Read dyu Luka ka kitabu 19 Bible Online

Luka ka kitabu 19 - dyu bible

Luka ka kitabu 19

¹Yezu sera Zeriko. A tun be dugu cɛtigɛra tuma min na,

²lɛnpominɛlaw ka kuntigi dɔ tun be yen, a tɔgɔ ko Zase. Nafolobatigi tun lo.

³A tun b'a fɛ k'a ɲaa la Yezu kan k'a lɔn, nga a tun te se k'a ye jama kosɔn, bari ale Zase tun ka surun.

⁴A dɛsɛra ka boli ka taga yɛlɛ torosun dɔ kan ɲafɛ waasa a ka se ka Yezu ye, bari a tun ka kan ka tɛmɛ yen.

⁵Yezu sera o yɔrɔ la tuma min na, a y'a ɲaa kɔrɔta k'a fɔ a ye ko: «Zase, jigi joona joona. Wajibi lo ne ka jigi i ka soo bii.»

⁶Zase jigira joona joona ka taga n'a ye a ka soo ni nisɔndiya ye.

⁷Mɔgɔ minw bɛɛ ye u taatɔ ye, u tun be ŋunuŋunu ko: «Cɛɛ nin be tagara jigi hakɛkɛla fɛ.»

⁸Nga Zase y'a fɔ Matigi ye ko: «Matigi, sisan ne bena n ka nafolo tilancɛ di fantanw ma, ni ne ye mɔgɔ min namara, ne bena o ɲɔgɔn naani segi a tigi ma.»

⁹O la, Yezu ko: «Kisili sera soo nin kɔnɔ bii, bari ale fana ye Ibrayima ka deen dɔ ye.

¹⁰ Mɔgɔ Dencɛ nana ka mɔgɔ tununinw lo yaala k'u kisi.»

¹¹Mɔgɔ minw tun be Yezu lamɛnna, olu kɔni tun be miirila ko Ala ka masaya tun bena yira o waati yɛrɛ la. O y'a sɔrɔ, a tun surunyana Zeruzalɛmu na, o la, Yezu ye talen la u ye

¹²ko: «Masacɛ dɔ ka deen tagara jamanajan dɔ la masacɛw bɛɛ kuntigi fɛ k'a fɔ a ye ko n'a ye sira di, ale b'a fɛ ka sigi a facɛ nɔɔ na masaya la. N'a ye sira sɔrɔ o yɔrɔ la, a be kɔsegi a yɛrɛ ka dugu la ka sigi masaya la.

¹³Sanni a ka taga, a y'a ka baaradenw mɔgɔ tan wele ka sanukuru kelen kelen di u kelen kelen bɛɛ ma k'a fɔ u ye k'u ka jago kɛ n'o ye fɔɔ ale ka taga ka na.

¹⁴Nga a koo tun man di a ka jamana mɔgɔw ye. A taanin kɔ, olu ye mɔgɔw bila ka taga fɔ masacɛba ye k'olu t'a fɛ cɛɛ nin be kɛ u ka masa ye.

¹⁵«O n'a ta bɛɛ, masacɛba sɔnna ko a ka kɛ masacɛ ye. O kɔ, a segira ka ta'a ka jamana na. A tun ye sanukuru di a ka baaraden minw ma, a ye mɔgɔ bila ka taga olu wele. U ye tɔnɔ minw sɔrɔ, a tun b'a fɛ k'o lɔn.

¹⁶Baaraden min kɔnna ka na, ale y'a fɔ masacɛ ye ko: ‹I ye sanukuru min di ne ma, ne y'a ɲɔgɔn tan sɔrɔ tɔnɔ ye.›

¹⁷Masacɛ y'a fɔ a ye ko: ‹O ɲana, i ye baaradenɲuman ye. I kɛra mɔgɔsɔbɛ ye kofitini na minkɛ, n b'i sigi dugu tan kunna.›

¹⁸Baaraden min tugura, ale y'a fɔ masacɛ ye ko: ‹I ye sanukuru min di ne ma, ne ye a ɲɔgɔn duuru sɔrɔ tɔnɔ ye.›

¹⁹Masacɛ y'a fɔ o fana ye ko: ‹N b'i sigi dugu duuru kunna.›

²⁰«Dɔ wɛrɛ nana k'a fɔ masacɛ ye ko: ‹I ye sanukuru min di ne ma, o filɛ nin ye. Ne tun y'a don kɔɔrimugu la k'a mara ka ɲa.

²¹Ne tun be siran i ɲa bari i ka koo ka gwɛlɛ. I ma fɛɛn min kalifa mɔgɔ ma, i b'o le koo ɲininga a tigi fɛ. I ma danni kɛ foro min na, i b'o yɔrɔ lo suman tigɛ.›

²²Masacɛ y'a fɔ a ye ko: ‹Baaradenjugu, ne bena i kiti ka kɛɲɛ n'i yɛrɛ ka kuma ye. I tun y'a lɔn ko ne ka koo ka gwɛlɛ, ko ne ma fɛɛn min kalifa, ko n b'o lo koo ɲininga, ko ne ma danni kɛ foro min na, ko n b'a fɛ o suman be kɛ n ta ye.

