Read dyu Sariya diko filanan kitabu 17 Bible Online

Sariya diko filanan kitabu 17 - dyu bible

Sariya diko filanan kitabu 17

¹«Nɔɔ, walima fiɲɛ, be tura, walima saga min na, aw kana o kɛ saraka ye Masaba aw ka Ala ye, bari o man d'a ye fewu.

²«Masaba aw ka Ala be dugu minw dira aw ma, ni cɛɛ, walima muso dɔ sɔrɔla aw cɛma o dɔ kɔnɔ, n'a ye koo dɔ kɛ min ye kojugu ye Masaba aw ka Ala ɲakɔrɔ, ka Ala ka bɛɛn cɛn,

³ ka taga fɛɛn wɛrɛw bato, k'a kunbiri gwan u kɔrɔ, min be danna ne ka fɔta la, walima ka tile bato, walima kalo, walima lolow,

⁴n'aw y'o koo mɛn dɔrɔn, aw ka sɛgɛsɛgɛli kɛ kosɔbɛ. N'a lɔnna k'o kokolon nin kɛra tiɲɛ na Isirayɛlidenw cɛma,

⁵o kojugu nin kɛbaga mana kɛ muso, walima cɛɛ ye wo, aw k'a minɛ ka taga n'a ye dugu donda la, k'a bon ni kabakuru ye k'a faga.

⁶ Mɔgɔ min ka jalaki ser'a fagako ma, o tigi be se ka faga ni seere mɔgɔ fila, walima saba sɔrɔla. N'o tɛ, a te se ka faga seere kelen kosɔn.

⁷ Seerew le ka kan ka kɔn k'a tigi bon ni kabakuru ye, mɔgɔ tɔw bɛɛ ka sɔrɔ ka fara u kan, k'a faga. O la, aw bena kojugu bɔ aw cɛma.

⁸«Ni kiti dɔ gwɛlɛyara aw fɛ, i n'a fɔ mɔgɔfagako, walima sɔsɔliko dɔ, walima dɔ k'a tɔɲɔgɔn mandimi, aw ka kan ka taga n'o ye Masaba aw ka Ala ka yɔrɔ wolomanin na.

⁹Aw ka sarakalasebagaw ye, minw ye Levi kɔmɔgɔw ye, k'u ɲininga, ani kititigɛla min be yen o waati la. Olu bena kiti nin tigɛ aw ye.

¹⁰U bena min fɔ aw ɲana Masaba ka yɔrɔ wolomanin na, aw k'o kɛ. Aw ka banba k'u ka fɔta bɛɛ kɛ.

¹¹U bena min latigɛ k'a fɔ aw ye, aw kana jɛngɛ cogo si la ka bɔ o kan.

¹²«Sarakalasebaga min b'a ka baara kɛ Masaba aw ka Ala ɲakɔrɔ, ni mɔgɔ dɔ y'a ɲaa don ale la, walima kititigɛla la, ka koo dɔ kɛ n'a ma mɛnni kɛ u fɛ, o tigi ka kan ka faga. O la, aw bena kojugu bɔ Isirayɛlidenw cɛma.

¹³Jama bɛɛ bena o koo mɛn, u bena siran, u si tena sɔn ka ɲadonya kɛ tugu.

¹⁴ «Masaba aw ka Ala be jamana min dira aw ma, n'aw donna o kɔnɔ tuma min na k'a kɛ aw ta ye ani ka sigi yen, n'aw b'a fɛ ka masacɛ sigi aw kunna, i n'a fɔ siya minw bɛɛ b'aw lamini na,

¹⁵Masaba aw ka Ala bena mɔgɔ min woloma, aw ka banba k'ale kɛ aw ka masacɛ ye. A ka kan ka kɛ aw balima dɔ ye. Aw kana lonan sigi aw kunna, ale te aw dɔ ye.

¹⁶ «Ka fara o kan, o masacɛ nin man kan ka kɛ ni soo caaman ye, a man kan ka mɔgɔ ci ka segi ka taga Ezipiti ka soo dɔw san, bari Masaba y'a fɔ aw ye ko aw man kan ka segi ka taga o yɔrɔ la tugu.

¹⁷ A man kan ka kɛ muso caaman tigi ye, janko u kan'a kunnacɛn. A man kan ka kɛ warigwɛ ni sanu caaman tigi ye fana.

¹⁸«N'a sigira masaya la tuma min na, sariya min be sarakalasebagaw fɛ, minw ye Levi kɔmɔgɔw ye, a ka kan ka sɛbɛ dɔ ta k'o sariya nin sɛbɛn a kɔnɔ k'o kɛ a yɛrɛ ta ye.

¹⁹A k'o bila a yɛrɛ gɛrɛfɛ, ka to k'a kalan loon bɛɛ a sii bɛɛ kɔnɔ, waasa a ka se ka siran Masaba a ka Ala ɲa, ani ka sariya nin kɔnɔnakuma n'a ka fɔta bɛɛ bato.

²⁰O la, a ten'a yɛrɛ boɲa n'a balimaw ye, ka ban ka sariya bato cogo si la. O la, a n'a kɔmɔgɔw bena mɛn Isirayɛli kunna.