Read dyu Sariya diko filanan kitabu 27 Bible Online

Sariya diko filanan kitabu 27 - dyu bible

Sariya diko filanan kitabu 27

¹Musa y'a fɔ jama ye Isirayɛli cɛkɔrɔbaw ɲana ko: «Ne be kuma minw bɛɛ fɔra aw ye bii, aw k'o mara.

² Masaba aw ka Ala be jamana min dira aw ma, n'aw ye Zurudɛn baji tigɛ ka don a kɔnɔ loon min na, aw ka kan ka kabakurubaba dɔw lɔ k'u gwɛ.

³N'aw ye Zurudɛn baji tigɛ tuma min na, aw ka sariya nin kumaw bɛɛ sɛbɛn u kan. O la, Masaba aw ka Ala be jamana min dira aw ma, nɔnɔ ni lii ka ca kosɔbɛ yɔrɔ diman min na, aw bena se ka don o kɔnɔ, i n'a fɔ Masaba, aw bɛmaw ka Ala ye layidu ta aw ye cogo min na.

⁴N'aw ye Zurudɛn baji tigɛ, aw ka kan ka kabakuru nunu lɔ Ebali kulu kan, i ko ne y'a fɔ aw ye cogo min na bii, ani aw k'u gwɛ.

⁵ O yɔrɔ kelen na, aw ka sarakabɔyɔrɔ lɔ Masaba aw ka Ala ye ni kabakuruw ye. Baarakɛminan nigɛlaman si kana maga o la.

⁶Kabakuru minw ma lɛsɛ, aw k'olu le ta k'o sarakabɔyɔrɔ nin lɔ Masaba aw ka Ala ye, ka saraka jɛnitaw bɔ a ye o kan.

⁷Aw ka jɛnɲɔgɔnya sarakaw bɔ o yɔrɔ la, k'o dumu ni nisɔndiya ye Masaba aw ka Ala ɲakɔrɔ.

⁸Aw ka sariya nin kumaw bɛɛ sɛbɛn ka gwɛ kabakuru nunu kan.»

⁹O kɔ, Musa ni sarakalasebagaw, minw ye Levi kɔmɔgɔw ye, u y'a fɔ Isirayɛli jama bɛɛ ye ko: «Isirayɛli jama, aw ka mankan dabila, aw ka lamɛnni kɛ! Bii Masaba aw ka Ala y'aw kɛ a ka jama ye.

¹⁰Aw k'a boɲa, k'a ka sariyaw n'a ka landaw mara, ne be minw fɔra aw ye bii.»

¹¹O loon kelen, Musa y'a fɔ jama ye ko:

¹² «N'aw ye Zurudɛn baji tigɛ tuma min na, Simeyɔn ni Levi ni Zuda kɔmɔgɔw, ani Isakari ni Yusufu ni Bɛnzamɛn kɔmɔgɔw bena lɔ Garizimu kulu kan ka duba kɛ jama ye.

¹³Urubɛn ni Gadi ni Asɛri kɔmɔgɔw, ani Zabulɔn ni Dan ni Nɛfutali kɔmɔgɔw bena lɔ Ebali kulu kan ka dangali kɛ.

¹⁴«Levi kɔmɔgɔw bena u kaan bɔ Isirayɛlidenw bɛɛ ma kosɔbɛ k'a fɔ u ye ko:

¹⁵ ‹Mɔgɔ min be yiri lɛsɛ, walima kabakuru, walima ka nigɛ yeelen k'a kɛ joo ye, k'a sɔn dogo la, o tigi danganin lo. Fɛɛn minw dilanna ni mɔgɔ bolo ye, o man di Masaba ye fewu.› Jama bɛɛ ben'a laminɛ ko: ‹Amiina!›

¹⁶ ‹Mɔgɔ min b'a facɛ n'a bamuso dɔgɔya, o tigi danganin lo.› Jama bɛɛ ben'a laminɛ ko: ‹Amiina!›

¹⁷ ‹Mɔgɔ min b'a sigiɲɔgɔn ka yɔrɔ daan yɛlɛma, o tigi danganin lo.› Jama bɛɛ ben'a laminɛ ko: ‹Amiina!›

¹⁸ ‹Mɔgɔ min be sirakolon yira fiɲɛntɔ la, o tigi danganin lo.› Jama bɛɛ ben'a laminɛ ko: ‹Amiina!›

¹⁹ ‹Mɔgɔ min be lonan, walima falatɔ, walima firiyamuso ka kiti cɛn, o tigi danganin lo.› Jama bɛɛ ben'a laminɛ ko: ‹Amiina!›

²⁰ ‹Mɔgɔ min jɛnna n'a facɛ ka muso ye, o tigi danganin lo. Bari a ser'a facɛ ta ma.› Jama bɛɛ ben'a laminɛ ko: ‹Amiina!›

²¹ ‹Mɔgɔ min be jɛn ni begɛn ye, o tigi danganin lo.› Jama bɛɛ ben'a laminɛ ko: ‹Amiina!›

²² ‹Mɔgɔ min be jɛn n'a kɔrɔmuso ye, walima n'a dɔgɔmuso ye, a kɛr'a facɛ denmuso ye wo, a bamuso denmuso lo wo, o tigi danganin lo.› Jama bɛɛ ben'a laminɛ ko: ‹Amiina!›

²³ ‹Mɔgɔ min be jɛn n'a biranmuso [1] ye, o tigi danganin lo.› Jama bɛɛ ben'a laminɛ ko: ‹Amiina!›

²⁴‹Mɔgɔ min b'a mɔgɔɲɔgɔn faga dogo la, o tigi danganin lo.› Jama bɛɛ ben'a laminɛ ko: ‹Amiina!›

²⁵‹Mɔgɔ min be sɔn ka wari minɛ ka mɔgɔ jalakibali faga, o tigi danganin lo.› Jama bɛɛ ben'a laminɛ ko: ‹Amiina!›

²⁶ ‹Mɔgɔ min te sariya nin kumaw bato, k'a mara, o tigi danganin lo.› Jama bɛɛ ben'a laminɛ ko: ‹Amiina!›