Read dyu Sariya diko filanan kitabu 3 Bible Online

Sariya diko filanan kitabu 3 - dyu bible

Sariya diko filanan kitabu 3

¹ O kɔ, an yɛlɛmana ka taga ni *Basan mara sira ye. Basan masacɛ Ɔgi n'a ka jama bɛɛ bɔra k'an kunbɛn janko k'an kɛlɛ Edirɛyi.

²Masaba y'a fɔ ne ye ko: «Kana siran a ɲa, bari ne y'a don i bolo. Ale, n'a ka jama bɛɛ, n'a ka mara. Amoriw ka masacɛ Siŋɔn min tun siginin be Ɛsibɔn, i y'o kɛ cogo min na, i ben'a kɛ ten.»

³O la, Masaba an ka Ala ye Ɔgi n'a ka jama bɛɛ fana don an bolo. An y'u faga, an ma mɔgɔ si to yen.

⁴O waati la, an y'a ka duguw bɛɛ minɛ, dugu foyi ma to an ma se ka min minɛ. O tun ye dugu bi wɔɔrɔ ye, Arigɔbu mara bɛɛ, Ɔgi ka mara kɔnɔ Basan.

⁵O dugu nunu bɛɛ tun ye dugu barikamanw ye, kogojanw tun b'o lamini, koonw tun be u dondaw la n'u be sɔgɔ. Ani dugu caaman fana tun be yen, minw tun lamininin tɛ ni kogo ye.

⁶An y'o dugu nunu halaki pewu k'u kɛ Masaba ta ye, ka cɛɛw, ni musow, ani denmisɛnw bɛɛ faga, i n'a fɔ an tun y'a kɛ Ɛsibɔn masacɛ Siŋɔn na cogo min na.

⁷Nga an y'u ka begɛnw bɛɛ minɛ, k'u ka duguw nafolo cɛ.

⁸O waati la, an ye amoriw ka masacɛ fila nunu ka maraw minɛ, o minw be Zurudɛn baji kɔfɛ k'a ta Arinɔn kɔɔ daa la fɔɔ ka taga se Ɛrɛmɔn kulu ma.

⁹Sidɔnkaw be to ka Ɛrɛmɔn kulu nin wele ko Siriyɔn. Amoriw b'a wele ko Seniri.

¹⁰An ye kɛnɛba duguw bɛɛ minɛ, ani Galaadi ni *Basan mara bɛɛ, fɔɔ ka taga se Salika ani Edirɛyi, o minw be Ɔgi ka mara kɔnɔ Basan.

¹¹Basan masacɛ Ɔgi kelen dɔrɔn le tun be sii la erefaw cɛma. A ka dilan tun ye nigɛ ye. A jaɲa tun ye mɛtɛrɛ naani ni kɔ ye, a waga ye mɛtɛrɛ fila ɲɔgɔn ye. Halibi, a be Araba, min ye amoniw ka masadugu ye.

¹² An ye mara nin minɛ k'a kɛ an ta ye. Ne ye Galaadi kuluyɔrɔ tilancɛ di Urubɛn ni Gadi kɔmɔgɔw ma, ani dugu minw be yen, fɔɔ ka taga se Arowɛri mara la Arinɔn kɔɔ daa la.

¹³Ne ye Galaadi mara tɔɔ di Manase kɔmɔgɔw tilancɛ ma, ani Basan mara bɛɛ, min ye masacɛ Ɔgi ka mara ye. U tun be Arigɔbu mara ni Basan mara wele ko erefaw ka jamana.

¹⁴Manase kɔmɔgɔ min tɔgɔ ko Yayiri, ale ye Arigɔbu mara bɛɛ minɛ fɔɔ ka taga se Gɛsurikaw ka daan ma, ani Maakakaw fana ka daan ma, k'a yɛrɛ tɔgɔ la Basan mara kan. U b'o yɔrɔ wele ten halibi ko Yayiriso. [1]

¹⁵Ne ye Galaadi mara di Makiri [2] kɔmɔgɔw ma.

