Read dyu Luka ka kitabu 13 Bible Online

Luka ka kitabu 13 - dyu bible

Luka ka kitabu 13

¹O waati la, Pilati tun ye Galileka dɔw nii bɔ k'u to begɛnw faga la Ala ye. Mɔgɔ dɔw nana o lakali Yezu ye.

²Yezu y'a fɔ u ye ko: «Aw be miiri k'o Galileka nunu sara ten bari u tun be hakɛ kɛ ka tɛmɛ Galileka tɔw bɛɛ kan wa?

³Ne b'a fɔ aw ye ko tiɲɛ tɛ. Ni aw ma nimisa ka faran aw ka kojuguw la, aw bɛɛ bena halaki fana.

⁴Silowe ciin sangaso benna mɔgɔ tan ni seegi minw kan k'u faga, aw be miiri k'olu tun ye kojugukɛlaw ye ka tɛmɛ Zeruzalɛmuka tɔw bɛɛ kan wa?

⁵Ne b'a fɔ aw ye ko tiɲɛ tɛ. Ni aw ma nimisa ka faran aw ka kojuguw la, aw bɛɛ bena halaki fana.»

⁶O kɔ, Yezu ye talen nin la u ye ko: «Torosun tun be cɛɛ dɔ fɛ a ka foro la. Loon dɔ, a tagara toro ɲini a kan, nga a ma foyi sɔrɔ.

⁷O loon nin na, a y'a fɔ a ka baaraden ye ko: ‹Ne saan saba filɛ nin ye, ne be na toro ɲini torosun nin na, ne te foyi sɔrɔ a la. A tigɛ. Kuun t'a la a ka to foro kɔnɔ gwansan.›

⁸Nga baaraden y'a jaabi ko: ‹A to ɲinan tugu. Ne bena dingɛ sogi k'a lamini ka nɔgɔ kɛ a kɔrɔ.

⁹Ni o kɛra, n'a sɔrɔ a bena deen kɛ saan wɛrɛ. N'a ma deen kɛ, i ben'a tigɛ.› »

¹⁰Lafiɲɛlon dɔ la, Yezu tun be mɔgɔw kalanna kalanso dɔ kɔnɔ.

¹¹Muso dɔ tun be o yɔrɔ la, jinabana tun b'a la kabini saan tan ni seegi. Bana nin tun y'a kɔɔ kuru, a tun te se ka tilen ka lɔ.

¹²Yezu y'a ye tuma min na, a y'a wele k'a fɔ a ye ko: «Muso, i kɛnɛyatɔ filɛ nin ye.»

¹³A y'a bolo la muso kan. O yɔrɔnin bɛɛ, a kɔɔ tilenna, a y'a daminɛ ka Ala tanu.

¹⁴ Nga kalanso kuntigi dimina bari Yezu ye mɔgɔ kɛnɛya lafiɲɛlon na. A ye kuma ta k'a fɔ jama ye ko: «An ka kan ka baara kɛ tile wɔɔrɔ kɔnɔ. Aw ka na o loonw na, a k'aw kɛnɛya. Aw kana na lafiɲɛlon na.»

¹⁵Matigi y'a fɔ ko: «Aw ye filakanfɔlaw le ye! Lafiɲɛlon na, aw kelen kelen bɛɛ te aw ka misi, walima aw ka fali foni ka taga u sɔn jii la wa?

¹⁶Muso nin min buruju bɔra Ibrayima na, ni Sutana tun y'a siri ni bana ye kabini saan tan ni seegi, a tun ma daga k'o muso kɛnɛya lafiɲɛlon na wa?»

¹⁷Yezu ye kuma nin fɔ tuma min na, a juguw bɛɛ maloyara. Jama bɛɛ nisɔn tun ka di Yezu ka kabako kɛninw kosɔn.

¹⁸Yezu y'a fɔ tugu ko: «Ala ka masaya bɔnin be mun fɛ? Ne ben'a kɛɲɛ ni mun ye?

