Read dyu Sariya diko filanan kitabu 16 Bible Online

Sariya diko filanan kitabu 16 - dyu bible

Sariya diko filanan kitabu 16

¹«Aw kana ɲinɛ ka *Hɔrɔnya ɲanagwɛ kɛ ka Masaba aw ka Ala boɲa *Abibu kalo la. Bari Masaba y'aw bɔ Ezipiti o kalo nin na, sufɛ.

²Hɔrɔnya ɲanagwɛ la, aw ka begɛnmisɛnw ni misiw kɛ saraka ye Masaba aw ka Ala ye, a ka yɔrɔ wolomanin na. A ye min kɛ a ka sigiyɔrɔ ye.

³Aw kana buru dumu fununan be min na ɲanagwɛ nin na. Fununan te buru min na, aw k'o dumu tile wolonwula kɔnɔ. Aw k'o dusukasiburu dumu, janko aw hakili ka to aw bɔcogo la Ezipiti aw sii bɛɛ la, bari aw karabara ka bɔ yen.

⁴O tile wolonwula kɔnɔ, burufununan foyi man kan ka ye aw fɛ aw ka mara kɔnɔ. Aw be begɛn min bɔ saraka ye loon fɔlɔ wuladafɛ, aw kana o sogo si mara fɔɔ dugu ka gwɛ k'o sɔrɔ.

⁵Masaba aw ka Ala bena dugu minw di aw ma, aw man kan ka Hɔrɔnya ɲanagwɛ saraka bɔ o bɛɛ kɔnɔ,

⁶fɔɔ a ka yɔrɔ wolomanin dama na, a ye min kɛ a ka sigiyɔrɔ ye. Saan o saan, o saraka nin bena bɔ wulafɛ, tile benwaati la ka kɛɲɛ n'aw bɔtuma ye Ezipiti.

⁷Aw k'o sogo yiran, k'a ɲimi Masaba aw ka Ala ka yɔrɔ wolomanin na. O dugusagwɛ sɔgɔma, aw bena segi ka taga aw ka sigiyɔrɔw la.

⁸Fununan te buru min na, aw k'o dumu tile wɔɔrɔ kɔnɔ. Tile wolonwulanan loon, aw ka ɲɔgɔn lajɛn ka Masaba aw ka Ala bato, aw kana baara foyi kɛ.

⁹«Aw ka lɔgɔkun wolonwula jati k'a ta sumantigɛ daminɛlon ma.

¹⁰O kɔ, aw ka Sumanladon ɲanagwɛ kɛ ka Masaba aw ka Ala boɲa. Aw ka na ni boɲafɛnw ye ka kɛɲɛ n'a ka dɛmɛ ye aw faan fɛ.

¹¹Masaba aw ka Ala bena yɔrɔ min woloma k'o kɛ a ka sigiyɔrɔ ye, aw ka nisɔndiya a ɲakɔrɔ o yɔrɔ la. Aw, n'aw dencɛw, n'aw denmusow, ka fara aw ka baaraden cɛman ni musomanw kan, ani Levi kɔmɔgɔ minw be aw ka duguw kɔnɔ, ni lonanw, ni falatɔw, ani firiyamuso minw be aw cɛma.

¹²Aw k'aw hakili jigi a la ko aw tun ye jɔɔnw ye Ezipiti. Aw k'aw jija ka sariya kuma nunu mara.

¹³«N'aw tilara sumangosi la, ani *ɛrɛzɛnji bɔni la, aw ka *Gwatakɔrɔsigi ɲanagwɛ kɛ tile wolonwula kɔnɔ.

¹⁴Aw ka ɲanagwɛ kɛ ka nisɔndiya, aw n'aw dencɛw, n'aw denmusow, ni aw ka baaradenw, a cɛman fara a musomanw kan. Ani Levi kɔmɔgɔw, ni lonanw, ani falatɔw, ni firiyamuso minw be aw ka duguw kɔnɔ.

¹⁵Aw k'o kɛ tile wolonwula kɔnɔ ka Masaba aw ka Ala boɲa a ka yɔrɔ wolomanin na. Bari Masaba aw ka Ala bena aw ka sumanw bɛɛ ɲa ani ka see d'aw ma aw ka kokɛta bɛɛ la, aw nisɔn bena diya kosɔbɛ.

¹⁶«Saan o saan, cɛɛ bɛɛ ka kan ka taga u yɛrɛ yira siɲɛ saba Masaba aw ka Ala ɲakɔrɔ a ka yɔrɔ wolomanin na: *Buru funubali ɲanagwɛ tuma na, ani Sumanladon ɲanagwɛ, ani Gwatakɔrɔsigi ta tuma na. U kana taga Masaba ɲakɔrɔ u bololakolon.

¹⁷Bɛɛ ka kan ka taga n'a ka boɲafɛn ye ka kɛɲɛ ni Masaba aw ka Ala ka dɛmɛ ye.

¹⁸«Dugu kelen kelen bɛɛ kɔnɔ aw ka maraw kɔnɔ, Masaba aw ka Ala be minw dira aw ma, aw ka kititigɛlaw ni ɲamɔgɔw woloma, k'u sigi janko u ka se ka kiti tigɛ ni tilenninya ye jama cɛma.

¹⁹«Aw kana kiti si tigɛ k'a cɛn. Aw kana wolomani kɛ kiti la, aw kana boɲafɛn minɛ fana k'aw yɛrɛ daa siri n'o ye. Bari o fɛɛn nunu le be lɔnnikɛla hakili yɛlɛma, ka mɔgɔtilenninw ka tilenninya ɲagami.

²⁰Aw ka banba ka tilenninya dama kɛ, o la, Masaba aw ka Ala be jamana min dira aw ma, aw ɲanaman ka to aw ka se k'o minɛ.

²¹«Aw bena sarakabɔyɔrɔ min lɔ Masaba aw ka Ala ye, aw kana *Asera jaa foyi tutu o gɛrɛfɛ.

²²Aw kana jokabakurulama lɔ fana, bari u koo man di Masaba aw ka Ala ye.