Read dyu Luka ka kitabu 22 Bible Online

Luka ka kitabu 22 - dyu bible

Luka ka kitabu 22

¹*Buru funubali ɲanagwɛ, min tɔgɔ ko *Hɔrɔnya ɲanagwɛ fana, o tun surunyana.

²Sarakalasebagaw kuntigiw ni sariya karamɔgɔw bena se ka Yezu faga cogo min na ni jama ma bɔ a kala ma, u tun b'o cogo ɲinina bari u tun be siran ko jama bena muruti.

³O tuma na, Zuda min be wele Isikariyɔti n'o ye kalanden tan ni fila nunu dɔ ye, Sutana y'a daminɛ k'o hakili yɛlɛma.

⁴A tagar'a fɔ sarakalasebagaw kuntigi ni Alabatosoba kɔlɔsibagaw kuntigiw ye ko cogo b'ale fɛ ka Yezu don u bolo.

⁵O diyara u ye kosɔbɛ. U bɛnn'a la k'u bena wari hakɛ dɔ d'a ma.

⁶Zuda sɔnna. A y'a daminɛ ka cogoɲuman ɲini waasa k'a don u bolo ni jama ma bɔ a kala ma.

⁷*Buru funubali ɲanagwɛ loon nana se. Sagaden tun ka kan ka faga o loon ka kɛ *Hɔrɔnya ɲanagwɛ saraka ye.

⁸Yezu y'a fɔ Piyɛri ni Zan ye k'u ka taga Hɔrɔnya ɲanagwɛ dumuni labɛn u ye.

⁹U y'a ɲininga ko: «I b'a fɛ an k'o labɛn yɔrɔ jumɛn?»

¹⁰A y'u jaabi ko: «Aw dontɔ dugu kɔnɔ, aw ni cɛɛ dɔ bena ɲɔgɔn kunbɛn, duun fanin be jii la a kunna. Aw ka tugu o cɛɛ nin kɔ. N'a donna luu min kɔnɔ, aw ye don yen,

¹¹k'a fɔ o lutigi ye ko karamɔgɔ ko a n'a ka kalandenw bena Hɔrɔnya ɲanagwɛ dumuni kɛ boon min kɔnɔ, k'o be min.

¹²A bena bonba dɔ yira aw la sangaso la. An mako bena se fɛɛn minw ma, o bɛɛ b'a kɔnɔ. Aw ka ɲanagwɛ dumuni nin labɛn o yɔrɔ la.»

¹³Piyɛri ni Zan tagara. Yezu tun y'a fɔ u ye cogo min na, a kɛra ten fana. U ye Hɔrɔnya ɲanagwɛ dumuni labɛn yen.

¹⁴Dumuni kɛtuma sera minkɛ, Yezu n'a ka ciden tan ni fila sigira dumuni na.

¹⁵A y'a fɔ u ye ko: «Ne tun b'a fɛ kosɔbɛ ka *Hɔrɔnya ɲanagwɛ nin dumuni kɛ n'aw ye sanni ne be tɔɔrɔ,

¹⁶bari ne b'a fɔ aw ye ko ne tena Hɔrɔnya ɲanagwɛ wɛrɛ dumuni kɛ tugu fɔɔ a dumukun ka dafa Ala ka masaya kɔnɔ.»

¹⁷O tuma na, a ye duvɛn ta ka barika la Ala ye k'a fɔ ko: «Aw k'a minɛ k'a min,

¹⁸bari ne b'a fɔ aw ye ko ne tena duvɛn min tugu ni Ala ka masaya ma se.»

¹⁹O kɔ, Yezu ye buru ta ka barika la Ala ye. A y'a tilantilan k'a d'u ma k'a fɔ ko: «Nin ye ne fari ye [min bena kɛ saraka ye aw ka nafa kosɔn. Aw ye to ka nin kɛ k'aw hakili to ne la.»

²⁰Dumuni kɛnin kɔ, a ye duvɛn fana ta ka barika la Ala ye. A y'a di u ma k'a fɔ ko: «Nin ye ne joli ye, Ala be jɛnɲɔgɔnyakura sigi ni min ye. O joli nin bena bɔn aw ka nafa kosɔn.]

²¹«Mɔgɔ min bena ne don mɔgɔjuguw bolo, o tigi be dumuni kɛra ni ne ye.

²²Tiɲɛ lo, Mɔgɔ Dencɛ bena sa i n'a fɔ a latigɛra cogo min na, nga min ben'a don u bolo, bɔnɛ bena o tigi sɔrɔ.»

²³Kalandenw y'a daminɛ ka ɲɔgɔn ɲininga k'o bena kɛ jɔn ye u cɛma.

²⁴ Kalandenw y'a daminɛ ka ɲɔgɔn sɔsɔ kosɔbɛ, bari u tun b'a fɛ k'a lɔn ni mɔgɔ min ye ɲamɔgɔ ye u cɛma.

