Read dyu Luka ka kitabu 6 Bible Online

Luka ka kitabu 6 - dyu bible

Luka ka kitabu 6

¹ Lafiɲɛlon dɔ la, Yezu n'a ka kalandenw tun be tɛmɛna *bileforo dɔw kɔnɔ. A ka kalandenw ye suman dɔw tigɛ k'u tereke u tigɛw la k'u ɲimi.

²*Fariziɲɛ dɔw y'a fɔ u ye ko: «Koo min daganin te lafiɲɛlon na, mun na aw b'o kɛ?»

³ Yezu y'u jaabi ko: «Kɔngɔ ye Dawuda n'a kɔmɔgɔw minɛ tuma min na, a ye min kɛ, aw m'o kalan ka ye wa?

⁴ A donna Ala ka soo kɔnɔ, buru minw tun bilanin be Ala ye ni mɔgɔ si man kan k'olu dumu fɔɔ sarakalasebagaw dɔrɔn, a ye olu ta ka dɔ dumu ka tila ka dɔ di a kɔmɔgɔw ma.»

⁵Yezu y'a fɔ u ye fana ko: «Mɔgɔ Dencɛ ye lafiɲɛlon kuntigi ye.»

⁶Lafiɲɛlon dɔ wɛrɛ la, Yezu donna kalanso kɔnɔ k'a daminɛ ka mɔgɔw kalan. O y'a sɔrɔ cɛɛ dɔ tun be yen min kinibolo faganin lo.

⁷Sariya karamɔgɔw ni *Fariziɲɛw tun be Yezu kɔlɔsira yala n'a bena mɔgɔ dɔ kɛnɛya lafiɲɛlon na, waasa u ka se k'a jalaki.

⁸Nga Yezu tun y'u ka miiriya lɔn, o la, a y'a fɔ cɛɛ bolofaganin ye ko: «Wili ka lɔ mɔgɔw cɛma yan.» A wilila ka lɔ.

⁹O kɔ, Yezu y'a fɔ u ye ko: «Ne b'aw ɲininga, a daganin be ka koɲuman kɛ lafiɲɛlon na wa, walima ka kojugu kɛ? Ka mɔgɔ kisi wa, walima k'a faga?»

¹⁰A y'u bɛɛ filɛfilɛ ka sɔrɔ k'a fɔ cɛɛ ye ko: «I bolo jan.» A y'a jan, a kɛnɛyara.

¹¹U dimina kosɔbɛ, u tora ka ɲɔgɔn ɲininga ko yala u bena se ka mun le kɛ Yezu la.

¹²Loon dɔ la, Yezu tagara kulu dɔ kan ka Ala daali. A sira ɲana Ala daalili la.

¹³Dugu gwɛra tuma min na, a y'a ka kalandenw wele, ka mɔgɔ tan ni fila woloma u cɛma k'olu tɔgɔ la ko cidenw.

¹⁴O cidenw tɔgɔ filɛ: Simɔn, Yezu ye min tɔgɔ la ko Piyɛri, n'a dɔgɔcɛ Andere, Zaki ni Zan, Filipu ni Baritelemi,

¹⁵Matiyo ni Toma, Alife dencɛ Zaki ni Simɔn u be min wele Fasodenŋana,

¹⁶Zaki dencɛ Zuda ani Zuda Isikariyɔti min kɛra janfamɔgɔ ye.

¹⁷Yezu jigitɔ n'a ka cidenw tan ni fila ye ka bɔ kulu kan, a sera kɛnɛba dɔ la ka lɔ yen. Jamaba tun be o yɔrɔ la. A ka kalandenw tun ka ca u cɛma. Dɔw tun bɔra Zeruzalɛmu ni Zude mara bɛɛ la. Dɔw fana tun bɔra kɔgɔjida la dugubabaw la, Tiri ani Sidɔn.

¹⁸U tun nana waasa ka Yezu ka kuma lamɛn ani a ka u kɛnɛya. Minw tɔɔrɔnin tun be jinaw bolo, olu fana kɛnɛyara.

¹⁹Jama bɛɛ tun be cogo ɲini ka maga Yezu la, bari sebagaya dɔ tun be bɔ a la k'u bɛɛ kɛnɛya.

²⁰O tuma na, Yezu y'a ka kalandenw filɛ, k'a fɔ ko: «Aw minw ye fantanw ye, aw dagamunin lo, bari Ala ka masaya y'aw ta ye.

²¹Kɔngɔ be aw minw na sisan, aw dagamunin lo, bari aw bena fa. Aw minw be kasira sisan, aw dagamunin lo, bari aw bena yɛlɛko.

²² Ni mɔgɔw b'aw kɔniya ka ban aw la, k'aw nɛni ani k'aw tɔgɔjugu fɔ Mɔgɔ Dencɛ kosɔn, o tuma na, aw dagamunin lo.

²³ N'o be kɛ tuma min na, aw ka ɲanagwɛ ka panpan nisɔndiya fɛ, bari aw bena tɔnɔba sɔrɔ sankolo la. U faaw fana tun ye kiraw tɔɔrɔ ten.

²⁴Nga bɔnɛ ye aw nafolotigiw ta ye, bari aw ye aw ka ɲasuma sɔrɔ ka ban.

²⁵Aw minw be dumuni kɛ ka fa sisan, bɔnɛ ye aw ta ye, bari kɔngɔ bena aw minɛ. Aw minw be yɛlɛ sisan, bɔnɛ ye aw ta ye, bari aw ɲaa bena sisi, aw bena kasi.

²⁶Ni mɔgɔ bɛɛ be aw tɔgɔɲuman fɔ, bɔnɛ ye aw ta ye, bari u faaw tun be kira galontigɛlaw boɲa ten.

