Read dyu Luka ka kitabu 21 Bible Online

Luka ka kitabu 21 - dyu bible

Luka ka kitabu 21

¹Ka Yezu to Alabatosoba kɔnɔ, a ye nafolotigiw ye n'u be wari donna Alabatosoba kɛsu kɔnɔ.

²A ye firiyamuso dɛsɛbagatɔ dɔ fana ye n'a be tama fila donna yen.

³O tuma na, Yezu y'a fɔ ko: «Tiɲɛ na, ne b'a fɔ aw ye ko firiyamuso dɛsɛbagatɔ nin ye wari min don kɛsu kɔnɔ, o ka ca ni tɔw bɛɛ ta ye,

⁴bari olu mako te se u ka nafolo min ma, u ye dɔ bɔ o le la k'o don, nga ale kɔni n'a ka fantanya bɛɛ, min tun b'a kun ka kɛ dumunisɔngɔ ye, a y'o bɛɛ don.»

⁵O kɔ, mɔgɔ dɔw tun be kumana Alabatosoba koo la, ko a lɔra ni dakamana kabakuruw ye, ko a masirinin be ni fɛnɲumanw ye, mɔgɔw tun ye minw di ka Ala boɲa n'o ye. O la, Yezu ko:

⁶«Aw ɲaa be fɛɛn min na, loon dɔ bena se, o kabakuru si tena to a tɔɲɔgɔn kan, u bɛɛ bena walaka.»

⁷U ye Yezu ɲininga ko: «Karamɔgɔ, koo nunu bena kɛ tuma jumɛn? Taamasiɲɛ jumɛn ben'a yira k'o bena kɛ?»

⁸Yezu y'u jaabi ko: «Aw k'aw yɛrɛ kɔlɔsi janko mɔgɔ si kana aw fili. Bari caaman bena na ne tɔgɔ la k'a fɔ k'olu ye ne yɛrɛ ye, ko diɲɛ laban tuma surunyana. Aw kana tugu u kɔ.

⁹N'aw ye kɛlɛw ni jama murutiko mɛn tuma min na, aw kana siran. Wajibi lo o koow ka kɛ fɔlɔ, nga o tena kɛ diɲɛ laban ye o yɔrɔnin kelen.»

¹⁰O kɔ, a y'a fɔ u ye ko: «Siya dɔ bena wili siya dɔ wɛrɛ kama. Jamana dɔ bena wili jamana dɔ wɛrɛ kama.

¹¹Dugukolo bena yɛrɛyɛrɛ kosɔbɛ yɔrɔ dɔw la. Fɔɲɔbanaw ni kɔngɔ bena don yɔrɔ dɔw la fana. Jatigɛkow ni taamasiɲɛbabaw bena ye sankolo la.

¹²«Nga sanni o koow bɛɛ ka kɛ, mɔgɔw bena aw minɛ k'aw tɔɔrɔ kosɔbɛ. U bena aw don kalanso kuntigiw bolo k'aw don kaso la. U bena taga n'aw ye masacɛw ni jamanatigiw fɛ ne kosɔn.

¹³O bena kɛ sababu ye, aw be ne koo fɔ u ye.

¹⁴ Aw k'aw hakili to a la ko aw man kan ka jɔɔrɔ aw ka fɔta la u ɲakɔrɔ,

¹⁵bari ne yɛrɛ bena hakilitigiya kuma don aw daa la fɔɔ aw jugu si tena se k'aw sɔsɔ, walima k'aw ka kuma kɔɔ kari.

¹⁶Hali aw wolobagaw, n'aw badenw, n'aw balimaw, an'aw teriw yɛrɛ, olu bena aw don aw juguw bolo k'aw dɔw faga.

¹⁷Mɔgɔ bɛɛ bena aw kɔniya ne tɔgɔ kosɔn.

¹⁸Nga hali aw kunsigiden kelen tena tunu.

¹⁹Aw ka muɲuli ben'a to aw bena hɛrɛ sɔrɔ Ala fɛ sini.