²⁵Yezu y'a fɔ u ye ko: «Siyaw ka masacɛw be kuntigiyakow kɛ tɔw la, ani fanga be minw bolo, olu b'a fɛ u k'u tɔgɔɲuman fɔ.

²⁶ Nga aw ta man kan ka kɛ ten. Mɔgɔ min ye mɔgɔbaba ye aw cɛma, o tigi k'a yɛrɛ kɛ i n'a fɔ aw bɛɛ la dɔgɔ. Fanga be min bolo, o tigi k'a yɛrɛ kɛ aw ka baaraden ye.

²⁷ Mɔgɔ min be dumuni labɛnna an'a be di min ma wo, jɔn le ye mɔgɔbaba ye u fila cɛma? Dumuni be di min ma, o tɛ wa? Ayiwa, ne be aw cɛma i n'a fɔ jɔɔn.

²⁸«Aw kɔni muɲuna ka to ne fɛ n ka sigɛnw waati la.

²⁹O le y'a to, ne Faa ye masaya di ne ma cogo min na, ne fana b'a di aw ma ten,

³⁰ janko aw ka dumuni kɛ ka minni kɛ ne ka masaya la, ani ka sigi masasigilanw kan ka Isirayɛli ka deen tan ni fila kɔmɔgɔw kiti.»

³¹Yezu y'a fɔ ko: «Simɔn, Simɔn, Sutana ye sira ɲini waasa k'i yuguyugu i n'a fɔ mɔgɔ be mugu tɛntɛn cogo min na,

³²nga, ne ye Ala daali i ye waasa i ka lanaya kana cɛn. N'i segira ne ma tuma min na, e k'i tɔɲɔgɔnw dɛmɛ.»

³³Piyɛri y'a fɔ a ye ko: «Matigi, hali ni ne ka kan ka fara i kan u k'an don kaso la, walima u k'an faga, ne be sɔn.»

³⁴Nga Yezu y'a fɔ a ye ko: «Piyɛri, ne b'a fɔ i ye ko dondo tena kasi bii n'i m'a fɔ ko i te ne lɔn fɔɔ siɲɛ saba.»

³⁵ O kɔ, Yezu y'a fɔ a ka kalandenw ye ko: «Ne y'aw ci tuma min na k'a fɔ aw ye ko aw kana taga ni wari ni dugutagaminan ani sanbara ye, fɛɛn dɔ ye aw dɛsɛ wa?» U y'a jaabi ko foyi m'u dɛsɛ.

³⁶A y'a fɔ u ye tugu ko: «Nga sisan, ni wari be min fɛ, a k'a ta. O cogo kelen la fana, ni dugutagaminan be min fɛ, a k'a ta. Ni murujan te min fɛ, a k'a ka nɛnɛdeleke feere ka dɔ san.

³⁷ Ne b'a fɔ aw ye, Ala ka kuma ye min fɔ ne ka koo la ko: ‹U y'a jati kojugukɛlaw dɔ ye,› wajibi lo o ka kɛ. Ayiwa, o tuma surunyana.»

³⁸Kalandenw y'a fɔ a ye ko: «Matigi, murujan fila filɛ.» A y'u jaabi k'o ka ɲi ten.

³⁹Yezu bɔra ka taga Olivuyirikulu kan i n'a fɔ a tun be deli ka taga cogo min na. A ka kalandenw tugura a kɔ.

⁴⁰A sera o yɔrɔ la tuma min na, a y'a fɔ u ye ko: «Aw ka Ala daali waasa aw kana don kɔrɔbɔli la.»

⁴¹O kɔ, a bɔra u kɔrɔ dɔɔni ka se bɛrɛ filiko kelen jaɲa ma. A y'a kunbiri gwan k'a daminɛ ka Ala daali ko:

⁴²«Ne Faa, n'i b'a fɛ, i ka ne kisi tɔɔrɔ nin ma, nga ne sago kana kɛ fɔɔ e sago.» [

⁴³O tuma na, mɛlɛkɛ dɔ bɔra sankolo la k'a yɛrɛ yira a la, ka barika don a la.

⁴⁴Yezu nii tɔɔrɔnin tun bɛ. A ye dɔ fara Ala daali kan. A wasiji ɲaa kɛra i n'a fɔ joli n'o be tɔnitɔni duguma.]

⁴⁵A ye Ala daali ka ban tuma min na, a wilila ka segi ka na kalanden nunu fɛ ka u sɔrɔ sinɔgɔ la ɲanafinkojugu bolo.

⁴⁶A y'a fɔ u ye ko: «Mun na aw be sinɔgɔ? Aw ye wili ka Ala daali waasa aw kana don kɔrɔbɔli la.»

⁴⁷Ka Yezu to kuma na, Zuda min tun ye kalanden tan ni fila nunu dɔ ye, ale bilara jama ɲa ka na. A gwɛrɛla Yezu la ko a b'a fo.

