Read dyu Sariya diko filanan kitabu 14 Bible Online

Sariya diko filanan kitabu 14 - dyu bible

Sariya diko filanan kitabu 14

¹ «Aw ye Masaba aw ka Ala deenw ye. Ni mɔgɔ sara aw fɛ, aw kana aw fari yɔrɔ dɔ tigɛ, aw fana kana aw tenda li,

² bari aw ye siya ye min ye Masaba aw ka Ala ta ye. A y'aw woloma siya tɔw bɛɛ cɛma dugukolo kan, janko aw ka kɛ a yɛrɛ tɔgɔla jama ye.

³ «Fɛɛn o fɛɛn ye tanafɛn ye, aw man kan k'o dumu.

⁴«Aw be se ka sogo minw ɲimi, olu filɛ nin ye: misi, saga, baa,

⁵mankalanin, ni minan, ni koon ani kongobaa ni sigi ani tankon ni ja,

⁶ani fɛɛn o fɛɛn sɔnnifara farannin lo ka kɛ fila ye, n'u be u ka dumuni yɛlɛma k'a ɲimi.

⁷«Nga, minw b'u ka dumuni yɛlɛma k'a ɲimi tugu, ni minw sɔnnifara ye fila ye, aw man kan ka minw ɲimi olu cɛma, u filɛ nin ye: ɲɔgɔmɛ, sonsannin, ni farawoɲinan. Olu b'u ka dumuni yɛlɛma k'a ɲimi, nga u sɔnnifara te fila ye. Olu ye tanafɛnw ye aw fɛ.

⁸Lɛɛ sɔnnifara ye fila ye, nga a t'a ka dumuni yɛlɛma. Ale fana ye tanafɛn ye aw fɛ. Aw kan'a sogo ɲimi, walima ka maga a suu la.

⁹«Jilafɛnw bɛɛ cɛma, gaman ni fara be minw fɛ, aw be se k'olu dumu.

¹⁰Nga gaman ni fara te minw fɛ, aw man kan k'olu dumu. Olu ye tanafɛnw ye aw fɛ.

¹¹«Kɔnɔ minw bɛɛ saniyanin lo, aw be se k'olu ɲimi.

¹²Kɔnɔw cɛma, minw koo ka kan ka goya aw ye, n'aw man kan k'u sogo ɲimi, olu filɛ nin ye: bɔɔn sifa bɛɛ, gingin sifa bɛɛ, sɛgɛn sifa bɛɛ, duba sifa bɛɛ, ni kaankaan, ni kɔnɔsogolon, ni jigɛdumukɔnɔ sifa bɛɛ, ni tonsow, ani u be kɔnɔ min wele ko hupe. [1]

¹⁹Gaman be fɛnmisɛn minw bɛɛ la, olu y'aw tana ye, aw man kan k'u ɲimi.

²⁰Gaman be fɛɛn minw bɛɛ la, n'u saniyanin lo, aw be se k'olu ɲimi.

²¹ «Fɛɛn min sar'a yɛrɛ ma, aw man kan k'o sogo ɲimi. Lonan minw siginin be aw ka duguw la, aw k'a di olu ma, u k'a ɲimi, walima aw be se k'a feere lonan wɛrɛw ma. Aw ye Masaba an ka Ala ta ye. Aw man kan ka baden tobi a bamuso nɔnɔ na.

²² «Saan o saan, aw bena suman min bɛɛ sɔrɔ aw ka forow kɔnɔ, aw k'o jaka bɔ.

²³Masaba aw ka Ala bena yɔrɔ min woloma ka sigi yen, aw k'aw ka suman jaka, ni duvɛnkɛnɛ, ani tulu jaka dumu a ɲakɔrɔ o yɔrɔ la, n'aw ka dabaw ni begɛnmisɛnw deenw fɔlɔw, janko aw ka se ka siran Masaba aw ka Ala ɲa tuma bɛɛ.

²⁴Ni Masaba aw ka Ala y'aw sɔn kosɔbɛ, n'aw tena se ka taga n'o jaka ye Masaba ka yɔrɔ wolomanin nin na bari a ka jan,

²⁵o tuma na, aw ka jaka nunu feere, ka taga n'a wari ye Masaba aw ka Ala ka yɔrɔ wolomanin nin na.

²⁶Aw be se k'aw sagolafɛn san n'o wari ye o yɔrɔ la, a kɛra daba, walima begɛnmisɛn ye wo, walima duvɛn, walima minnifɛn fariman, walima fɛɛn minw bɛɛ koo ka d'aw ye. Aw n'aw somɔgɔw k'o dumu Masaba ɲakɔrɔ ka nisɔndiya.

²⁷Levi kɔmɔgɔ minw b'aw ka duguw kɔnɔ, aw kana tulon kɛ ni olu ka koo ye, bari u ma niyɔrɔ sɔrɔ dugukolo nin na aw cɛma.

²⁸«Saan saba o saan saba, aw bena bɔ n'aw ka jaka bɛɛ ye o saan nin fɛɛn sɔrɔtaw la, k'o bila aw ka duguw kɔnɔ,

²⁹janko Levi kɔmɔgɔw, minw te ni dugukolo ye aw cɛma, ka se ka na, olu ni lonanw, ani falatɔw, ni firiyamuso minw be aw ka duguw kɔnɔ. U bena dumuni kɛ ka fa. O la, Masaba aw ka Ala bena aw dɛmɛ aw ka kokɛtaw bɛɛ la.