Read dyu Sariya diko filanan kitabu 23 Bible Online

Sariya diko filanan kitabu 23 - dyu bible

Sariya diko filanan kitabu 23

¹ «Mɔgɔ si man kan k'a facɛ ka muso dɔ furu, walima ka jɛn n'a ye.

²«Ni mɔgɔ min bɛlɛkili cira, walima n'a ka cɛya tigɛnin lo, o man kan ka don Masaba ka jama cɛma.

³«Ɲamɔgɔden te se ka don Masaba ka jama cɛma, hali a deen, n'o deen fɔɔ ka taga se u kɔmɔgɔ tan ma, olu fana te se ka don.

⁴ «Amoniw ani Mowabuw te se ka don Masaba ka jama cɛma. Hali u deenw n'u ka deenw fɔɔ ka taga se u kɔmɔgɔ tan ma, olu fana te se ka don.

⁵ Bari aw bɔtuma na Ezipiti, u ma na aw kunbɛn ni dumunifɛn ni jii ye, Mowabuw ye Bewɔri dencɛ Balamu sara le ka bɔ Petɔri, Mezopotami jamana na, janko a k'aw danga.

⁶ Nga Masaba aw ka Ala ma sɔn ka mɛnni kɛ Balamu fɛ, a ye danga yɛlɛma k'a kɛ duba ye, bari aw koo ka d'a ye.

⁷O kama, k'aw to sii la, aw kana sɔn u ka ɲatagako la, walima u ka hɛrɛ sɔrɔko la.

⁸«Aw kana edɔmuw kɔniya, bari aw balimaw lo. Aw kana Ezipitikaw kɔniya fana, bari aw sigira u ka jamana kɔnɔ lonanya la.

⁹U tulomasamaw bena se ka don Masaba ka jama cɛma.

¹⁰«N'aw tagara aw juguw kɛlɛ yɔrɔ la, aw k'aw yɛrɛ kɔlɔsi kojugu bɛɛ ma.

¹¹«Ni aw dɔ nɔgɔra, k'a sababuya kɛ sufɛ nɔgɔ ye, a ka kan ka bɔ aw ka sigiyɔrɔ la, a man kan ka don tugu.

¹²Wulafɛ, a ka kan ka jii ko. O kɔ, a be se ka don aw ka sigiyɔrɔ la, tile bentuma na.

¹³«Aw ka yɔrɔ dɔ woloma, min bena kɛ aw ka sigiyɔrɔ kɔfɛ, aw be se k'aw ka banakɔtaga kɛ o yɔrɔ la.

¹⁴Aw bena to ka bɔ ni minan dɔ ye aw bolo, ni mɔgɔ dɔ ko a be taga banakɔtaga kɛ, o tigi ka dingɛ sogi, n'a tilara tuma min na, a k'a datugu.

¹⁵«Bari Masaba aw ka Ala be n'aw ye aw ka sigiyɔrɔ la, k'aw tanga, ani k'aw juguw don aw bolo. O la, aw ka sigiyɔrɔ ka kan ka saniya, waasa a kana kobɛnbali dɔ ye aw fɛ, k'aw bila.

¹⁶«Ni jɔɔn dɔ bolila ka bɔ a kuntigi fɛ, ka na kalifa aw fɛ, aw man kan k'a di a kuntigi ma.

¹⁷A ka kan ka to aw fɛ yen aw ka duguw dɔ kɔnɔ, a diyanayɔrɔ la. Aw kan'a tɔɔrɔ.

¹⁸ «Isirayɛliden musoman man kan ka kakalaya kɛ k'a la landako kan, u cɛmanw fana man kan k'o kɛ.

¹⁹Mɔgɔ min be o kakalaya ɲɔgɔn kɛ, aw kana na n'ale ka sara ye, Masaba aw ka Ala ka soo kɔnɔ, k'o kɛ dajuru sara ye, bari o si koo man di Masaba aw ka Ala ye fewu.

²⁰ «N'i be juru don i balima na, a kɛra wari ye, walima dumuni, walima fɛɛn o fɛɛn ye, i kana tɔnɔ ɲini o la.

²¹I be se ka tɔnɔ ɲini lonan le fɛ, nga o man kan ka kɛ aw n'aw balimaw cɛ. Aw k'o koo bato janko aw bena don jamana min kɔnɔ k'a kɛ aw ta ye, Masaba aw ka Ala ka hɛrɛ kɛ aw ye yen aw ka kokɛtaw bɛɛ la.

²² «N'i ye dajuru ta Masaba aw ka Ala ye koo dɔ la, kana mɛn k'o koo kɛ. N'o tɛ, a bena i ɲininga o la, o bena kɛ hakɛ ye i fɛ.

²³N'i ma dajuru ta fana, i ma hakɛ kɛ.

²⁴I ye koo min fɔ, i ka banba k'o kɛ, ka kɛɲɛ n'i ka dajuru ye, i ye min ta Masaba aw ka Ala ye, ka sɔrɔ o tun wajibiyanin tɛ.

²⁵«N'i donna i tɔɲɔgɔn ka *ɛrɛzɛnforo kɔnɔ, i be se ka ɛrɛzɛn dumu i sago la, nga i man kan ka taga ni dɔ ye i bolo.

²⁶N'i donna i tɔɲɔgɔn ka foro kɔnɔ, i be se ka suman tigɛ n'i bolo ye, nga i man kan k'a tigɛ ni sumantigɛfɛn ye.