Read dyu Luka ka kitabu 8 Bible Online

Luka ka kitabu 8 - dyu bible

Luka ka kitabu 8

¹O kɔ, Yezu tun be yaala duguba ni dugudenninw na ka waajuli kɛ ka Ala ka masaya kibaru diman fɔ. A ka kalanden tan ni fila tun be n'a ye,

² ani muso damani fana, Yezu tun ye jina gwɛn ka bɔ minw dɔw la, ka dɔw kɛnɛya: Magidalaka Mariyamu, Yezu tun ye jina wolonwula gwɛn ka bɔ min la,

³ni Zaani min ye *Erɔdi ka nafolo kɔlɔsibaga Suza muso ye, ni Suzani, ani muso wɛrɛw, minw tun be Yezu n'a ka kalandenw dɛmɛ n'u bololafɛnw ye.

⁴Jamaba tagara lajɛn, mɔgɔw tun be bɔ duguw bɛɛ la ka taga Yezu sɛgɛrɛ. A ye talen la ko:

⁵«Sɛnɛkɛla dɔ bɔra ka taga ka suman seri. K'a to serili la, kisɛ dɔw tagara ben sira daa la. Tɛmɛbagaw y'u dɔn, kɔnɔw y'u kunu.

⁶Dɔw fana tagara ben farayɔrɔ la. U falenna dɔrɔn, u sara bari sumaya tun te u kɔrɔ.

⁷Dɔw fana tagara ben ŋɔni yɔrɔ la, u falenna, u ni ŋɔni wilila ɲɔgɔn fɛ, ŋɔni y'u degun.

⁸Dɔ wɛrɛw tagara ben dugukoloɲuman na. U falenna ka wili ka kisɛ kɛ. Olu y'u ɲɔgɔn kɛmɛ kɛmɛ sɔrɔ.» O kuma fɔnin kɔ, Yezu pɛrɛnna ko: «Tulo be min fɛ ka mɛnni kɛ, o ka mɛnni kɛ.»

⁹Yezu ye talen min la, a ka kalandenw y'a ɲininga o kɔrɔ la.

¹⁰ A y'u jaabi ko: «See dira aw ma ka Ala ka masaya gundow lɔn. Nga a koo be fɔ tɔw ye talen le la, waasa u filɛli kɛtɔ, u kana foyi ye, u mɛnni kɛtɔ, u kana foyi faamu.

¹¹«N ye talen min la, o kɔrɔ filɛ nin ye: Sumansi, o ye Ala ka kuma le ye.

¹²Mɔgɔ dɔw bɔnin be sirada fɛ, kisɛ benna yɔrɔ min na. U mana Ala ka kuma mɛn, Sutana be na o kuma bɔ u kɔnɔ, janko u kana la a la ka kisi.

¹³Mɔgɔ dɔw fana bɔnin be farayɔrɔ fɛ. N'u y'o kuma mɛn, u be sɔn a ma ni nisɔndiya ye. Nga a te sigiyɔrɔ sɔrɔ u kɔnɔ, u be la o kuma na tumanin kelen dɔrɔn, ni kɔrɔbɔli nana, u be ban a kuma la.

¹⁴Mɔgɔ dɔ wɛrɛw fana bɔnin be ŋɔni yɔrɔ fɛ. Olu mana kuma mɛn, hamikow, ni nafoloko, ni diyanakow b'o kuma nagasi fɔɔ nafa te sɔrɔ a la.

¹⁵Dɔw fana bɔnin be dugukoloɲuman fɛ. Olu mana kuma mɛn, u b'a minɛ ni dusuɲuman ye fɔɔ nafa be sɔrɔ a la.»

¹⁶ Yezu y'a fɔ tugu ko: «Mɔgɔ si te fitinɛ mana k'a bila gongo jukɔrɔ, walima kalaka jukɔrɔ. Nga o b'a bila fɛɛn dɔ kan, janko mɔgɔ minw be don soo kɔnɔ, u ka yeli kɛ.

¹⁷ «Fɛɛn o fɛɛn dogonin be, o bɛɛ bena ye. Gundo si te yen min tena bɔ kɛnɛ kan.

¹⁸ «Aw k'aw ka mɛnni kɛcogo kɔlɔsi, bari fɛɛn be min fɛ, dɔ bena fara o ta kan, nga fɛɛn te min fɛ, hali a be miiri ko min b'a fɛ, o bena bɔsi a la.»

