Read dyu Sariya diko filanan kitabu 22 Bible Online

Sariya diko filanan kitabu 22 - dyu bible

Sariya diko filanan kitabu 22

¹ «N'e y'i tɔɲɔgɔn dɔ ka misi, walima a ka saga yaalatɔ ye a kunfɛ, kan'a to a ka taga. Banba k'a minɛ ka taga n'a ye a tigi fɛ.

²N'a tigi yɔrɔ ka jan, walima n'i t'a tigi lɔn, i b'a minɛ ka taga n'a ye i ka soo k'a mara fɔɔ a tigi ka na a nɔɔ fɛ. N'a nana tuma min na, i b'a d'a ma.

³I k'a kɛ o cogo kelen na n'i ye mɔgɔ dɔ ka fali ye, walima a ka fani, walima fɛɛn wɛrɛ min tununa a tigi fɛ. I kana taga k'a to yen.

⁴«N'i y'i balima dɔ ka fali, walima misi bennin ye sira kan, i man kan ka taga k'a to yen, nga i k'a dɛmɛ k'a wili.

⁵«Muso man kan ka cɛfani don, cɛɛ fana man kan ka musofani don. Mɔgɔ minw b'o kɛ, olu koo man di Masaba aw ka Ala ye fewu.

⁶«K'i to sira kan, n'i ye kɔnɔ ka ɲaga ye yiri kan, walima duguma, ni deen, walima faan b'a la, ni bamusoman birinin b'a kan, i man kan ka bamusoman n'a deenw minɛ ɲɔgɔn fɛ.

⁷I ka bamusoman to ale be taga, i k'a deenw dɔrɔn minɛ. O la, i bena hɛrɛ ni sijan sɔrɔ.

⁸«N'i ye boon lɔ, i ka kogow wili sanbon kan, janko ni mɔgɔ dɔ bɔr'a sanfɛ ka ben ka sa, i ka boon kana jati mɔgɔ fagayɔrɔ ye.

⁹ «Kana fɛɛn wɛrɛ si dan i ka *ɛrɛzɛnforo kɔnɔ. N'o tɛ, suman nin bena kɛ Ala ta ye, ani ɛrɛzɛnw fana.

¹⁰Kana misi ni fali siri ɲɔgɔn fɛ ka sɛnɛ kɛ n'u ye.

¹¹N'u ye sagasi ni lɛnjese ɲagami k'a dan, i kana o fani don i kaan na.

¹² «I bena to ka jurudenninw siri i ka lankanna dakun naani nunu na.

¹³«Ni cɛɛ dɔ ye muso furu ka jɛn n'a ye, o kɔ, a nigɛ bɔr'a la,

¹⁴n'a ye galon tigɛ ka la o muso kan, k'a fɔ ko kakala lo, ko: ‹Ne y'a furu ka jɛn n'a ye, n tun m'a sɔrɔ sunguru ye, muso tun lo,›

¹⁵o ɲɔgɔnna muso nin wolobagaw bena taga dugu cɛkɔrɔbaw fɛ dugu donda la, ni dalilu ye min b'a yira ko sunguru tun lo.

¹⁶Facɛman ben'a fɔ dugu cɛkɔrɔbaw ye ko: ‹Ne ye n denmuso di furu la karimasina ma, nga a koo man d'a ye tugu.

¹⁷A y'a jalaki k'a fɔ ko ale m'a sɔrɔ sunguru ye. Nga dalilu min b'a yira ko a tun ye sunguru ye, o filɛ.› U bena fani nin walaka dugu cɛkɔrɔbaw ɲakɔrɔ.

¹⁸Dugu cɛkɔrɔbaw bena o cɛɛ minɛ k'a ɲaa gwan.

¹⁹U ben'a wajigiya a be warigwɛ kuru kɛmɛ sara muso nin facɛ ye, bari a ye Isirayɛli sunguru dafanin tɔgɔ cɛn. Muso nin fana bena to a fɛ yen. A te se k'a gwɛn abada.

²⁰«Nga n'o koo ye tiɲɛ ye, ni dalilu ma ye min b'a yira ko sunguru tun lo,

²¹u bena bɔ ni muso nin ye a facɛ ka bonda la, dugumɔgɔw ben'a bon ni kabakuru ye k'a faga, bari a ye maloyako kɛ Isirayɛlidenw cɛma. K'a to a facɛ ka soo kɔnɔ, a ye kakalaya kɛ. O la, aw bena kojugu bɔ aw cɛma.

²²«Ni cɛɛ dɔ minɛna ɲamɔgɔya kɛyɔrɔ la ni mɔgɔ wɛrɛ ka muso ye, u fila bɛɛ ka kan ka faga, cɛɛ nin, ani a lara ni muso min ye. O la, aw bena kojugu bɔ Isirayɛlidenw cɛma.

²³«Ni cɛɛ dɔ ye sunguru maminɛnin kunbɛn dugu kɔnɔ ka la n'a ye,

²⁴aw bena u minɛ ka taga n'u fila bɛɛ ye dugu donda la, k'u bon ni kabakuru ye k'u faga. Aw ka sunguru nin faga bari a tun be dugu kɔnɔ, a do ma kule ka mɔgɔ wele ka n'a dɛmɛ. Aw ka cɛɛ nin fana faga, bari a jɛnna ni mɔgɔ wɛrɛ ka muso ye. O la, aw bena kojugu bɔ aw cɛma.

²⁵«Nga n'a y'a sɔrɔ ko cɛɛ nin ye sunguru maminɛnin kunbɛn kongo kɔnɔ, ka la n'a ye fanga la, cɛɛ le ka kan ka faga.

²⁶Aw kana foyi kɛ sunguru la bari a ma hakɛ kɛ min ka kan ni fagali ye. A be i n'a fɔ cɛɛ dɔ le wilila a tɔɲɔgɔn kama, k'a faga

²⁷bari cɛɛ nin ye sunguru maminɛnin nin kunbɛn kongo kɔnɔ, sunguru nin tun kulera, nga mɔgɔ ma sɔrɔ k'a dɛmɛ.

²⁸ «Ni cɛɛ dɔ ye sunguru dɔ kunbɛn min ma cɛko lɔn fɔlɔ, n'a maminɛnin tɛ fana, k'a minɛ ka la n'a ye, n'u y'o minɛ,

²⁹cɛɛ nin bena warigwɛ kuru bi duuru di sunguru nin facɛ ma. A tun y'a wajibiya minkɛ, a ben'a furu fana, a te se k'a gwɛn fana abada.