Read dyu Luka ka kitabu 9 Bible Online

Luka ka kitabu 9 - dyu bible

Luka ka kitabu 9

¹Yezu y'a ka kalanden tan ni fila lajɛn ka sebagaya ni fanga d'u ma ka jinaw gwɛn, ani ka banabagatɔw kɛnɛya.

²O kɔ, a y'u ci ka taga Ala ka masaya koo fɔ, ka banabagatɔw kɛnɛya.

³ A y'a fɔ u ye ko: «Aw kana fɛɛn si ta, bere, dugutagaminan, dumuni, hali wari, aw kana o si ta. Aw kana deleke fila don.

⁴N'aw ye jatigila sɔrɔ yɔrɔ o yɔrɔ, aw ye to yen fɔɔ aw bɔtuma ka se o dugu kɔnɔ.

⁵Ni dugu dɔ mɔgɔw banna ka jigiyɔrɔ d'aw ma, aw ye bɔ yen, k'aw sennabuguri furanfuran. [1] O bena kɛ taamasiɲɛ ye k'u lasɔmi.»

⁶Kalandenw tagara yaala duguw la ka Ala ka kibaru diman fɔ ani ka banabagatɔw kɛnɛya o yɔrɔw bɛɛ la.

⁷ Galile mara masacɛ *Erɔdi ye kokɛnin nunu bɛɛ kibaru mɛn minkɛ, a hakili ɲagamina, bari dɔw tun ko Zan batizelikɛla le kununna.

⁸Dɔw fana ko kira Eli le segira ka na. Dɔ wɛrɛw ko kirakɔrɔw dɔ le kununna.

⁹Nga Erɔdi ko: «Ne y'a to u ye Zan kuun tigɛ. Ne do be min ka koo kɛnin kibaru mɛnna ten, o ye jɔn ye?» O la, a tun b'a fɛ a ɲaa ka la Yezu kan.

¹⁰Cidenw kɔsegira tuma min na, u ye koo minw kɛ, u y'o bɛɛ lakali Yezu ye. A tagara n'u ye danna dugu dɔ faan fɛ min tɔgɔ ko Bɛtisayida.

¹¹Nga jama nana a lɔn minkɛ, u tagar'a fɛ. Yezu y'u kunbɛn ni nisɔndiya ye, ani ka u kalan Ala ka masaya koo la. Minw tun be kɛnɛyali fɛ, a y'olu kɛnɛya.

¹²Tile tun be ɲini ka ban minkɛ, a ka kalandenw gwɛrɛla a la k'a fɔ a ye ko: «Sira di jama ma u ka taga dafɛduguw la ka dumuni ani layɔrɔ ɲini bari an be yɔrɔlakolon na yan.»

¹³Nga Yezu ko: «Aw yɛrɛ ka dumuni d'u ma.» U y'a fɔ a ye ko: «Foyi t'an fɛ ni burukun duuru ani jigɛ deen fila dɔrɔn tɛ. Fɔɔ n'an tagara dumuni san ka n'a di o jama ma.»

¹⁴Bari cɛɛw tun ye mɔgɔ waa duuru ɲɔgɔn ye. Yezu y'a fɔ a ka kalandenw ye k'u k'a fɔ mɔgɔw ye k'u ka sigi mɔgɔ bi duuru duuru.

¹⁵Kalandenw y'a kɛ ka kɛɲɛ n'a ka kuma ye, jama bɛɛ sigira.

¹⁶Yezu ye burukun duuru ni jigɛ deen fila nunu ta, k'a ɲaa kɔrɔta sanfɛ ka barika la Ala ye, k'u karikari k'u di a ka kalandenw ma k'u k'u tilan jama cɛ.

¹⁷U bɛɛ ye dumuni kɛ fɔɔ ka fa, u ye dumuni tɔɔ cɛ ka segi tan ni fila fa n'o ye.

¹⁸Loon dɔ, ka Yezu to Aladali la a kelen, a ka kalandenw tun b'a gɛrɛfɛ. A tilara tuma min na, a y'u ɲininga ko: «Mɔgɔw b'a fɔra ko ne ye jɔn ye?»

¹⁹ U y'a jaabi ko: «Dɔw ko i ye Zan batizelikɛla ye. Dɔw ko i ye Eli ye. Dɔw fana ko i ye kirakɔrɔw dɔ ye min kununna.»

²⁰ Yezu ko: «Aw do, aw b'a miiri ko ne ye jɔn ye?» Piyɛri y'a jaabi ko: «I ye Ala ka Mɔgɔ wolomanin nin ye.»

