Read dyu Luka ka kitabu 17 Bible Online

Luka ka kitabu 17 - dyu bible

Luka ka kitabu 17

¹Yezu y'a fɔ a ka kalandenw ye ko: «Wajibi lo sababu bena sɔrɔ min b'a to mɔgɔw kunna be cɛn, nga mɔgɔ min bena kɛ o sababu nin ye, bɔnɛ be o tigi ye.

²Ni mɔgɔ dɔ kɛra sababu ye ka denmisɛn nunu dɔ kunna cɛn, yanni a tigi k'o kɛ, ni kabakuru belebeleba tun sirila a kaan na k'a fili kɔgɔji kɔnɔ, o tun ka fisa a ma.

³ Aw k'aw yɛrɛw kɔlɔsi o koow la. «N'i balima y'i hakɛ ta, i k'a ka filiyɔrɔ fɔ a ye. N'a nimisara, yafa a ma.

⁴N'a y'i hakɛ ta siɲɛ wolonwula tile kelen kɔnɔ, n'a segira i fɛ a siɲɛ wolonwula bɛɛ la ko i ka yafa ale ma, i ka yafa a ma.»

⁵Cidenw y'a fɔ Matigi ye ko: «Matigi, dɔ fara an ka lanaya kan.»

⁶A y'a fɔ u ye ko: «N'aw tun be la ne la dɔɔni dɔrɔn, hali n'o lanaya boɲa tun be mutaridikisɛ bɔ, aw tun bena se k'a fɔ yiriba nin ye ko a ka bɔn ka bɔ yan ka taga yɛrɛ tutu kɔgɔji la. A tun bena sɔn aw ta ma.

⁷«Ni baaraden b'aw dɔ fɛ, n'a be sɛnɛ kɛ, walima n'a be begɛnw le kɔlɔsi, n'a segira ka bɔ kongo la tuma min na, a tigi ben'a fɔ a ye ko a ka teliya ka na aw be dumuni kɛ wa?

⁸Ayi. A ben'a fɔ o baaraden ye ko a k'a cɛɛ siri ka dumuni labɛn k'a d'a ma. Ko ni ale tilara dumuni na tuma min na, o kɔ a fana be sɔrɔ ka dumuni kɛ ka minni kɛ.

⁹Yala a bena barika la o baaraden ye bari a y'a ka baara kɛta kɛ wa? N ma la o la.

¹⁰O cogo la, baara min kalifara aw fana ma, n'aw y'o dama kɛ, aw k'a fɔ aw yɛrɛ ye ko aw te foyi ɲa.»

¹¹Yezu tun be tagara Zeruzalɛmu, a ye Galile ni Samari mara cɛɛ tigɛ.

¹²A tun be ɲini ka don dugu dɔ kɔnɔ, farisogobanatigi mɔgɔ tan tagar'a kunbɛn. U lɔra yɔrɔjan ka furancɛ dɔɔni to u ni Yezu cɛ. U y'u kaan kɔrɔta k'a fɔ ko:

¹³«Karamɔgɔ Yezu, makari an na.»

¹⁴ Yezu y'u ye, a y'a fɔ u ye k'u ka taga u yɛrɛw yira sarakalasebagaw la. K'u to o sira kan, u bɛɛ kɛnɛyara.

¹⁵U dɔ y'a ye ko a kɛnɛyara minkɛ, a segitɔ ka taga Yezu fɛ, a tora ka Ala tanu kosɔbɛ.

¹⁶A sera Yezu fɛ, a y'a kunbiri gwan a kɔrɔ k'a ɲaa biri duguma ka barika la a ye, k'a sɔrɔ o cɛɛ tun ye Samarika ye.

¹⁷O tuma na, Yezu y'a fɔ ko: «Mɔgɔ tan bɛɛ ma kɛnɛya wa? U tɔɔ kɔnɔntɔn nunu be min?

¹⁸U si ma kɔsegi ka na Ala tanu ni lonancɛ nin kelen tɛ!»

¹⁹O kɔ, a y'a fɔ cɛɛ nin ye ko: «I kisira i ka lanaya barika la. Wili ka taga.»

²⁰*Fariziɲɛw ye Yezu ɲininga ko Ala ka masaya bena na tuma jumɛn. A y'u jaabi ko: «O tena kɛ i n'a fɔ mɔgɔw ta be ye cogo min na.

²¹U ten'a fɔ fana ko: ‹A filɛ yan› walima: ‹A filɛ yen fɛ›, bari Ala sigira a ka masaya la aw cɛma ka ban.»

²²O kɔ, a y'a fɔ kalandenw ye ko: «Loon dɔ bena se, a bena diya aw ye ka Mɔgɔ Dencɛ ye, nga aw ten'a ye.

²³«Mɔgɔw ben'a fɔ aw ye ko: ‹A be yan,› walima: ‹A be yen fɛ.› Aw kana tugu u kɔ dɛ!

²⁴Saan be manamana ka kɛnɛ bɔ sankolo faan kelen na ka ye a faan dɔ la cogo min na, Mɔgɔ Dencɛ fana bena kɛ ten a nalon na.

²⁵Nga sanni o loon ka se, wajibi lo a ka tɔɔrɔ kosɔbɛ ani bii mɔgɔw ka ban a la.

²⁶ «Koo min tun kɛra Nuhun ka tile la, o ɲɔgɔn bena kɛ fana Mɔgɔ Dencɛ natuma na.

²⁷ Mɔgɔw tun be dumunibabaw kɛ ka minni kɛ, ani ka furu fɔɔ ka taga se Nuhun donlon ma kurunba kɔnɔ. O tuma na, sanjiba nana k'u bɛɛ halaki.

²⁸ A bena kɛ o cogo kelen na i n'a fɔ Lɔti ka waati la. Mɔgɔw tun be dumunibabaw kɛ, ka minni kɛ, ka sanni ni feereli kɛ, ka sɛnɛ kɛ, ka soow lɔ.

²⁹Nga Lɔti bɔra Sodɔmu dugu kɔnɔ loon min na, Ala y'u bɛɛ halaki ni tasuma ni kiribi ye ka bɔ sankolo la.

³⁰Mɔgɔ Dencɛ bena segi loon min na, a bena kɛ ten fana.

³¹ «O loon na, n'o kɛra ka mɔgɔ min sɔrɔ a ka boon kunna, n'a ka minanw be soo kɔnɔ, a kana jigi k'u ta. N'o y'a sɔrɔ ni min be foro la, o tigi kana kɔsegi tugu.

³² Koo min kɛra Lɔti ka muso la, aw k'aw hakili jigi o la.

³³ Mɔgɔ min b'a fɛ k'a nii kisi, o tigi bena bɔnɔ a la. Nga ni min bɔnɔna a nii la, o tigi ben'a nii kisi.

³⁴Ne b'a fɔ aw ye k'o loon sufɛ, ni mɔgɔ fila be dilan kelen kan, u bena kelen ta ka kelen to yen.

³⁵Muso fila bena to sinni na yɔrɔ kelen, u bena kelen ta ka kelen to yen. [

³⁶Cɛɛ fila bena sɔrɔ foro kelen kɔnɔ, u bena kelen ta ka kelen to yen.]»

³⁷Kalandenw y'a ɲininga ko: «O bena kɛ yɔrɔ jumɛn, Matigi?» A y'u jaabi ko: «Ni fɛnsu be yɔrɔ min na, dugaw be lajɛn o yɔrɔ le la.»