Read dyu Sariya diko filanan kitabu 10 Bible Online

Sariya diko filanan kitabu 10 - dyu bible

Sariya diko filanan kitabu 10

¹ «O kɔ, Masaba y'a fɔ ne ye ko: ‹Walaka kabakurulaman fila lɛsɛ ka kɛɲɛ ni fɔlɔtaw ye, ka kɛsu yirilaman fana dilan. O kɔ, i ka yɛlɛ ka na ne fɛ kulu kan.

²N bena kuma sɛbɛn walaka nunu kan, minw ɲɔgɔn tun be fɔlɔtaw kan i tun ye minw ci. O kɔ, i k'u bila kɛsu nin kɔnɔ.›

³«Ne ye kɛsu dilan ni akasiyayiri ye ka walaka kabakurulaman fila lɛsɛ i n'a fɔ fɔlɔtaw, ka sɔrɔ ka yɛlɛ n'u ye kulu kan.

⁴Masaba tun ye min sɛbɛn fɔlɔ la, a y'o ɲɔgɔn sɛbɛn walaka nunu kan. Sariya tan lo, a tun ye minw fɔ aw ye kulu kan tasuma cɛma, lajɛnlon na. O kɔ, a y'u di n ma.

⁵Ne jigira ka bɔ kulu nin kan, ka na u bila kɛsu nin kɔnɔ n tun ye min dilan. U tora yen i ko Masaba tun y'a fɔ ne ɲana cogo min na.

⁶ «Isirayɛlidenw bɔra Bɛneyakan mara kɔlɔnw daa la ka taga Mɔsera. Arɔn sara o yɔrɔ la, a suu donna yen fana. A dencɛ Eleyazari y'a nɔɔ ta sarakalasebaara la.

⁷U bɔra o yɔrɔ la tugu ka taga Gudugoda, ka bɔ o yɔrɔ la fana ka taga Yɔtibata, kɔɔw be o mara nin kɔnɔ.

⁸ «O waati la, Masaba ye baara dɔ kalifa Levi kɔmɔgɔw ma, o ye Masaba ka layidu taamasiɲɛ kɛsu tako ye, ani ka to a ɲakɔrɔ ka baara kɛ a ye, ani ka dubaw kɛ jama ye a tɔgɔ la. Olu b'o baara nin kɛra halibi.

⁹O kama, Levi kɔmɔgɔw ma niyɔrɔ sɔrɔ dugukolo tilannin na u badenw cɛma. U niyɔrɔ ye ka baara kɛ Masaba ye, i ko Masaba aw ka Ala y'a fɔ u ye cogo min na.

¹⁰ «A kɛra ten, ne tun tora kulu kan tile bi naani ani suu bi naani i n'a fɔ fɔlɔfɔlɔ. Masaba ye ne ka daalili minɛ o waati la tugu. A ma sɔn k'aw faga.

¹¹A y'a ɲini ne fɛ ko n ka wili ka bila jama nin ɲa, ka don n'u ye jamana nin kɔnɔ, ale tun ye o min layidu ta u bɛmaw ye ko a ben'a di u ma.

¹²«Isirayɛlidenw, sisan Masaba aw ka Ala be mun kɔnɔna aw fɛ, n'a ma kɛ ko aw ka siran a ɲa, k'a ka siraw bɛɛ taama, ani k'a koo diya aw ye, ka baara kɛ a ye sɔbɛ la n'aw dusu bɛɛ ye?

¹³A b'a fɛ fana aw k'a ka sariya ni ciiw bato. Ne be minw fɔra aw ye bii aw ka hɛrɛ kosɔn.

¹⁴«Sankolo n'a boɲa bɛɛ, ni dugukolo, n'a kɔnɔnafɛnw bɛɛ ye Masaba aw ka Ala ta ye.

¹⁵Masaba tun be aw bɛmaw dama fɛ, olu koo diyar'a ye. Aw minw ye u kɔmɔgɔw ye, a y'aw woloma siyaw bɛɛ cɛma i n'a fɔ a be cogo min na bii.

¹⁶O la, aw k'aw yɛrɛ bɛɛ di Masaba aw ka Ala ma, [1] aw kana tulogwɛlɛya kɛ tugu,

¹⁷ bari batofɛn bɛɛ ka Ala lo, matigiw ka Matigi lo, a ka bon, see b'a ye, siranyafɛn lo. A te mɔgɔ woloma, boɲafɛn t'a ɲagami.

¹⁸A be falatɔw ni firiyamusow ka tiɲɛ fɔ. Lonanw koo ka d'a ye, a be dumuni ni faniw d'u ma.

¹⁹Lonan minw siginin be aw cɛma, olu koo ka diya aw ye, bari aw tun ye lonanw ye Ezipiti fana.

²⁰«Aw ka siran Masaba aw ka Ala ɲa, k'a bato. Aw nɔrɔnin ka to ale kelen na. N'aw be kali, aw k'o kɛ ale tɔgɔ la.

²¹Ale lo ye aw ka boɲa sababu ye, ale kelen le y'aw ka Ala ye, min ye kabakobabaw ni siranyakow kɛ aw ye, aw yɛrɛ y'u ye.

²² Tuma min na aw bɛmaw tun be tagara Ezipiti, u tun ye mɔgɔ bi wolonwula ye dɔrɔn, nga sisan, Masaba aw ka Ala y'aw caya i n'a fɔ lolow.