¹⁹Yezu tun be yɔrɔ min na, a baa n'a dɔgɔninw tagara yen. Nga u tun te sera ka gwɛrɛ a la minkɛ jama kosɔn,

²⁰dɔ y'a fɔ a ye ko: «Karamɔgɔ, i baa n'i dɔgɔninw lɔnin be kɛnɛma k'u mako b'i la.»

²¹Nga Yezu ye o tigi jaabi ko: «Mɔgɔ minw be u tulo malɔ Ala ka kuma na k'a sira taama, olu le ye ne baa ni ne dɔgɔninw ye.»

²²Loon dɔ la, Yezu donna kurun kɔnɔ n'a ka kalandenw ye. A y'a fɔ u ye ko: «An ka taga baa kɔ.»

²³K'u to baa cɛma kurun boli la, Yezu sinɔgɔra. Fɔɲɔba dɔ wilila, fɔɔ kurun tun be ɲini ka fa jii la. U tun be farati la.

²⁴O la, a ka kalandenw gwɛrɛl'a la k'a kunun k'a fɔ a ye ko: «Karamɔgɔ, karamɔgɔ, an satɔ filɛ!» Yezu kununna ka kuma fɔɲɔ ni jii kunna. Fɔɲɔ lɔra, jii malara, yɔrɔ malara.

²⁵O kɔ, Yezu y'a fɔ a ka kalandenw ye ko: «Aw jigi be min?» Kalandenw kabakoyara fɔɔ siranya donna u la n'u be ɲɔgɔn ɲininga Yezu koo la ko: «Cɛɛ nin ye jɔn ye? Hali fɔɲɔ ni baji be sɔn a ta ma?»

²⁶Yezu n'a ka kalandenw sera Gadare mara la. Baa y'o mara ni Galile ta danfara bɔ.

²⁷Yezu jigira ka bɔ kurun kɔnɔ dɔrɔn, jinatɔcɛ dɔ nan'a kunbɛn. Kabini tumajan, a tun te fani don. A tun te si dugu kɔnɔ tugu fɔɔ kaburutu la.

²⁸Cɛɛ ye Yezu ye minkɛ dɔrɔn, a pɛrɛnna kosɔbɛ ka taga kunbiri gwan Yezu kɔrɔ k'a kaan bɔ ko: «Mun b'an cɛ, Fɛɛn bɛɛ kuntigi Ala Dencɛ Yezu? Ne b'i daali, i kana ne tɔɔrɔ.»

²⁹Cɛɛ nin y'o fɔ, bari Yezu tun b'a fɔra ko jina ka bɔ a la. Jina nin tun b'a tɔɔrɔ tuma caaman, mɔgɔw tun b'a bolo n'a seenw bɛɛ siri ni jɔrɔkɔw ye k'a bila. Nga a tun be to k'u tigɛtigɛ, jina be taga n'a ye kongo kɔnɔ.

³⁰Ayiwa, Yezu ye cɛɛ ɲininga ko a tɔgɔ be di. A y'a jaabi ko Jinakulu. A y'o fɔ bari jina caaman tun b'a la.

³¹Jina nunu ye Yezu daali kosɔbɛ ko a kana olu gwɛn ka taga u ɲagwanyɔrɔ la.

³²O y'a sɔrɔ lɛkuluba dɔ tun be dumuni kɛra kulu kan. Jina nunu ye Yezu daali ko a k'a to u ka taga don o lɛɛw la. Yezu sɔnna.

³³Jinaw bɔra cɛɛ la ka taga don lɛɛw la. Lɛkulu girinna ka bɔ kulu kan ka taga don baji la ka sa.

³⁴U dɛndɛbagaw y'o koo ye minkɛ, u bolila ka taga o kibaru fɔ dugu kɔnɔ ni dafɛduguw la.

³⁵Koo min kɛra, mɔgɔw bɔra ka taga o filɛ. U sera Yezu fɛ. U y'a ye ko jina tun bɔra cɛɛ min na, ale siginin be Yezu seen kɔrɔ, fani b'a kaan na, a ɲamalɔnin lo. U siranna kosɔbɛ.

³⁶Cɛɛ kɛnɛyara cogo min na, minw y'o ye, olu y'o lakali mɔgɔw ye.