²⁷«Ayiwa aw minw be n lamɛnna, ne b'a fɔ aw ye ko aw k'aw juguw kanu, ka koɲuman kɛ aw kɔniyabagaw ye.

²⁸Aw ka duba kɛ aw dangabagaw ye, ka Ala daali aw tɔɔrɔbagaw ye.

²⁹Ni mɔgɔ dɔ y'i tulo kelen ci, i ka tɔ kelen nin sin a ma fana. Ni dɔ y'i ka foroca bɔsi i la, i kan'a bali k'i ka deleke fana ta.

³⁰Ni mɔgɔ o mɔgɔ ye fɛɛn dɔ daali i fɛ, i k'o d'a ma. Ni mɔgɔ dɔ y'i ka fɛɛn dɔ minɛ i fɛ, i kan'a koo ɲininga.

³¹ Aw b'a fɛ mɔgɔ tɔw ka koo min kɛ aw ye, aw k'o ɲɔgɔn kɛ u ye.

³²«N'aw b'aw kanubagaw dɔrɔn kanu, aw bena tɔnɔ jumɛ sɔrɔ o la? Bari, hakɛkɛlaw fana b'o ɲɔgɔn kɛ.

³³Mɔgɔ minw be koɲuman kɛ aw ye, ni aw be koɲuman kɛ olu dɔrɔn ye, aw bena tɔnɔ jumɛ sɔrɔ o la? Bari, hakɛkɛlaw fana b'o ɲɔgɔn kɛ.

³⁴Aw jigi be mɔgɔ minw kan ko u bena aw ka juru sara, ni aw be juru don olu dɔrɔn na, aw bena tɔnɔ jumɛ sɔrɔ o la? Bari, hakɛkɛlaw fana be juru don ɲɔgɔn na k'u hakili to a ɲɔgɔn sɔrɔli la kɔfɛ.

³⁵Nga, aw k'aw juguw kanu ka koɲuman kɛ u ye. Aw ka juru don mɔgɔw la, ka ɲinɛ o kɔ. O la, aw bena tɔnɔba sɔrɔ. Aw bena kɛ Fɛɛn bɛɛ kuntigi deenw ye, bari, ale be ɲuman kɛ ɲumanlɔnbaliw ni mɔgɔjuguw ye.

³⁶Aw ka makari mɔgɔw la i n'a fɔ aw Faa be makari cogo min na.

³⁷«Aw kana tɔw kiti, Ala tena aw kiti. Aw kana tɔw jalaki, Ala tena aw jalaki. Aw ka yafa tɔw ma, Ala bena yafa aw ma.

³⁸Aw ka tɔw sɔn, Ala bena aw sɔn. A bena minan ɲanaman ta k'aw ta suma k'a digidigi k'a yuguyugu k'a fa fɔɔ a ka bɔn, k'o yɛlɛma aw ka fani daa la. Bari aw be tɔw ta suma ni sumanikɛfɛn min ye, a bena aw ta suma n'o le ye.»

³⁹ Yezu ye talen la u ye fana ko: «Fiɲɛntɔ be se ka fiɲɛntɔ wɛrɛ ka bere minɛ wa? U fila bɛɛ tena ben dingɛ kɔnɔ wa?

⁴⁰ Kalanden si man fisa n'a ka karamɔgɔ ye. Nga kalanden o kalanden kalanna ka se a daan na, a be kɛ i n'a fɔ a ka karamɔgɔ.

⁴¹«Kalafitini min b'i balima ɲaa na, mun na i b'o filɛ k'a sɔrɔ lɔgɔkuru min b'i ta la, i t'o ye wa?

⁴²I do be se k'a fɔ i balima ye cogo di ko: ‹Balima, kala b'i ɲaa na, a to n k'a bɔ.› K'a sɔrɔ lɔgɔkuru min b'i ta la, i t'o yera. Namaramɔgɔ, lɔgɔkuru min b'i ta la, o bɔ fɔlɔ. O la, i bena yeli kɛ ka ɲa, ka kala bɔ i balima ɲaa na.

⁴³«Yiriɲuman si te denjugu kɛ, yirijugu si fana te denɲuman kɛ.

⁴⁴Yiri bɛɛ be lɔn a deen fɛ. Toro te bɔ ŋɔniyiri kan, *ɛrɛzɛn fana te bɔ sɛgɛnɛyiri kan.

⁴⁵Mɔgɔɲuman be fɛnɲuman bɔ nafoloɲuman na min b'a dusu la. Mɔgɔjugu be fɛnjugu bɔ a ka nafolojugu la. Mɔgɔ dusu fanin be fɛɛn min na, a daa b'o le fɔ.

⁴⁶«Mun na aw be ne wele Matigi, Matigi, k'a sɔrɔ ne be min fɔ aw ye, aw t'o kɛ?

⁴⁷«Mɔgɔ o mɔgɔ be na ne fɛ ka ne ka kuma lamɛn k'a bato, o bɔnin be min fɛ, ne bena o fɔ aw ye.

⁴⁸O bɔnin be bonlɔla dɔ fɛ min ye dugukolo sogi k'a duɲa fɔɔ ka se fara ma, k'a ka boon juu sigi o kan. Baa nana fa jii la tuma min na, a karila, jii woyora ka taga gosi o boon nin na, nga a ma se k'a yuguyugu, bari cɛɛ nin tun y'a ka boon lɔ ka ɲa.

⁴⁹Nga mɔgɔ min be ne ka kuma lamɛn n'a te o bato, o tigi bɔnin be bonlɔla dɔ fɛ min ma dugukolo sogi ka sɔrɔ k'a ka boon juu sigi. Baji sera o boon nin ma tuma min na, a benna ka mugumugu o yɔrɔnin bɛɛ.»