²⁰«N'aw y'a ye ko Zeruzalɛmukaw juguw ka kɛlɛbolo ye dugu lamini tuma min na, aw k'a lɔn ko a halakituma sera.

²¹O tuma na, mɔgɔ minw be Zude mara la, olu ka boli ka taga kuluyɔrɔw la. N'o ye minw sɔrɔ Zeruzalɛmu kɔnɔ, olu ka boli ka bɔ. Minw be kongo kɔnɔ, u kan'a fɔ k'u bena u yɛrɛ sutara Zeruzalɛmu kɔnɔ,

²² bari a waati bena kɛ kojuguw juru sarawaati ye. Kiraw tun ye min fɔ, o bɛɛ bena kɛ, hali foyi ten'o jɛn.

²³O waati la, musokɔnɔmanw ani minw deen be siin min, olu bena tɔɔrɔ kosɔbɛ, o tɔɔrɔ nin bena se Isirayɛli jamana mɔgɔw ma, bari Ala ben'a yira u la ko a dimina u kɔrɔ.

²⁴U bena dɔw faga ni murujanjan ye, ka dɔw minɛ ka taga u kɛ jɔɔnw ye siya wɛrɛw cɛma. Siya minw te siran Ala ɲa, olu bena Zeruzalɛmu halaki pewu fɔɔ sarati min tun dira u ma, o ka dafa.

²⁵ «Tile, ni kalo, ani lolow bena kɛ cogo dɔ la. Kɔgɔji bena mankanba kɛ, siyaw kɔnɔ bena gwan, u dabari bena ban.

²⁶Mɔgɔ caaman bena sa jatigɛkojugu bolo, kabako miiri kosɔn minw be nana kɛ dugukolo kan. Sankolofɛnw bena ɲagami ɲɔgɔn na.

²⁷ O tuma na, mɔgɔw bena Mɔgɔ Dencɛ natɔ ye sankabaw cɛma ni sebagaya ni nɔɔrɔ ye.

²⁸N'o koow daminɛna ka kɛ tuma min na, aw ka dɔ fara aw jigi n'aw ka jagwɛlɛya kan, bari aw hɔrɔnyali waati sera.»

²⁹O kɔ, Yezu ye talen dɔ la u ye ko: «Aw ka torosun ni yiri tɔw bɛɛ filɛ.

³⁰N'aw y'a ye u bolow daminɛna ka nugu tuma min na, aw b'a lɔn ko samiɲa surunyana.

³¹O cogo kelen la, aw mana o koow kɛtɔ ye tuma min na, aw k'a lɔn ko Ala ka masaya waati surunyana.

³²«Tiɲɛ na, ne b'a fɔ aw ye ko bii mɔgɔw bɛɛ tena sa ni o koow bɛɛ ma kɛ.

³³Sankolo ni dugukolo bena tɛmɛ, nga ne ka kuma tena tɛmɛ.

³⁴«Aw k'aw yɛrɛw kɔlɔsi, aw kan'a to nugubagatɔya, ni dɔrɔtɔya, ani diɲɛ hamikow k'aw hakili ɲagami, n'o tɛ, laban loon bena bari aw la,

³⁵bari o loon bena cun diɲɛ mɔgɔw bɛɛ kan i n'a fɔ jɔɔ be fɛɛn minɛ cogo min na.

³⁶Aw ye jija ka Ala daali tuma bɛɛ, ka kɛ mɔgɔ timinadiyaninw ye, waasa aw ka se ka kisi o koo nataw bɛɛ ma, ani aw ka se ka lɔ Mɔgɔ Dencɛ ɲakɔrɔ.»

³⁷Loon o loon tile kɔnɔ, Yezu tun be mɔgɔw kalan Alabatosoba kɔnɔ. Ni suu kora, a tun be bɔ ka taga si Olivuyirikulu yɔrɔ la.

³⁸Sɔgɔmada joona, mɔgɔ bɛɛ tun be taga sɛgɛrɛ Alabatosoba kɔnɔ k'a lamɛn.