiraw faga, aw be u ka kaburuw lɔ.

⁴⁹O le y'a to Ala tun y'a fɔ a ka lɔnniya la ko ale bena kiraw ni cidenw ci aw ma. Ko aw bena u dɔw faga, k'u dɔw bila tɔɔrɔ la.

⁵⁰O seen fɛ, bii mɔgɔw bena kiti kiraw joli bɔnninw kama, joli min bɔnna kabini diɲɛ daminɛtuma na,

⁵¹ k'a ta Abɛli joli bɔnnin ma fɔɔ ka na se Zakari ta ma, u ye min faga Alabatosoba yɔrɔ senuman ni sarakabɔyɔrɔ cɛ. Tiɲɛ na, n b'a fɔ aw ye ko bii mɔgɔw bena ɲininga o bɛɛ la.

⁵²«Aw sariya karamɔgɔw, bɔnɛ ye aw ta ye, bari aw b'aw yɛrɛ jati tiɲɛ lɔnbagaw ye k'a sɔrɔ aw t'a lɔn. Minw b'a fɛ ka tiɲɛ lɔn, aw t'a to olu fana k'a lɔn.»

⁵³Yezu bɔra o yɔrɔ la tuma min na, sariya karamɔgɔw ni Fariziɲɛw dimina a kɔrɔ kosɔbɛ. U tun b'a ɲinina ni dabari sifa bɛɛ ye. O la, u tun b'a ɲininga koo caaman na,

⁵⁴janko n'a ka jaabili ma ɲa, u k'a sɔrɔ.