Read dyu Sariya diko filanan kitabu 11 Bible Online

Sariya diko filanan kitabu 11 - dyu bible

Sariya diko filanan kitabu 11

¹«Masaba aw ka Ala koo ka diya aw ye. A be min ɲini aw fɛ, aw k'o kɛ, k'a ka sariyaw, n'a ka landaw n'a ka ciiw bato loon bɛɛ.

²«Aw kɔni be o koow lɔn, n kaan te aw deenw ma, olu m'u ye, u m'u lɔn. Aw ye Masaba aw ka Ala ka ladili sɔrɔ. Min ye a ka boɲa, n'a ka fangatigiya ani a ka setigiya ye,

³ ani a ye taamasiɲɛ ni kɛwali minw kɛ Ezipiti jamana kɔnɔ, Ezipiti masacɛ n'a ka jamana bɛɛ la,

⁴ a ye min kɛ Ezipiti kɛlɛdenw n'u ka soow, ani u ka wotorow la tuma min na u tun be tugura aw kɔ. A y'a kɛ Buruku kɔgɔji y'u halaki. Masaba y'u ta cɛn pewu.

⁵«A ye fɛɛn min kɛ k'an to kongokolon kɔnɔ, fɔɔ ka na se yan, aw b'o lɔn.

⁶ «A y'a kɛ dugukolo pɛrɛnna ka Urubɛn kɔmɔgɔ Eliyabu deen Datan ni Abiramu n'u ka denbaya bɛɛ kunun, ani u ka fanibuguw, ani fɛɛn o fɛɛn tun tugura u kɔ, Isirayɛlidenw bɛɛ ɲana.

⁷«Masaba ye koba minw bɛɛ kɛ, aw ɲaa y'o ye.

⁸Ne be kuma min bɛɛ fɔra aw ye bii, aw k'u bato janko aw ka se ka fanga sɔrɔ, ka se ka jamana nin minɛ, aw bena Zurudɛn baji tigɛ ka don min kɔnɔ.

⁹Aw k'u bato janko aw ka sijan sɔrɔ jamana nin kɔnɔ, Masaba tun ye min layidu ta aw bɛmaw ye, ani u kɔmɔgɔw, ko a ben'a di aw ma. Nɔnɔ ni lii ka ca o yɔrɔ la kosɔbɛ, jamana diman lo.

¹⁰«Tiɲɛ na, aw bena don jamana min kɔnɔ k'a minɛ, o te i n'a fɔ Ezipiti jamana, aw bɔra min kɔnɔ. O yɔrɔ la, aw tun be to ka suman seri, o kɔ, aw be jisira yɛlɛ n'aw seen ye.

¹¹Aw bena Zurudɛn baji tigɛ ka don jamana min na, kuluw be yen, kɔkɛnɛw fana be yen, sanji le be ben o yɔrɔ la.

¹²Jamana min lo, Masaba aw ka Ala b'a hakili to a la, a b'a kɔlɔsi tuma bɛɛ, k'a ta saan daminɛ ma fɔɔ a laban ma.

¹³ Ne be kuma min fɔra aw ye bii, n'aw y'u bato tiɲɛ na, ka Masaba aw ka Ala kanu k'a bato sɔbɛ la n'aw dusu bɛɛ ye,

¹⁴sanji bena ben aw ka dugukolo kan a waati la, samiɲa dontuma n'a bantuma na, janko aw ka se ka suman sɔrɔ, ani duvɛnkɛnɛ, ni tulu.

¹⁵A ben'a kɛ biin fana be falen kongo kɔnɔ aw ka begɛnw ye. Aw bena dumuni kɛ ka fa.

¹⁶«Aw k'aw yɛrɛ minɛ kosɔbɛ, aw kana jɛngɛ ka bɔ siratilennin kan, ka fɛɛn wɛrɛw bato, ani k'aw kunbiri gwan u kɔrɔ.

¹⁷Bari o ben'a kɛ Masaba be dimi aw kɔrɔ, ani ka sanji minɛ, sanji tena ben tugu, suman tena ɲa dugukolo kan tugu, aw bena halaki ka bɔ jamanaɲuman nin kɔnɔ pɛwu, Masaba be min dira aw ma.

¹⁸«Ne be kuma minw fɔra aw ye, aw k'u to aw dusu la, n'aw hakili la. Aw k'u kɛ taamasiɲɛ ye k'u siri aw bolo n'aw teen na.

¹⁹Aw k'aw deenw kalan o la, k'aw to aw ka soo kɔnɔ, walima n'aw be taama sira kan, ani aw latuma na, n'aw wilituma na, aw k'u fɔ u ye.

²⁰ Aw k'u sɛbɛn aw ka soo dalakonw, n'aw ka dugu dondaw la,

²¹janko aw, n'aw deenw ka se ka sijan sɔrɔ jamana nin kɔnɔ, ni diɲɛ ma wili, Masaba tun ye min layidu ta aw bɛmaw ye, ko a ben'a di u ma.

²²«Ɔnhɔn, ne be koo min fɔra aw ye, n'aw y'o bɛɛ bato ka ɲa, ka Masaba aw ka Ala koo diya aw ye, ani k'a ka siraw bɛɛ taama, ka nɔrɔ a la,

²³Masaba bena siya nunu bɛɛ gwɛn ka bɔ aw ɲa, ani siya minw ka ca n'aw ye, n'u barika ka bon n'aw ta ye, aw bena olu gwɛn, k'u ka jamana minɛ.

²⁴ Aw seen mana la yɔrɔ min bɛɛ la, o bena kɛ aw ta ye, k'a daminɛ kongokolon ma worodugu ɲafan na fɔɔ ka ta'a bila Liban kuluyɔrɔ ma kɔgɔdugu fɛ. Ani k'a ta Efarati baji ma kɔrɔn fɛ, ka ta'a bila kɔgɔji la tileben fɛ.

²⁵Mɔgɔ si tena se ka lɔ aw ɲa. Aw bena taga yɔrɔ o yɔrɔ, Masaba ben'a kɛ o yɔrɔ mɔgɔw be siran ani ka yɛrɛyɛrɛ aw ɲa i n'a fɔ a y'a daa di aw ma cogo min na.

²⁶«Aw ye mɛnni kɛ, ne b'a fɔ aw ye bii ko aw ka wolomani kɛ duba ni danga cɛ.

²⁷N'aw ye Masaba aw ka Ala ka kuma bato, ne be minw fɔra aw ye bii, aw bena dubaw sɔrɔ.

²⁸Nga n'aw m'a ka kuma bato, n'aw banna k'a ka sira taama, ne be min yirala aw la bii, n'aw tagara fɛɛn wɛrɛw bato aw te minw lɔn, aw bena danga sɔrɔ.

²⁹ «Ni Masaba aw ka Ala y'a kɛ aw donna jamana nin kɔnɔ tuma min na, aw bena min minɛ, aw ka kan ka lɔ Garizimu kulu kan ka duba kɛ, ani ka danga kɛ Ebali kulu kan.

³⁰O kulu nunu be sɔrɔ Zurudɛn baji kɔfɛ. Sira min be taga tileben fɛ, o kɔfɛ. Kanaan minw be Araba mara la, olu ka jamana lo, u be Giligali gɛrɛfɛ, More joyiribaw gɛrɛfɛ.

³¹«Aw bena Zurudɛn baji tigɛ ka taga jamana nin minɛ, Masaba aw ka Ala be min dira aw ma. Aw bena o kɛ aw ta ye, ka sigi a kɔnɔ.

³²Ne ye sariyaw ni landa minw bɛɛ fɔ aw ye bii, aw ka jija k'u bato.