²¹Yezu y'a fɔ k'a gwɛlɛya u ma k'u kana o fɔ mɔgɔ si ye.

²²A y'a fɔ u ye tugu ko: «Mɔgɔ Dencɛ ka kan ka tɔɔrɔ kosɔbɛ. Cɛkɔrɔbaw ni sarakalasebagaw kuntigiw ani sariya karamɔgɔw bena ban a la. U ben'a faga, nga tile sabanan loon a faganin kɔ, a bena kunun.»

²³ O kɔ, a y'a fɔ jama ye ko: «Ni mɔgɔ min b'a fɛ ka tugu ne kɔ, o tigi kana miiri a yɛrɛ ka nafa la. A k'a yɛrɛ gwengwenlɔgɔ ɲun loon o loon ka tugu ne kɔ.

²⁴ Mɔgɔ o mɔgɔ b'a fɛ k'a nii kisi, o tigi bena bɔnɔ a la. Nga ni mɔgɔ min bɔnɔna a nii la ne kosɔn, o tigi ben'a nii kisi.

²⁵A be mun ɲa mɔgɔ ye ka diɲɛ fɛɛn bɛɛ sɔrɔ n'a bɔnɔna a nii la, walima n'a yɛrɛ halakira?

²⁶Ni mɔgɔ min maloyara, a ma sɔn ne ni n ka kuma ma, Mɔgɔ Dencɛ mana na tuma min na a ka sebagaya la, n'a Faa ta, ani mɛlɛkɛ senumanw ta la, a fana tena sɔn o tigi ma.

²⁷Tiɲɛ na, ne b'a fɔ aw ye ko aw minw be yan, aw dɔw tena sa n'u ma Ala ka masaya ye.»

²⁸ Tile seegi ɲɔgɔn o kuma nunu fɔnin kɔ, Yezu tagara ni Piyɛri ni Zan ani Zaki ye kulu jamanjan dɔ kan ka Ala daali.

²⁹Ka Yezu to daalili la, a ɲada yɛlɛmana, a ka fani gwɛra parapara fɔɔ a be manamana.

³⁰O yɔrɔnin bɛɛ, cɛɛ fila dɔ tun be kumana n'a ye. Musa ni Eli tun lo.

³¹Nɔɔrɔ tun b'u la. Yezu bena taga Zeruzalɛmu ka sa cogo min na k'a ka baara dafa, u tun b'o kuma le la.

³²Sinɔgɔ tun be Piyɛri n'a tɔɲɔgɔnw na, u sinɔgɔra. U nana kunun tuma min na, u ye Yezu ka Alaya nɔɔrɔ ye, ani cɛɛ fila nunu a gɛrɛfɛ.

³³Cɛɛ fila nunu taatɔ ka bɔ Yezu kɔrɔ, Piyɛri y'a fɔ a ye ko: «Matigi, a ka ɲi an ka to yan. Anw be bugu saba lɔ, e ta kelen, Musa ta kelen, Eli ta kelen.» Piyɛri tun be min fɔra, a tun m'a lɔn.

³⁴Ka Piyɛri to o kuma na, sankaba dɔ jigira k'u datugu. Kalanden saba nunu y'o ye minkɛ, u siranna.

³⁵ Kumakan dɔ bɔra sankaba nin la k'a fɔ ko: «Nin ye ne Dencɛ ye ne ye min ci aw ma, aw k'a lamɛn.»

³⁶Kumakan nin bɔtuma na, kalandenw ma mɔgɔ si ye tugu Yezu kelen kɔ. Olu ye min ye, u y'o mara u kɔnɔ, u m'o lakali mɔgɔ si ye o waati la.

³⁷O dugusagwɛ, u jigitɔ ka bɔ kulu nin kan, jamaba dɔ tagara Yezu kunbɛn.

³⁸Cɛɛ dɔ tora jama cɛma ka pɛrɛn ko: «Karamɔgɔ, ne b'i daali, i ka n dencɛ cogoya filɛ, bari ale dama le ye n deen ye.

³⁹Jina dɔ be to ka wili a la, n'a wilila a la, a be bari ka kule, a b'a yuguyugu kosɔbɛ fɔɔ a daa be kanga. A b'a tɔɔrɔ kosɔbɛ, a te bɔ a la joona.

⁴⁰Ne y'i ka kalandenw daali ko u k'a gwɛn ka bɔ a la, nga u ma se.»

⁴¹Yezu y'a fɔ ko: «Aw bii mɔgɔw kɔni, aw ka jugu, aw te la Ala la. Ne bena to n'aw ye k'aw ka koo muɲu fɔɔ tuma jumɛn?» A y'a fɔ deen faa ye ko: «Na n'i dencɛ ye yan.»