¹⁹A be i ko mutaridikisɛ, cɛɛ dɔ ye min ta k'a dan a ka nankɔ la. A falenna ka boɲa ka kɛ yiri ye. Kɔnɔw b'u ka ɲagaw la a bolow kan.»

²⁰Yezu tagara ɲa ni kuma ye k'a fɔ ko: «Ne bena Ala ka masaya ni mun kɛɲɛ tugu?

²¹A be i ko burufununan muso dɔ ye min ta k'a kɛ mugu fiyɛ ɲaa kelen na k'a nɔɔni, k'a bila fɔɔ a bɛɛ fununa.»

²²Yezu taatɔ Zeruzalɛmu, a tun be duguba ni dugudenninw cɛɛ tigɛ, an'a be mɔgɔw kalanna.

²³Mɔgɔ dɔ y'a ɲininga ko: «Matigi, mɔgɔ caaman tena kisi wa?» A y'a jaabi ko:

²⁴«Aw ye jija ka don ni dafitini ye bari ne b'a fɔ aw ye ko mɔgɔ caaman bena cogo ɲini ka don, nga u tena se.

²⁵«Ni sotigi wilila ka daa sɔgɔ tuma min na k'aw to kɛnɛma, aw ben'a daminɛ ka daa kɔkɔ k'a fɔ ko: ‹Matigi, daa yɛlɛ an ye.› A bena aw jaabi ko a t'aw bɔyɔrɔ lɔn.

²⁶«O tuma na, aw ben'a fɔ a ye ko aw ye dumuni kɛ n'a ye, ko a y'aw kalan aw ka dugu forobayɔrɔw la.

²⁷ A ben'a fɔ aw ye tugu ko ale t'aw bɔyɔrɔ lɔn, ko aw kojugukɛlaw bɛɛ ka bɔ n kɔrɔ.

²⁸ «O yɔrɔ la, n'aw ye Ibrayima, ni Isiyaka, ani Yakuba ani kiraw bɛɛ ye Ala ka masaya la tuma min na, k'a sɔrɔ aw tonin be kɛnɛma, o tuma na, aw bena kasi ka kule.

²⁹Mɔgɔ dɔw bena na ka bɔ kɔrɔn, ni tileben, ani kɔgɔdugu ɲafan, ni worodugu fɛ. U bena sigi dumuni na Ala ka masaya la.

³⁰ «O tuma na, kɔmɔgɔ dɔw bena kɛ ɲamɔgɔw ye, ɲamɔgɔ dɔw bena kɛ kɔmɔgɔw ye.»

³¹O tuma na, *Fariziɲɛ dɔw gwɛrɛla Yezu la k'a fɔ a ye ko: «Taga yɔrɔ wɛrɛ ka yan bila, bari *Erɔdi b'a fɛ k'i faga.»

³²Yezu y'u jaabi ko: «Aw ka taga fɔ o namaramɔgɔ nin ye ko ne be jinaw gwɛn ka bɔ mɔgɔw la, ka banabagatɔw kɛnɛya bii ni sini, ani a tile sabanan loon, ne bena tila n ka baara la.

³³Nga wajibi lo ne ka taga ni n ka sira ye bii ni sini ani sinikɛnɛ, bari a bɛnnin te kira ka faga yɔrɔ wɛrɛ Zeruzalɛmu kɔ.

³⁴«Zeruzalɛmukaw, Zeruzalɛmukaw, aw minw be kiraw faga, ka Ala ka cidenw bon ni kabakuruw ye k'u faga, siɲɛ joli ne tun b'a fɛ k'aw lajɛn n kɔrɔ i n'a fɔ sisɛ b'a deenw lajɛn a gaman kɔrɔ cogo min na, nga aw ma sɔn!

³⁵ Ayiwa, aw ka boon lakolon bena to. Ne b'a fɔ aw ye ko aw tena ne ye tugu fɔɔ loon min na aw ben'a fɔ ko: ‹Mɔgɔ min be nana Matigi tɔgɔ la, Ala ka barika don a la.› »