¹⁶Dugukolo min be Galaadi mara Arinɔn kɔɔ cɛ, ne y'o di Urubɛn ni Gadi kɔmɔgɔw ma. O kɔɔ nin le tun y'a daan ye, ani ka taga se Yabɔki kɔɔ daa la. Min ye amoniw ka mara daan ye.

¹⁷Daan kelen ka bɔ Zurudɛn baji ma, tileben ɲafan na, k'a ta Kinerɛti baa [3] ma fɔɔ ka ta'a bila *Kɔgɔji Fariman ma, fɔɔ Pisiga kulu jigiyɔrɔ la, kɔrɔn fɛ.

¹⁸ O tuma na, ne y'a fɔ aw ye ko: «Sisan Masaba aw ka Ala ye mara nin d'aw ma. Nga cɛɛ minw be se kɛlɛ la, olu bɛɛ ka kan k'u ka kɛlɛkɛminanw ta ka Zurudɛn baji tigɛ aw balima Isirayɛlidenw ɲa.

¹⁹Aw musow, n'aw deenw, n'aw ka begɛnw bena to yan, aw ka duguw kɔnɔ, ne ye minw di aw ma. N y'a lɔn ko begɛn caaman b'aw fɛ.

²⁰U bena to yen fɔɔ Masaba ka yɔrɔ di aw balimaw ma u ka lafiɲɛ i n'a fɔ a y'a kɛ aw ye cogo min na. Olu fana ka jamana sɔrɔ Masaba aw ka Ala be min dira u ma Zurudɛn baji kɔfɛ, tileben fɛ. O kɔ, ne ye yɔrɔ min d'aw ma, aw kelen kelen bɛɛ bena se ka segi o yɔrɔ la.»

²¹O waati la, ne y'a fɔ Zozuwe ye ko: «Masaba aw ka Ala ye min bɛɛ kɛ masacɛ fila nunu na, i ɲaa y'o ye kɛ. I bena tɛmɛ yɔrɔ minw na Zurudɛn baji faan dɔ la, Masaba bena o koo kelen kɛ o maraw bɛɛ la.

²²I kana siran u ɲa, bari Masaba aw ka Ala yɛrɛ le bena aw dɛmɛ o kɛlɛ la.»

²³ O waati la, ne ye Masaba daali ko:

²⁴«Matigi, Masaba, i y'a daminɛ k'i ka boɲa n'i ka setigiya yira ne la. Batofɛn foyi te yen sankolo la ni dugukolo kan, min be se k'i ka koow, n'i ka sebagaya ɲɔgɔn kɛ.

²⁵A to ne ka tɛmɛ Zurudɛn baji faan dɔ fɛ, jamanaɲuman min be yen, n ka se k'o ye, o kuluyɔrɔɲuman nin, ani Liban.»

²⁶Nga Masaba dimina ne kɔrɔ aw kama. A ma sɔn ne ka daalili ma. A y'a fɔ ne ye ko n k'o koo dabila, ko ne kana o kuma fɔ ale tulo kɔrɔ tugu.

²⁷O kɔ, a ko ne ka yɛlɛ fɔɔ Pisiga kulu kunna, ka filɛli kɛ tileben fɛ ni kɔgɔdugu faan fɛ, ani worodugu ni kɔrɔn fɛ. Ko n k'a filɛ kosɔbɛ, ko bari n tena tɛmɛ Zurudɛn baji nin kan.

²⁸A ko n ka ladili di Zozuwe ma, k'a jaa gwɛlɛya, a kana siran, ko bari ale lo bena Zurudɛn baji tigɛ ni Isirayɛlidenw ye ka don n'u ye jamana nin kɔnɔ, n bena o min ye.

²⁹O la, an tora kɔkɛnɛ na yen, Bɛtipewɔri gɛrɛfɛ.