⁴⁸Nga Yezu y'a fɔ a ye ko: «Zuda, i be Mɔgɔ Dencɛ don mɔgɔjuguw bolo ni foli le ye wa?»

⁴⁹Mɔgɔ minw tun be ni Yezu ye, koo min bena kɛ, olu y'o faamu minkɛ, u ye Yezu ɲininga ko: «Matigi, an ka murujanjanw ta u kama wa?»

⁵⁰U dɔ ye sarakalasebagaw kuntigiba ka baaraden kinibolo tulo caron.

⁵¹Nga Yezu y'u jaabi ko: «Aw k'a dan nin ma.» A magara o jɔncɛ tulo la k'a kɛnɛya.

⁵²O kɔ, sarakalasebagaw kuntigiw ni Alabatosoba kɔlɔsibagaw kuntigiw ani cɛkɔrɔba minw tun tagara k'u b'a minɛ, a y'a fɔ olu ye ko: «Aw nana ne kama ni murujanjan ni berew ye i n'a fɔ ne ye benkannikɛla ye.

⁵³ Ne tun be n'aw ye loon o loon Alabatosoba kɔnɔ waati min na, aw ma ne minɛ, nga sisan ye aw ka waati ni dibi ka setigiya tuma ye.»

⁵⁴U ye Yezu minɛ ka taga n'a ye sarakalasebagaw kuntigiba ka luu kɔnɔ. Piyɛri tugura u kɔɔ ka furancɛba to u ni ɲɔgɔn cɛ.

⁵⁵Mɔgɔw tun ye tasuma mana luu cɛmancɛ la ka sigi a daa la. Piyɛri tagara sigi olu cɛma.

⁵⁶Ka Piyɛri siginin to tasuma daa la, jɔnmuso dɔ y'a ye, a y'a ɲaa basa a la k'a fɔ ko: «Cɛɛ nin fana tun be ni Yezu ye.»

⁵⁷Piyɛri ye muso sɔsɔ k'a fɔ ko: «Ne t'a lɔn.»

⁵⁸Waati dɔɔni o kɔ, cɛɛ dɔ fana y'a ye k'a fɔ a ye ko: «Ele fana ye u dɔ ye.» Nga Piyɛri ye cɛɛ jaabi ko: «Ne te u dɔ ye.»

⁵⁹Lɛrɛ kelen ɲɔgɔn tɛmɛnin kɔ, cɛɛ dɔ wɛrɛ segira k'a fɔ ko: «Siga t'a la, cɛɛ nin tun be ni Yezu ye bari Galileka lo.»

⁶⁰Nga Piyɛri y'a jaabi ko: «E be min fɔra, ne t'o faamu.» K'a to o kuma na, o yɔrɔnin bɛɛ dondo kasira.

⁶¹Matigi y'a ɲaa yɛlɛma ka Piyɛri filɛ. Piyɛri hakili jigira a ka kuma na, a tun ye min fɔ a ye ko: «Sanni dondo bɛ kasi bii, i ben'a fɔ fɔɔ siɲɛ saba ko i te ne lɔn.»

⁶²Piyɛri bɔra kɛnɛma ka kasi kosɔbɛ.

⁶³Yezu kɔlɔsibagaw tun be yɛlɛ a ma n'u b'a bugɔ.

⁶⁴U tun y'a ɲaa siri ka sɔrɔ ka to k'a bugɔ, ani k'a ɲininga ko: «Jɔn y'i bugɔ?»

⁶⁵U ye kumajugujugu wɛrɛw fɔ a ma.

⁶⁶Dugu gwɛra tuma min na, dugu cɛkɔrɔbaw, ni sariya karamɔgɔw ani sarakalasebagaw kuntigiw ye ɲɔgɔn lajɛn. U tagara ni Yezu ye u ka kititigɛlaw fɛ waasa k'a kiti.

⁶⁷U y'a fɔ a ye ko: «N'i ye Ala ka Mɔgɔ wolomanin nin ye, a fɔ an ye.» Yezu y'u jaabi ko: «Ni ne y'a fɔ aw ye, aw tena la a la.

⁶⁸Ni ne y'aw ɲininga fana, aw tena ne jaabi.

⁶⁹Nga, kabini sisan, Mɔgɔ Dencɛ bena sigi Setigi Ala kinibolo fɛ.»

⁷⁰U bɛɛ y'a fɔ ko: «O tuma na, e ye Ala Dencɛ ye wa?» A y'a fɔ u ye ko: «Aw yɛrɛ y'a fɔ ko ne lo.»

⁷¹U y'a fɔ ɲɔgɔn ye ko: «An mako te mɔgɔ ka seereya la tugu ka sɔrɔ k'a jalaki, bari an yɛrɛw y'a dalakuma mɛn.»