Read dyu Sariya diko filanan kitabu 29 Bible Online

Sariya diko filanan kitabu 29 - dyu bible

Sariya diko filanan kitabu 29

¹Musa ye Isirayɛlidenw bɛɛ wele k'a fɔ u ye ko: «Aw tun be Ezipiti tuma min na, aw ɲaa y'a ye Masaba ye Ezipiti masacɛ n'a ka baarakɛlaw bɛɛ, n'a ka jamana bɛɛ kɛ cogo min na.

²A ye gwɛlɛya minw la u kan, aw yɛrɛ y'o taamasiɲɛw n'o kabakobabaw ye.

³O bɛɛ n'a ta, fɔɔ ka na se bii ma, Masaba ma hakili di aw ma waasa ka koo faamuya, a ma ɲaa di aw ma janko ka yeli kɛ, a ma tulo di aw ma janko ka mɛnni kɛ.

⁴«A y'a to aw taamana kongokolon kɔnɔ saan bi naani, aw ka faniw ma cɛn, aw sennasanbaraw ma ban.

⁵Aw ma buru dumu, walima duvɛn, walima dɔrɔ fariman wɛrɛ min. [1] O kɛra janko aw k'a lɔn ko ale ye Masaba aw ka Ala ye.

⁶ Aw sera yan yɔrɔ la tuma min na, Ɛsibɔn masacɛ Siŋɔn ni *Basan masacɛ Ɔgi bɔra k'an kunbɛn k'an kɛlɛ, nga anw sera u kɔrɔ.

⁷ An y'u ka mara minɛ, k'a di Urubɛn ni Gadi kɔmɔgɔw, ani Manase kɔmɔgɔw tilancɛ ma k'a kɛ u niyɔrɔ ye.

⁸«Aw ka banba ka bɛɛn kuma nunu mara janko aw ka kokɛtaw bɛɛ ka ɲa.

⁹«Aw bɛɛ lɔnin filɛ nin ye ɲɔgɔn fɛ bii Masaba aw ka Ala ɲakɔrɔ: aw kuntigiw, aw ɲamɔgɔw, aw ka cɛkɔrɔbaw, ani aw ka kɛlɛdenw ɲamɔgɔw, ni Isirayɛli cɛɛ tɔw bɛɛ,

¹⁰ka fara aw deenw n'aw musow kan, ani lonan minw siginin be aw cɛma, janko ka lɔgɔ tigɛ, ani ka jii bɔ aw ye.

¹¹Aw be yan janko ka bɛɛn ni Masaba aw ka Ala ye, aw be kalila min kama, a b'o bɛɛn min kɛ n'aw ye bii,

¹²janko k'aw kɛ a ka jama ye bii, ani ka kɛ aw ka Ala ye, i n'a fɔ a y'a daa di aw bɛma Ibrayima, ni Isiyaka, ani Yakuba ma cogo min na.

¹³Ne be bɛɛn min koo fɔra aw ye, ko aw ka kali o kama, o te aw dɔrɔn ka koo ye,

¹⁴a kɛra aw ta ye, aw minw be Masaba an ka Ala ɲakɔrɔ yan bii, an'aw kɔmɔgɔw bɛɛ, minw ma wolo fɔlɔ.

¹⁵«An tun siginin be Ezipiti cogo min na, an ye siya wɛrɛw ka maraw cɛtigɛ cogo min na, aw yɛrɛ b'o lɔn.

¹⁶Aw y'u ka joo yirilaman ni kabakurulamanw, ni warilamanw, ani sanulamanw ye u fɛ, o fɛnjugu nunu.

¹⁷ Cɛɛ, walima muso kana sɔrɔ aw cɛma, aw ka fadenyabolo mɔgɔ dɔ, walima buruju wɛrɛ la, min dusu bena yɛlɛma bii ka bɔ Masaba an ka Ala kan, ka taga siya nunu ka joow sɔn. Mɔgɔ si kana kɛ bagasun ye aw cɛma.

¹⁸N'a sɔrɔla ko mɔgɔ dɔ ye layidukuma nin mɛn k'a yɛrɛ boɲa k'a fɔ ko: ‹Ne ta ka ɲi, hali ni ne be n nigɛlakow le kɛra. Sabu minnɔgɔ te dugukolo ɲiginin na.›

¹⁹Masaba tena sɔn ka yafa a ma. A ka dimi n'a ka keliya bena fariya o tigi kama. Danga minw koo fɔra sɛbɛ nin kɔnɔ, o bɛɛ bena se a ma. Masaba ben'a tɔgɔ tunu ka bɔ diɲɛ na fana.

²⁰Masaba ben'a bɔ Isirayɛli deenw burujuw cɛma ka kojugu lase a ma ka kɛɲɛ ni bɛɛn danga ye minw bɛɛ koo fɔra sariyasɛbɛ nin kɔnɔ.

²¹«Cɛnni min bena kɛ, ani Masaba bena bana minw don aw ka jamana na, aw kɔmɔgɔw, ani lonan minw bɔra jamanajanw na ka na, n'u y'a ye tuma min na, u ben'a fɔ ko:

²² ‹Kiribi ni kɔgɔ ye jamana bɛɛ jɛni, foyi te se ka dan yen, foyi te se ka falen yen, hali biin yɛrɛ te bɔ yen. A be i n'a fɔ Sodɔmu ni Gɔmɔri, ani Aduma ni Seboyimu. Masaba dimininba ye dugu minw ɲagami.›

²³Siyaw bɛɛ bena ɲiningali kɛ ko: ‹Mun na Masaba ye nin jamana nin kɛ ten? Mun na a dimina ten?›

²⁴U bena u jaabi ko: ‹Nin kɛra bari, Masaba, u bɛmaw ka Ala ye bɛɛn min kɛ n'o ye tuma min na a y'u bɔ Ezipiti, u y'o cɛn.

²⁵U tagara fɛɛn wɛrɛw bato k'u kunbiri gwan u kɔrɔ, u tun te minw lɔn, Masaba do tun ma o sira di u ma.

²⁶O kosɔn, Masaba dimina jamana nin kɔrɔ kosɔbɛ. Danga minw koo fɔra sɛbɛ nin kɔnɔ, a y'o bɛɛ lase jamana nin ma.

²⁷A dimininba y'u ka yɔrɔ bɔsi u la, k'u gwɛn ka taga jamana wɛrɛ la, u be yɔrɔ min na halibi.›

²⁸«Koo minw dogonin lo, Masaba an ka Ala kelen b'olu lɔn, nga koo minw yirala, olu ye anw, n'anw kɔmɔgɔw le ta ye tuma bɛɛ, janko an ka se ka Ala ka sariya nin kuma bɛɛ mara.