Read dyu Sariya diko filanan kitabu 19 Bible Online

Sariya diko filanan kitabu 19 - dyu bible

Sariya diko filanan kitabu 19

¹«Masaba aw ka Ala be siya minw ka jamana d'aw ma, n'aw ye olu halaki ka ban tuma min na ka sigi u ka duguw n'u ka soow kɔnɔ,

²a bena jamana min di aw ma, aw bena dugu saba woloma o kɔnɔ minw be a cɛmancɛ la, k'o bila.

³Aw bena jamana nin tilan saba ye, ka siraw dilan ka taga n'o ye dugu saba nunu na janko ni mɔgɔ dɔ y'a tɔɲɔgɔn faga, a ka se ka boli ka ta'a kalifa o yɔrɔ la.

⁴«Mɔgɔfagala min be se ka boli ka ta'a kalifa dugu nunu dɔ kɔnɔ, janko k'a yɛrɛ kisi, o filɛ nin ye: Ni mɔgɔ dɔ y'a tɔɲɔgɔn faga, k'a sɔrɔ a tun m'a lawili o ma, n'a tun m'a kɔniya ka kɔrɔ.

⁵N'a kɛra ko mɔgɔ dɔ bɔra ka taga tuu kɔnɔ, yiri tigɛyɔrɔ la n'a tɔɲɔgɔn ye, k'o to yiritigɛ la ni jende ye, ni jendeden bɔr'a kala la ka ta'a tɔɲɔgɔn nin sɔrɔ, n'a sara, o tigi be se ka boli ka taga dugu nunu dɔ kɔnɔ k'a yɛrɛ nii kisi.

⁶O la, mɔgɔ min sara, ale ka mɔgɔ dimininba te se k'a kɔgwɛn k'a sɔrɔ sira la k'a faga, sira ka jaɲa kosɔn, bari a man kan ni fagali ye, a tun t'a tɔɲɔgɔn nin kɔniya ka kɔrɔ.

⁷O le y'a to ne b'a fɔ aw ye ko aw ka dugu saba woloma k'u to danna minw bena kɛ kalifayɔrɔw ye.

⁸«Ni Masaba aw ka Ala y'aw ka mara boɲa tuma min na, i n'a fɔ a tun y'a layidu ta aw bɛmaw ye cogo min na, n'a ye jamana nin bɛɛ di aw ma,

⁹bari ne ye kuma minw fɔ aw ye bii, aw bena o bɛɛ bato, fɔɔ Masaba aw ka Ala koo bena diya aw ye, k'a ka siraw taama, n'o kɛra, aw ka dugu saba dɔwɛrɛ fara o kan.

¹⁰O la, Masaba aw ka Ala be jamana min dira aw ma, mɔgɔ jalakibali joli kana bɔn o kɔnɔ, janko o kunko kana se aw ma.

¹¹«Nga, ni mɔgɔ dɔ b'a tɔɲɔgɔn kɔniya, k'a dɛndɛ fɔɔ ka taga ben a kan k'a faga, ka sɔrɔ ka boli ka taga dugu nunu dɔ la,

¹²a ka dugu cɛkɔrɔbaw bena mɔgɔ bila ka ta'a minɛ ka n'a di banbagatɔ mɔnɛbɔbaga ma, janko a k'a faga.

¹³Aw man kan ka makari a la. Aw ka kan ka mɔgɔ jalakibali fagako kunko bɔ aw kunna Isirayɛli kɔnɔ, o la, aw bena hɛrɛ sɔrɔ.

¹⁴ «Masaba aw ka Ala be jamana min dira aw ma k'a kɛ aw ta ye, aw bɛmaw ye daan minw bɔ aw ye ka kɛ aw niyɔrɔ ye, aw kana aw ta tɛmɛ ka don aw sigiɲɔgɔn ta la.

¹⁵ «N'a kɛra ko mɔgɔ dɔ ye kojugu dɔ kɛ, walima hakɛ dɔ, walima kodagabali sifa wɛrɛ, o tigi te se ka jalaki seere kelen ka kuma kama. Tiɲɛ be se ka lɔn seere fila, walima seere saba ka kuma le kosɔn.

¹⁶«Ni mɔgɔ dɔ ye galon la a tɔɲɔgɔn kan ko a ye kojugu dɔ kɛ,

¹⁷sarakalasebagaw ni kititigɛla minw be baara kɛ o waati la, mɔgɔ fila nunu bena taga olu fɛ Masaba ɲakɔrɔ.

¹⁸Kititigɛlaw ka kan k'o koo nin sɛgɛsɛgɛ kosɔbɛ. N'u y'a ye ko seere nin ye galon tigɛ, ko a bagara a tɔɲɔgɔn nin ma,

¹⁹a tun b'a fɛ fɛɛn min ka kɛ a tɔɲɔgɔn nin na, aw bena o kɛ ale yɛrɛ la. O la, aw bena kojugu bɔ aw cɛma.

²⁰Mɔgɔ tɔw bena o mɛn. U bena siran, u tena sɔn k'o kojugu ɲɔgɔn kɛ aw cɛma tugu.

²¹ Min ye kojugu kɛ, aw kana makari a la. Nii juru be bɔ ni nii ye. Ɲaa juru be bɔ ɲaa la. Ɲiin juru be bɔ ɲiin la. Bolo juru be bɔ bolo la. Seen juru be bɔ seen la.