Read dyu Sariya diko filanan kitabu 2 Bible Online

Sariya diko filanan kitabu 2 - dyu bible

Sariya diko filanan kitabu 2

¹ O kɔ, anw kɔsegira ka taga kongokolon faan na ni Buruku kɔgɔji sira ye i ko Masaba tun y'a fɔ ne ye cogo min na. An ye waatijan kɛ munumunu na *Seyiri kuluyɔrɔ la.

²Masaba y'a fɔ ne ye ko:

³«Aw munumununa ka mɛn kuluyɔrɔ nin na. Sisan, aw ye taga kɔgɔdugu ɲafan na.

⁴ A fɔ jama ye ko: ‹Aw ka taga, aw bena tɛmɛ aw balimaw ka mara la, minw ye Ezawu kɔmɔgɔw ye. U siginin be Seyiri mara la. U bena siran aw ɲa, nga aw k'aw yɛrɛ kɔlɔsi kosɔbɛ.

⁵Aw kana u kɛlɛ, bari ne tena foyi d'aw ma u ka mara la, hali seen layɔrɔ yɛrɛ. Ne ye Seyiri kuluyɔrɔ di Ezawu ma ka kɛ a ta ye.

⁶Aw ka kan ka warigwɛ falen dumuni na, ani aw ka minji fana.

⁷Bari ne Masaba aw ka Ala y'aw ta ɲa aw ka kokɛtaw bɛɛ la. Ne y'aw kɔlɔsi aw ka taama na kongokolonba nin kɔnɔ. A saan bi naani filɛ nin ye ni ne Masaba aw ka Ala be n'aw ye, aw ma dɛsɛ foyi si la.› »

⁸An balimaw, Ezawu kɔmɔgɔw, minw siginin be Seyiri mara la, an ye olu to yen, ani Araba sira, min be bɔ Ɛlati ni Esiyɔngebɛri, ka yɛlɛma ka taga Mowabu kongokolon sira ta.

⁹ Masaba y'a fɔ n ye ko an kana maga mowabuw la, ko an kana u kɛlɛ, ko bari ale tena foyi d'an ma u ka mara kɔnɔ. Ko ale ye Ari mara di Lɔti kɔmɔgɔw ma.

¹⁰Fɔlɔfɔlɔ, emiw le tun siginin be o yɔrɔ la, fanga tun b'u la, u fana tun ka ca, u tun ka janjan i n'a fɔ anakiw.

¹¹Mɔgɔw tun be anakiw jati erefaw ye cogo min na, u tun b'u jati ten fana. Nga mowabuw tun be to k'o wele ko emiw.

¹²Oriw fana tun siginin be Seyiri mara la fɔlɔfɔlɔ. Nga Ezawu kɔmɔgɔw y'u gwɛn k'u halaki ani ka sigi u nɔɔ na, i n'a fɔ Isirayɛlidenw y'a kɛ cogo min na u ka jamana nin kɔnɔ, Masaba ye min d'u ma.

¹³Masaba y'a fɔ ko: «Sisan aw ye wili ka Zerɛdi kɔɔ tigɛ.» O la, an y'a tigɛ.

¹⁴ An ye waati min kɛ k'a ta an bɔtuma ma Kadɛsi Barineya ka taga Zerɛdi kɔɔ tigɛ, o kɛra saan bi saba ni seegi ye. Mɔgɔ minw tun be se ka taga kɛlɛ la jama cɛma, o y'a sɔrɔ olu bɛɛ sara, i ko Masaba tun y'a fɔ u ye k'a gwɛlɛya cogo min na.

¹⁵Masaba y'u halaki ka bɔ jama cɛma fɔɔ u bɛɛ banna pewu.

¹⁶Mɔgɔ minw tun be se ka taga kɛlɛ la, olu bɛɛ sara ka ban tuma min na,

¹⁷Masaba y'a fɔ n ye ko:

¹⁸«Aw ka kan ka Mowabu mara daan tɛmɛ bii, Ari yɔrɔ la.

¹⁹ Aw bena se amoriw ma, aw kana maga u la, aw kana u kɛlɛ, bari ne tena foyi d'aw ma amoriw ka mara la. Ne y'o di Lɔti kɔmɔgɔw ma.»

