Read dyu Sariya diko filanan kitabu 21 Bible Online

Sariya diko filanan kitabu 21 - dyu bible

Sariya diko filanan kitabu 21

¹«Masaba aw ka Ala be jamana min dira aw ma, n'aw ye mɔgɔ dɔ suu ye o yɔrɔ kongo kɔnɔ, n'a fagabaga ma ye,

²aw ka cɛkɔrɔbaw ni kititigɛlaw ka kan ka taga suu nin layɔrɔ la, k'a layɔrɔ n'a laminiduguw furancɛ jaɲa suma.

³Dugu min ka surun suu layɔrɔ la kosɔbɛ, ale cɛkɔrɔbaw bena misigweren minɛ, zuu ma la min kaan na ka baara kɛ fɔlɔ,

⁴ka taga n'a ye kɔɔ jabali dɔ daa la, sɛnɛ te kɛra yɔrɔ min na, dannifɛn fana te yen. U be misi nin kaan kari o kɔɔ kɔnɔ.

⁵«O tuma na, sarakalasebagaw, minw ye Levi kɔmɔgɔw ye, olu bena gwɛrɛ, bari Masaba aw ka Ala ye olu le woloma a ka baara kama ani ka dubaw kɛ a tɔgɔ la, olu fana le be sɔsɔli ni madimikow bɛɛ ɲanabɔ.

⁶«Dugu min ka surun suu nin na, o cɛkɔrɔbaw bɛɛ bena u bolo ko misi nin suu sanfɛ kɔɔ nin kɔnɔ,

⁷k'a fɔ ko: ‹Anw ma o tigi faga, an ɲaa fana ma la a fagabaga kan.

⁸Masaba, yafa i ka Isirayɛli jama ma, i ye min hɔrɔnya, kana u jati mɔgɔ jalakibali fagabagaw ye.› O la, u bena se k'o kunko bɔ u yɛrɛ kun.

⁹Aw bena kɛ jalakibaliw ye o mɔgɔfagako nin na, bari aw ye koɲuman kɛ Masaba ɲakɔrɔ.

¹⁰«N'aw tagara aw juguw kɛlɛ, ni Masaba aw ka Ala y'u don aw bolo, aw k'u dɔw minɛ,

¹¹n'aw dɔ ye muso dɔ ye u cɛma min cɛkaɲi, n'a koo diyar'a ye, n'a b'a fɛ k'a furu,

¹²a be taga n'a ye a ka soo kɔnɔ, muso nin k'a kuun li, k'a sɔnnifaraw tigɛ,

¹³fani min tun b'a kaan na a minɛtuma na, a k'o bɔ, a ka to o fɛ. A b'a to yen kalo kelen, a be kasi a facɛ n'a bamuso kosɔn. O kɔ, o tigi be se ka gwɛrɛ a la, k'a furu, a bena kɛ a ka muso ye.

¹⁴«N'a nigɛ nana bɔ a la, a k'a bila ka ta'a diyanayɔrɔ la. A daganin tɛ o tigi k'a feere, walima k'a kɛ jɔɔn ye, bari a jɛnna n'a ye ka tɛmɛ.

¹⁵«N'a kɛra ko muso fila be cɛɛ dɔ fɛ, ni kelen koo ka d'a ye ka tɛmɛ kelen kan, ni u kelen kelen bɛɛ ye dencɛw sɔrɔ, ni denkɔrɔba kɛra gwalemuso deen ye,

¹⁶n'a b'a fɛ k'a ka cɛɛn tilan deen nunu cɛ, a man kan ka kɔrɔya di a ka baaramuso deen ma, ka denkɔrɔba to yen, min ye gwalemuso deen ye.

¹⁷A ka kan ka gwalemuso nin deen to a ka deen kɔrɔbaya la k'a ka kɔrɔya tɔnɔ d'a ma, min ka ca ni tɔ ta ye siɲɛ fila. Bari o le y'a ka fanga taamasiɲɛ fɔlɔ ye. Kɔrɔya tɔnɔ ye a ta ye.

¹⁸«N'a kɛra ko mɔgɔ dɔ ka deen tulo ka gwɛlɛ, n'a murutinin lo, a t'a facɛ n'a bamuso ka kuma mɛn, n'u y'a ladi, n'a ma mɛnni kɛ u fɛ,

¹⁹a facɛ n'a bamuso ka kan k'a minɛ ka taga n'a ye u ka dugu cɛkɔrɔbaw fɛ dugu donda la,

²⁰k'a fɔ u ye ko: ‹An ka deen filɛ nin ye, a tulo ka gwɛlɛ, a murutinin lo, a te mɛnni kɛ an fɛ. Kakalaya ni dɔrɔtɔya dɔrɔn le ka d'a ye.›

²¹O kɔ, dugumɔgɔw bɛɛ b'a bon ni kabakuru ye fɔɔ k'a faga. O la, aw bena kojugu bɔ aw cɛma. Isirayɛlidenw bɛɛ bena o koo mɛn, u bena siran.

²²«N'a kɛra ko mɔgɔ dɔ ye hakɛ dɔ kɛ min ka kan ni fagali ye, n'aw y'a faga, n'a suu dulonna yiri kan,

²³ a suu man kan ka si yen. Aw ka kan k'a suu don o loon kelen bɛɛ, bari mɔgɔ min dulonna yiri la, o tigi ye dangaden ye Ala fɛ. Masaba aw ka Ala be jamana min dira aw ma, aw kana o nɔgɔ.