Read dyu Luka ka kitabu 7 Bible Online

Luka ka kitabu 7 - dyu bible

Luka ka kitabu 7

¹Yezu kumana jama fɛ ka ban minkɛ, a donna Kafaranamu dugu kɔnɔ.

²Sɔlidasi kuntigi dɔ tun be yen min ka baaraden tun man kɛnɛ, fɔɔ a tun be ɲini ka sa. Baaraden nin koo tun ka di a kuntigi ye kosɔbɛ.

³O cɛɛ ye Yezu koo mɛn minkɛ, a ye dugu cɛkɔrɔba damani ci a fɛ k'a daali ko a ka na ale ka baaraden kɛnɛya.

⁴Olu sera Yezu fɛ, u y'a daali k'a daali kosɔbɛ ko: «Cɛɛ nin ka kan n'i ka dɛmɛli ye,

⁵bari an ka siya koo ka d'a ye. Ale lo lɔra n'an ka kalanso lɔli musakaw ye.»

⁶O la, Yezu tagara n'u ye. U surunyana sɔlidasi kuntigi nin ka soo la tuma min na, a y'a teri dɔw ci k'u ka taga fɔ Yezu ye ko: «Matigi, kana i yɛrɛ sigɛn, bari i ka don ne ka soo kɔnɔ, ne man kan n'o ye.

⁷O kosɔn, ne yɛrɛ ma taga i fɛ. Nga kuma kelen fɔ, ne ka baaraden bena kɛnɛya,

⁸bari kuntigi dɔw be ne fɛ, ne fana be sɔlidasi dɔw kunna. N be se k'a fɔ kelen ye ko: ‹Taga yan fɛ›, a be taga. K'a fɔ dɔ wɛrɛ fana ye: ‹Na yan›, a be na. K'a fɔ n ka jɔɔn ye ko: ‹Nin kɛ ten›, a b'o kɛ.»

⁹Yezu y'o kuma mɛn tuma min na, a kabakoyara. A y'a ɲaa yɛlɛma k'a fɔ a kɔfɛmɔgɔw ye ko: «Ne b'a fɔ aw ye ko hali Isirayɛli mɔgɔw fɛ, ne ma lanaya nin ɲɔgɔn ye.»

¹⁰Sɔlidasi kuntigi nin ka ciden nunu kɔsegira ka ta'a sɔrɔ baaraden nin kɛnɛyara.

¹¹O kɔ, Yezu tagara dugu dɔ la min tɔgɔ ko Nayin. A ka kalandenw ni jamaba tun tagara n'a ye.

¹²U surunyana dugu donda la, u ye mɔgɔ dɔw kunbɛn n'u be tagara ni suu ye kaburutu la. Firiyamuso dɔ ka dencɛ kelenpe tun lo. Jamaba tun be yen.

¹³Matigi ye muso nin ye minkɛ, a hinɛ donn'a la kosɔbɛ. A y'a fɔ a ye ko a kana kasi tugu.

¹⁴O kɔ, a gwɛrɛla ka maga sukɛsu la. Suu tabagaw lɔra. Yezu y'a fɔ kanbelen suu ma ko a ka wili.

¹⁵Suu nin kununna, a wilila ka sigi k'a daminɛ ka kuma. Yezu y'a fɔ muso ye ko a k'a deen minɛ ka taga.

¹⁶Mɔgɔ bɛɛ kabakoyara, u tun be Ala tanu k'a fɔ ko: «Kiraba wilila an cɛma, Ala sɔnna k'a ka jama ɲafilɛ.»

¹⁷O kuma jɛnsɛnna Zude faan bɛɛ la, ani a lamini maraw bɛɛ la.

¹⁸Zan ka kalandenw ye Yezu ka koo kɛnin bɛɛ lakali a ye. O la, a y'a ka kalandenw mɔgɔ fila wele

¹⁹k'u ci Matigi fɛ k'u ka ta'a ɲininga ko: «Ala ka Mɔgɔ wolomanin min ka kan ka na, ale lo wa? Walima an ka kan ka mɔgɔ wɛrɛ kɔnɔ?»

²⁰Olu sera Yezu fɛ k'a fɔ a ye ko: «Zan batizelikɛla y'an ci ko an ka na i ɲininga ko Ala ka Mɔgɔ wolomanin min ka kan ka na, ko ele lo wa? Walima an ka kan ka mɔgɔ dɔ wɛrɛ kɔnɔ?»

²¹O waati yɛrɛ la, Yezu ye banabagatɔ caaman kɛnɛya ka jinaw gwɛn ka bɔ mɔgɔw la, ka fiɲɛntɔ caaman ɲaa yɛlɛ.

²² O kɔ, a ye cidenw jaabi ko: «Aw ye min ye, ani aw ye min mɛn, aw ye taga o lakali Zan ye, ko fiɲɛntɔw be yeli kɛra, murukuw be taama, farisogobanatigiw be kɛnɛyara, tulogwerenw be mɛnni kɛra, suuw be kununna, kibaru diman be fɔra fantanw ye.

²³Ni mɔgɔ min kunna ma cɛn ne kosɔn, o tigi dagamunin lo.»

²⁴Zan ka cidenw taanin kɔ, Yezu y'a daminɛ ka kuma jama fɛ Zan koo la. A y'u ɲininga ko: «Aw tun tagara mun le filɛ kongokolon kɔnɔ? Fɔɲɔ be biin min lamaga wa?

²⁵Aw tagara mun le filɛ? Dakamana fanitigi wa? Nga minw be dakamana faniw don ka faamadumuni kɛ, olu be sɔrɔ masaluw le kɔnɔ.

²⁶Aw tagara mun le filɛ? Kira lo wa? Tiɲɛ na, ne b'a fɔ aw ye ko a tɛmɛna kira yɛrɛ kan!

