Read dyu Sariya diko filanan kitabu 25 Bible Online

Sariya diko filanan kitabu 25 - dyu bible

Sariya diko filanan kitabu 25

¹«Ni mɔgɔ fila bilara ɲɔgɔn na Isirayɛlidenw cɛma, u ka kan ka taga kititigɛlaw fɛ, mɔgɔ min ka kan ka jalaki, u k'ale jalaki, tiɲɛ be min fɛ, o tigi ka tiɲɛ sɔrɔ.

²«Min ye kojugu kɛ, n'a ka kan ni bugɔli ye, kititigɛla ben'a fɔ ko a ka la duguma a ɲakɔrɔ, golokami daa min ka kan ka bɔ a la ka kɛɲɛ n'a ka kojugu ye, o ka bɔ a la.

³ O man kan ka tɛmɛ golokami ɲaa bi naani kan. N'a tɛmɛna o kan, o bena kɛ i balima dɔgɔyako ye.

⁴ «Ni misi be suman gosira, aw kan'a daa siri. [1]

⁵ «Ni balima fila be ɲɔgɔn fɛ, ni kelen sara, k'a sɔrɔ deen t'a fɛ, a muso man kan ka furu mɔgɔ wɛrɛ ma kɛnɛma. A cɛɛ balimacɛ le ka kan k'a furu.

⁶A bena deen fɔlɔ min sɔrɔ, banbaga tɔgɔ le be la deen nin kan janko a tɔgɔ kana tunu Isirayɛlidenw cɛma.

⁷ «Ni cɛɛ nin t'a fɛ k'a furu, muso nin ka kan ka taga cɛkɔrɔbaw fɛ dugu donda la k'a fɔ u ye ko: «Ne cɛɛ balimacɛ banna. A t'a fɛ a balimacɛ tɔgɔ ka wele Isirayɛlidenw cɛma tugu, a ka kan ka min kɛ ne faan fɛ, a ma o kɛ.»

⁸Dugu cɛkɔrɔbaw ka kan k'a wele ka kuma a fɛ. N'a ma sɔn, n'a y'a fɔ ko: ‹N t'a fɛ,›

⁹muso nin bena gwɛrɛ cɛɛ nin na cɛkɔrɔbaw ɲana, k'a ka sanbara kelen bɔ a seen na, ka tila k'a daji tu a ɲaa na k'a fɔ ko: ‹Mɔgɔ min banna k'a balimacɛ ka soo lɔ, u be to k'ale kɛ ten.›

¹⁰O la, Isirayɛlidenw cɛma, u bena to ka cɛɛ nin ka mɔgɔw wele ko: U ye mɔgɔ min ka sanbara bɔ a seen na, ale ka somɔgɔw.

¹¹«Ni cɛɛ fila be ɲɔgɔn bugɔra, ni kelen ka muso nana ko a b'a cɛɛ bɔsi a tɔɲɔgɔn bolo, o la, n'a y'o cɛɛ nin maloyayɔrɔ minɛ,

¹²aw k'o muso nin bolo tigɛ, aw man kan ka hinɛ a la.

¹³ «Kilo sifa fila man kan ka sɔrɔ aw ka minan kɔnɔ, dɔ ka gwiliya ni dɔ ye.

¹⁴Sumanikɛminan sifa fila fana man kan ka sɔrɔ aw fɛ, dɔ ka boɲa ni dɔ ye.

¹⁵Kilo yɛrɛ yɛrɛ le ka kan ka sɔrɔ aw fɛ, min kɛɲɛnin lo, ani sumanikɛminan min kɛɲɛnin lo fana. O la, Masaba aw ka Ala be jamana min dira aw ma, aw bena sijan sɔrɔ o kɔnɔ.

¹⁶Mɔgɔ min b'o koo ɲɔgɔn kɛ, ka namarakow kɛ, o tigi koo man di Masaba aw ka Ala ye fewu.

¹⁷ «Amalɛkiw ye koo minw kɛ aw la aw bɔtuma na Ezipiti k'aw to sira kan, aw k'aw hakili to o la.

¹⁸U tun ma siran Ala ɲa, u y'aw sɛgɛnninba to, ka na ben aw kɔfɛmɔgɔw kan sira la.

¹⁹Masaba aw ka Ala be jamana min dira aw ma k'a kɛ aw ta ye, n'a ye aw tanga juguw bɛɛ ma tuma min na, minw be aw lamini na, n'a ye sigiyɔrɔ d'aw ma, aw kana ɲinɛ, aw ka amalɛkiw bɛɛ halaki pewu dugukolo kan, waasa mɔgɔ si hakili kana jigi u koo la.