²⁰O yɔrɔ fana tun jatinin be erefaw ka mara ye. Erefaw le tun siginin be yen fɔlɔfɔlɔ, amoniw tun be to k'u wele ko zamuzumuw.

²¹Barika tun b'u la, u fana tun ka ca, u tun ka janjan i n'a fɔ anakiw. Masaba y'u halaki amoniw ɲafɛ, olu y'u ka jamana minɛ ka sigi u nɔɔ na.

²²Masaba y'a kɛ ten Ezawu kɔmɔgɔw ye minw tun siginin be Seyiri mara la, a ye oriw halaki u ɲafɛ. U ye jamana nin minɛ ka sigi u nɔɔ na fɔɔ bii.

²³Abi minw tun siginin be duguw kɔnɔ fɔɔ ka taga se Gaza, Kafitɔrikaw bɔra Kafitɔri [1] ka na u halaki ka sigi u nɔɔ na.

²⁴Masaba y'a fɔ ko: «Aw ye wili ka taga Arinɔn kɔɔ tigɛ. Ɛsibɔn ka masacɛ Siŋɔn, n'o ye amoriw ye, ne y'ale n'a ka mara don aw bolo ka ban. Aw ka mara nin minɛ kabini sisan yɛrɛ. Aw ye taga cɛɛ nin kɛlɛ.

²⁵K'a daminɛ bii ma, ne ben'a kɛ dugukolo kan siyaw bɛɛ be siran aw ɲa. N'u y'aw koo mɛn dɔrɔn, u bena yɛrɛyɛrɛ. U hakili bena ɲagami aw kosɔn.»

²⁶ K'an to Kedemɔti kongokolon kɔnɔ, ne ye mɔgɔw ci Ɛsibɔn masacɛ Siŋɔn fɛ, ka bɛnkuma fɔ a ye. Ne y'a fɔ ko:

²⁷«A to an be tɛmɛ i ka mara kɔnɔ. An bena taama ni sira dɔrɔn ye, an tena faran ka don yɔrɔ si.

²⁸An bena dumuni min dumu, ani ka jii min min, an bena o falen warigwɛ la i fɛ. A to an ka tɛmɛ seen na dama.

²⁹Ezawu kɔmɔgɔw y'o ɲɔgɔn le kɛ an ye, minw siginin be *Seyiri mara la, ani Mowabuw fana, minw siginin be Ari. E fana ka sɔn an be tɛmɛ ten, fɔɔ ka taga Zurudɛn baji tigɛ ka don jamana kɔnɔ, Masaba an ka Ala ye min d'an ma.»

³⁰Nga Ɛsibɔn masacɛ Siŋɔn tun ma sɔn an ka tɛmɛ a ka mara kɔnɔ, bari Masaba aw ka Ala y'a kɛ a y'a dusu gwɛlɛya kosɔbɛ, janko ka se k'a don aw bolo i n'a fɔ aw ɲaa b'a la cogo min na bii.

³¹Masaba y'a fɔ ne ye ko: «A filɛ, ne daminɛna ka masacɛ Siŋɔn n'a ka mara don aw bolo. Kabini sisan, aw ka mara nin minɛ k'a kɛ aw ta ye.»

³²Siŋɔn bɔra n'a ka jama bɛɛ ye k'an kunbɛn, ko a b'an kɛlɛ Yaasi.

³³Masaba an ka Ala y'a don an bolo, an ser'a kɔrɔ, n'a deenw, n'a ka jama bɛɛ.

³⁴O tuma na, an y'a ka duguw bɛɛ minɛ k'o kɔnɔfɛnw halaki pewu k'u kɛ Masaba ta ye, muso fara cɛɛw ni denmisɛnw kan, hali mɔgɔ kelen ma to.

³⁵An y'u ka begɛnw minɛ, k'u bololafɛnw dama ta.

³⁶K'a ta Arowɛri ma o min be Arinɔn kɔɔ daa la, ani dugu min be kɔkɛnɛ na fɔɔ Galaadi. Dugu ma sɔrɔ min fanga tun ka bon ka tɛmɛ anw ta kan. Masaba an ka Ala y'u bɛɛ don an bolo.

³⁷Amoniw ka jamana dɔrɔn le tora, aw ma maga o min na, k'a ta Yabɔki kɔdaw la, ani dugu minw be kuluyɔrɔ la, Masaba an ka Ala tun y'a fɔ ko an kana maga o minw na.