²⁷ Ciden min koo fɔra Ala ka kuma na, o ciden nin ye Zan ye. A fɔra ko: ‹A filɛ, ne be n ka ciden ci i ɲa, a bena i ka sira labɛn.› »

²⁸Ne b'a fɔ aw ye ko mɔgɔ si ma wolo diɲɛ na min kɛra mɔgɔbaba ye ka tɛmɛ Zan kan. Nga Ala ka masaya la, mɔgɔ min lɔyɔrɔ ka dɔgɔ n'u bɛɛ ye, o tigi ka bon ni Zan ye.

²⁹ «Mɔgɔ minw ye Zan lamɛn, hali lɛnpominɛlaw, u bɛɛ y'a lɔn ko Ala tilennin lo. O le y'a to u sɔnna Zan y'u batize.

³⁰Nga *Fariziɲɛw ni sariya karamɔgɔw ma sɔn Ala ka koo latigɛninw ma. O la, u ma sɔn Zan k'u batize.»

³¹Yezu y'a fɔ tugu ko: «Ne bena bii mɔgɔw suma ni jɔn ye? U bɔnin be jɔn fɛ?

³²U bɔnin be denmisɛnw fɛ minw siginin be kɛnɛba la ka to k'u kaan sama ɲɔgɔn ma ko: ‹Anw ye fɔli kɛ aw ye, aw ma dɔɔn kɛ. Anw ye sanga dɔnkili la, aw ma kasi fana.›

³³Bari, Zan batizelikɛla nana, a tun te dumuni kɛ, a tun te duvɛn min. Aw ko jina b'a la.

³⁴Mɔgɔ Dencɛ nana, a be dumuni kɛ ka minni kɛ, aw ko: ‹Cɛɛ nin ye nugubagatɔ ni dɔrɔtɔ ye. Lɛnpominɛlaw ni hakɛkɛlaw teri lo.›

³⁵Nga lɔnniya deenw bɛɛ b'a lɔn ko lɔnniya tilennin lo.»

³⁶*Fariziɲɛ dɔ ye Yezu wele dumuni na. Yezu tagara o ka soo ka sigi dumuni na.

³⁷ O dugu nin na, muso hakɛkɛla dɔ tun be yen. A y'a mɛn ko Yezu be dumuni na Fariziɲɛ nin ka soo minkɛ, a tagara ni daga cɛɲumanin dɔ ye. O daga nin tun dilannin be ni kabakuru dɔ ye min be wele alabatiri. A fanin tun be tulu kasadiman na.

³⁸A sera minkɛ, a tora Yezu kɔfɛ ka biri a seen kɔrɔ ka kasi daminɛ. A kasira fɔɔ a ɲaji ye Yezu seen ɲigi. O kɔ, a y'a kunsigi kɛ k'o jɔsi n'a b'o saalo, ka tila ka tulu kasadiman bɔn u kan.

³⁹Fariziɲɛ min tun ye Yezu wele dumuni na, ale y'o ye minkɛ, a y'a miiri ko: «Ni cɛɛ nin tun ye kirasɔbɛ ye, a tun ben'a lɔn ko muso min be magar'a la, ko hakɛkɛla lo.»

⁴⁰O la, Yezu ye kuma ta k'a fɔ a ye ko: «Simɔn, kuma be n fɛ k'a fɔ i ye.» Simɔn y'a jaabi ko: «Karamɔgɔ, a fɔ.»

⁴¹Yezu ko: «Cɛɛ dɔ ka juru tun be mɔgɔ fila dɔ la. Kelen ka juru tun ye warigwɛ deen kɛmɛ duuru ye, tɔ kelen ta tun ye warigwɛ deen bi duuru.

⁴²U fila si tun te sera k'u ka juru sara minkɛ do, cɛɛ y'u wele k'a fɔ u ye ko: ‹Ne yafara aw ma juru nunu la.› » O kɔ, Yezu ye Simɔn ɲininga ko o cɛɛ koo bena diya jurumantigi fila nunu jumɛn ye ka tɛmɛ.

⁴³A y'a jaabi ko: «Ne ka miiri la, min ka juru tun ka ca.» Yezu ko: «I ye tiɲɛ fɔ.»

⁴⁴O kɔ, Yezu y'a ɲaa yɛlɛma ka muso nin filɛ ka sɔrɔ k'a fɔ Simɔn ye ko: «I ɲaa be muso nin na kɛ, ne nana i ka soo, i ma senkoji di ne ma. Nga ale ye ne seen ko n'a ɲaji ye k'a jɔsi n'a kunsigi ye.

⁴⁵I ma ne fo ka n fari saalo, nga ale, kabini ne nana i fɛ, a ma ne seen saalo dabila.

⁴⁶I ma tulu bɔn ne kuun na, nga ale ye tulu kasadiman le bɔn ne seen kan.

⁴⁷O kama, kanuyasɔbɛ min b'a dusu la, ne b'a fɔ i ye k'o kosɔn, a ka hakɛw bɛɛ yafara a ma. U ma mɔgɔ min ka hakɛw bɛɛ yafa, kanuyasɔbɛ tena kɛ o dusu la.»

⁴⁸O kɔ, Yezu y'a fɔ muso nin ye ko: «Ne y'i ka hakɛw yafa.»

⁴⁹Yezu ni minw tun be dumuni na ɲɔgɔn fɛ, olu y'a daminɛ k'a fɔ u kɔnɔ ko: «Nin ye jɔn ye fɔɔ a be hakɛw yafa mɔgɔ ma?»

⁵⁰Nga Yezu y'a fɔ muso nin ye tugu ko: «I kisira i ka lanaya kosɔn, taga hɛrɛ la.»