³⁷O la, u bɛɛ y'a ɲini Yezu fɛ ko a ka bɔ u ka mara la, bari a siranya boɲana u fɛ. Yezu donna kurun kɔnɔ ko a be taga,

³⁸cɛɛ y'a ɲini a fɛ ko ni ale be se ka taga n'a ye. Nga Yezu y'a jaabi ko:

³⁹«Segi ka taga i ka soo, Ala ye koba min kɛ i ye, i ka o bɛɛ lakali.» Yezu ye koba min kɛ cɛɛ ye, a tagara o lakali dugu nin bɛɛ kɔnɔ.

⁴⁰Yezu kɔsegira ka bɔ baa kɔ tuma min na, mɔgɔw bɛɛ y'a kunbɛn ni nisɔndiya ye, bari u bɛɛ tun b'a makɔnɔna.

⁴¹O tuma na, cɛɛ dɔ sera min tɔgɔ ko Zayirisi. Kalanso kuntigi tun lo. A tagar'a kunbiri gwan Yezu kɔrɔ, k'a daali ko a ka sabali ka taga ale ka soo,

⁴²bari ale denmuso man kɛnɛ, ko a be ɲini ka sa, k'o denmuso nin dɔrɔn le ye ale deen ye. Deen nin sii tun be saan tan ni fila ɲɔgɔn. Yezu taatɔ o yɔrɔ la, mɔgɔw tun b'a digidigi fɔɔ k'a degun.

⁴³O y'a sɔrɔ, muso dɔ tun b'u cɛma, min ka koli tun te banna n'a kɛra a ma bana ye kabini saan tan ni fila. A bololafɛn bɛɛ banna, bari a tun tagara furakɛla caaman fɛ. Nga a ka bana ma nɔgɔya.

⁴⁴A gwɛrɛla Yezu la jama cɛma ka maga a ka fani dakun na a kɔfɛ. O yɔrɔnin bɛɛ, a ka koli lɔra.

⁴⁵Yezu ye ɲiningali kɛ ko: «Jɔn magara ne la?» Mɔgɔ si ma sɔn k'a fɔ ko ale lo. Piyɛri ye kuma ta k'a fɔ ko: «Karamɔgɔ, i ɲaa b'a la ko mɔgɔw b'i digidigira fɔɔ k'i degun.»

⁴⁶Nga Yezu ko: «Mɔgɔ dɔ magara ne la, bari ne y'a lɔn ko ne ka fanga ye kabako dɔ kɛ sisan sisan.»

⁴⁷Muso nin y'a lɔn ko koo nin tena se ka dogo tugu minkɛ, a yɛrɛyɛrɛtɔ tagar'a kunbiri gwan Yezu kɔrɔ. A magara a la kuun min na, ani a kɛnɛyara yɔrɔnin kelen cogo min na, a y'o bɛɛ lakali Yezu ye mɔgɔw bɛɛ ɲana.

⁴⁸Yezu y'a fɔ a ye ko: «N balimamuso, i kisira i ka lanaya kosɔn. Taga hɛrɛ la.»

⁴⁹Ka Yezu to o kuma na, mɔgɔ dɔ bɔra kuntigi Zayirisi ka soo ka na a fɔ a ye ko: «I denmuso banna, kana karamɔgɔ sigɛn tugu.»

⁵⁰Yezu y'o kuma mɛn minkɛ, a y'a fɔ Zayirisi ye ko: «Kana siran, la Ala la dɔrɔn, i denmuso bena kisi.»

⁵¹U sera Zayirisi ka soo tuma min na, Yezu ma sɔn mɔgɔ si ka don n'a ye boon kɔnɔ fɔɔ Piyɛri, ni Zan, ni Zaki, ani sungurunin faa n'a baa dɔrɔn.

⁵²Mɔgɔ bɛɛ tun be kasira ka kule sungurunin ka saya koo la. Yezu y'a fɔ u ye ko: «Aw kana kasi, sungurunin ma sa, nga a be sinɔgɔra le.»

⁵³Mɔgɔw y'a lɔn ko sungurunin sara tiɲɛ na minkɛ, u yɛlɛla Yezu ma.

⁵⁴A donna ka sungurunin suu minɛ a bolo ma k'a fɔ a ye ko: «Sungurunin, wili.»

⁵⁵O yɔrɔnin bɛɛ, deen nii segir'a ma, a wilila. Yezu y'a fɔ u ye k'u ka dumuni d'a ma.

⁵⁶Deen wolobagaw kabakoyara kosɔbɛ. Nga Yezu y'a fɔ u ye k'a gwɛlɛya k'u kana o koo nin ɲafɔ mɔgɔ si ye.