⁴²Deen gwɛrɛtɔ, jina y'a ta k'a ben duguma k'a yuguyugu kosɔbɛ. Nga Yezu ye kuma gwɛlɛya jina ma k'a gwɛn. Deen kɛnɛyara, a y'a d'a faa ma.

⁴³Mɔgɔw bɛɛ kabakoyara Ala ka sebagaya nin kosɔn. Yezu ka kokɛninw bɛɛ tun be mɔgɔw kabakoya minkɛ, a y'a fɔ a ka kalandenw ye ko:

⁴⁴«N bena kuma min fɔ sisan, aw k'o lamɛn ka ɲa: U bena Mɔgɔ Dencɛ don mɔgɔjuguw bolo.»

⁴⁵Nga olu m'o kuma faamu, a kɔrɔ dogonin tora u ma ten waasa u kan'a faamu. U tun be siran k'a ɲininga o kuma kɔrɔ la.

⁴⁶ Kalandenw tun be miiri ko jɔn le bena kɛ mɔgɔbaba ye.

⁴⁷Yezu y'u ka miiriya lɔn minkɛ, a ye denmisɛn dɔ ta k'a lɔ a gɛrɛfɛ,

⁴⁸ k'a fɔ u ye ko: «Ni mɔgɔ min ye nin denmisɛn ɲɔgɔn minɛ ka ɲa ne kosɔn, o tigi ye ne le minɛ ka ɲa. Mɔgɔ min ye ne minɛ ka ɲa, o tigi ye ne cibaga le minɛ ka ɲa. Aw te mɔgɔ min jati aw cɛma, o tigi le ye mɔgɔbaba ye.»

⁴⁹Zan ye kuma ta k'a fɔ Yezu ye ko: «Karamɔgɔ, an ye cɛɛ dɔ ye min be jinaw gwɛn ka bɔ mɔgɔw la n'i tɔgɔ ye. An tun b'a fɛ k'a bali, bari an dɔ tɛ.»

⁵⁰Yezu y'a jaabi ko: «Aw kan'a bali, bari mɔgɔ min te aw jugu ye, o ye aw ɲiin ye.»

⁵¹Yezu tun ka kan ka ta ka bɔ diɲɛ na waati min na, o surunyana minkɛ, a y'a ŋaniya ta ko a be taga Zeruzalɛmu.

⁵²O la, a ye cidenw bila ka taga yɛrɛ ɲa. Olu tagara don Samari mara dugu dɔ kɔnɔ ka jatigiso ɲini Yezu ye.

⁵³Nga o dugu mɔgɔw ma sɔn ka Yezu ladon, bari a tun be tagara Zeruzalɛmu.

⁵⁴ A ka kalanden dɔw, Zaki ni Zan y'o mɛn minkɛ, u y'a fɔ Yezu ye ko: «Matigi, i b'a fɛ an b'a kɛ tasuma be jigi ka bɔ sankolo la k'u halaki wa?»

⁵⁵Yezu y'a ɲaa yɛlɛma k'u jalaki.

⁵⁶O kɔ, u tɛmɛna ka taga dugu wɛrɛ la. [2]

⁵⁷K'u to sira kan, cɛɛ dɔ y'a fɔ Yezu ye ko: «I mana taga yɔrɔ o yɔrɔ, ne bena tugu i kɔ.»

⁵⁸Yezu y'a fɔ a ye ko: «Dingɛ be kongowuluw fɛ, ɲaga be kɔnɔw fɛ, nga layɔrɔ te Mɔgɔ Dencɛ tɔgɔ la.»

⁵⁹Yezu fana y'a fɔ cɛɛ dɔ ye ko: «Tugu ne kɔ.» Nga o cɛɛ ko: «Matigi, a to ne be taga n facɛ suu don fɔlɔ.»

⁶⁰Yezu y'a fɔ a ye ko: «A to suuw k'u ka suuw don. E kɔni, e ka taga Ala ka masaya koo fɔ.»

⁶¹ Cɛɛ wɛrɛ y'a fɔ Yezu ye ko: «Ne bena tugu i kɔ, Matigi. Nga i b'a to ne be taga sara n ka somɔgɔw la fɔlɔ.»

⁶²Yezu y'a jaabi ko: «Mɔgɔ o mɔgɔ be misidaba minɛ ko a be sɛnɛ kɛ, n'a be filɛli kɛ a kɔfɛ, o tigi man kan ni Ala ka masaya ye.»