²³Mun na i ma ne ka sanu kalifa warimaralaw ma? N'i tun y'o kɛ, ne tun bena segi ka na n ka sanu n'a tɔnɔ sɔrɔ.›

²⁴«O kɔ, minw tun be yen, masacɛ y'a fɔ olu ye k'u ka sanukuru nin bɔsi a la, k'a di tantigi ma.

²⁵U y'a fɔ masacɛ ye ko: ‹O sanukuru nin ɲɔgɔn tan b'ale bolo ka ban!›

²⁶ Masacɛ y'u jaabi ko: ‹Ne b'a fɔ aw ye ko fɛɛn be mɔgɔ min fɛ, dɔ bena d'o tigi ma ka fara a ta kan, nga fɛɛn te min fɛ, hali dɔɔni min b'a fɛ, o bena bɔsi a la.

²⁷Sisan, ne jugu minw tun t'a fɛ ne ka kɛ u ka masacɛ ye, aw ka na ni olu ye yan k'u faga ne ɲana.› »

²⁸Yezu kumana ten ka ban tuma min na, a tɛmɛna u ɲa, u ye sira minɛ ka taga Zeruzalɛmu.

²⁹Yezu n'a kɔfɛmɔgɔw surunyana Bɛtifaze ni Betani la Olivuyirikulu gɛrɛfɛ. A ye kalandenw fila ci

³⁰k'a fɔ u ye ko: «Aw ye taga ɲafɛ dugu nin na. Aw dontɔ, aw bena faliden dɔ sirinin ye, mɔgɔ si ma deli ka yɛlɛ min kan fɔlɔ. Aw k'a foni ka na n'a ye.

³¹Ni mɔgɔ dɔ y'aw ɲininga ko mun na aw b'a foni, aw k'o tigi jaabi ko Matigi mako le b'a la.»

³²Ciden nunu tagara faliden sɔrɔ i ko Yezu tun y'a fɔ u ye cogo min na.

³³U k'u b'a foni, falitigiw y'u ɲininga ko: «Mun na aw be faliden nin fonina?»

³⁴U y'u jaabi ko Matigi mako le b'a la.

³⁵O kɔ, u tagara ni faliden ye Yezu fɛ. U y'u ka faniw la a kɔɔ la, Yezu ka sɔrɔ ka yɛlɛ a kan.

³⁶Yezu taatɔ, mɔgɔw tun b'u ka faniw lala sira kan k'a boɲa.

³⁷K'u to kulu nin kan, u surunyana a jigijigi la tuma min na, a ka kalandenw bɛɛ lajɛnnin nisɔn diyara k'a daminɛ ka Ala tanu kosɔbɛ a ka kabako kɛninw bɛɛ kosɔn.

³⁸ U tun b'a fɔ ko: «Masacɛ min be nana Matigi tɔgɔ la, Ala ka barika don o la. Hɛrɛ ka kɛ sankolo la, tanuli ka kɛ Ala ye fɔɔ ka se sankolo la!»

³⁹*Fariziɲɛ dɔw tora jama cɛma k'a fɔ Yezu ye ko: «Karamɔgɔ, a fɔ i ka kalandenw ye k'u ka mankan dabila.»

⁴⁰Yezu y'u jaabi ko: «Ne b'a fɔ aw ye ko hali n'u jera, kabakuruw bena mankan kɛ.»

⁴¹Yezu surunyana ka Zeruzalɛmu ye tuma min na, a kasira.

⁴²A y'a fɔ ko: «Zeruzalɛmukaw, koo min be se ka hɛrɛ d'aw ma, n'aw tun b'o lɔn bii yɛrɛ, o tun bena ɲa. Nga, aw te foyi lɔnna o la.

⁴³Loon dɔ bena se, aw juguw bena dogoyɔrɔw lalaga k'aw lamini, k'aw dɛrɛ faan bɛɛ la.

⁴⁴U bena aw ka dugu n'aw yɛrɛ bɛɛ halaki, u bena boonw bɛɛ ci. O koow bɛɛ bena aw sɔrɔ, bari Ala tun b'a fɛ k'aw dɛmɛ waati min na, aw ma sɔn.»

⁴⁵Yezu tagara don Alabatosoba kɔnɔ, a y'a daminɛ ka jagokɛlaw gwɛn ka bɔ yen.

⁴⁶ A ko u ma: «A fɔra Ala ka kuma na ko: ‹Ne ka soo bena kɛ daalilikɛyɔrɔ ye.› Nga, aw kɔni y'a kɛ soonw ka yɔrɔ ye.»

⁴⁷ Yezu tun be mɔgɔw kalan loon o loon Alabatosoba kɔnɔ. Sarakalasebagaw ni sariya karamɔgɔw ani zuwifuw ka mɔgɔbabaw tun b'a fagacogo ɲinina.

⁴⁸Nga, u tun ben'a kɛ cogo min na, u m'o lɔn, bari a dalakan tun ka di jama bɛɛ ye.