Read dyu Sariya diko filanan kitabu 13 Bible Online

Sariya diko filanan kitabu 13 - dyu bible

Sariya diko filanan kitabu 13

¹ «Aw ye jija, ne be kuma minw bɛɛ fɔra aw ye, aw k'u bato. Aw kana foyi bɔ a la, aw kana dɔ fara a kan.

²«Ni kira dɔ, walima yelikɛla dɔ mana wili aw cɛma, ka taamasiɲɛ dɔ fɔ aw ye, walima kabako dɔ,

³n'o taamasiɲɛ, walima n'o kabako kɛra ten tiɲɛ na, n'o tigi y'a ɲini aw fɛ ko aw ka taga fɛɛn wɛrɛw bato aw te minw lɔn,

⁴aw kana mɛnni kɛ a fɛ. Bari Masaba aw ka Ala le b'aw kɔrɔbɔra janko k'a lɔn ni ale koo ka di aw ye sɔbɛ la n'a ka koo be aw dusu la kosɔbɛ.

⁵Aw ka tugu Masaba aw ka Ala kɔ, ka siran a ɲa. Aw k'a ka kuma bato sɔbɛ la, k'ale kelenpe bato ka nɔrɔ a la.

⁶O kira, walima o yelikɛla nin ka kan ka faga, bari a tun b'a fɔra ko aw ka muruti Masaba aw ka Ala ma. Ale min y'aw bɔ Ezipiti jamana na jɔnya la. A b'a fɛ k'aw faran ka bɔ Masaba aw ka Ala ka sira la. Masaba ko aw ka min taama. Aw ka kan ka kojugu bɔ aw cɛma.

⁷«N'i baden, e ni min ye baa kelen ye, walima i dencɛ, walima i denmuso, walima i muso, min koo b'i dusu la kosɔbɛ, walima i terigwɛlɛn, n'a y'i wele dogo la ko aw ka taga fɛɛn wɛrɛw bato, aw n'aw bɛmaw te minw lɔn,

⁸minw ye aw lamini siyaw ka batofɛnw ye, minw yɔrɔ ka surun, walima minw yɔrɔ ka jan aw la, fɔɔ jamana daan na,

⁹i kana sɔn a ta ma, kana mɛnni kɛ a fɛ. Kana makari a la, kana hinɛ a la, walima k'a sutara.

¹⁰I ka kan k'a faga le. Ele le ka kan ka kɔn k'a bon ni kabakuru ye, janko k'a faga, tɔw bɛɛ be sɔrɔ k'a bon.

¹¹Aw k'a bon k'a faga, bari a b'a fɛ k'i faran ka bɔ Masaba aw ka Ala la, ale min y'aw bɔ jɔnya la, Ezipiti jamana kɔnɔ.

¹²Isirayɛlidenw bɛɛ bena o mɛn, u bena siran. U tena o kojugu nin ɲɔgɔn kɛ tugu fewu.

¹³«Masaba aw ka Ala be dugu minw dira aw ma ka kɛ aw ka sigiyɔrɔ ye, n'aw y'a mɛn olu dɔ kɔnɔ

¹⁴ko mɔgɔkuntan dɔw b'aw cɛma minw y'u ka dugu mɔgɔw bila fɛɛn wɛrɛw batoli la, aw te minw lɔn,

¹⁵aw ka kan ka ɲiningali kɛ, ka sɛgɛsɛgɛli kɛ sɔbɛ la, k'a lɔn ni tiɲɛ lo. N'a lɔnna ko kokolon nin kɛra aw cɛma tiɲɛ na,

¹⁶aw b'o dugu nin mɔgɔw bɛɛ faga ni murujan ye. Aw ka dugu nin n'a kɔnɔnafɛnw bɛɛ halaki pewu ka kɛ Masaba ta ye, begɛn fara mɔgɔw kan.

¹⁷Aw k'o dugu nafolo bɛɛ cɛ k'o kɛ ɲɔgɔn kan forobayɔrɔ la k'a jɛni pepewu, ka dugu nin fana jɛni Masaba aw ka Ala ye. O yɔrɔ bena kɛ tomo ye, dugu nin tena sigi tugu abada.

¹⁸Fɛɛn minw ka kan ka halaki ka kɛ Masaba ta ye, aw man kan ka maga olu si la janko Masaba ka dimi fariman ka ban. A ben'a ka ɲumanya yira aw la, ka makari aw la, k'aw caya, i n'a fɔ a y'a layidu ta aw bɛmaw ye cogo min na.

¹⁹Bari aw ye mɛnni kɛ a fɛ, k'a ka kuma bɛɛ bato, ne be minw fɔra aw ye bii, ani ka koo kɛ min tilennin lo ale ɲana.