Read dyu Sariya diko filanan kitabu 32 Bible Online

Sariya diko filanan kitabu 32 - dyu bible

Sariya diko filanan kitabu 32

¹Sankolo, mɛnni kɛ, ne bena kuma. Dugukolo, i tulo malɔ ne dalakuma na.

²Ne ka ladiliw ka yɛrɛkɛ i ko sanji, ne ka kumaw ka jigi i ko komiji, i ko sanji min be na biin kan, i ko jii min be tɔnitɔni biin kan.

³Ne bena Masaba tɔgɔ fɔ, aw k'an ka Ala tanu a ka boɲa kosɔn!

⁴Ale lo ye tangakabakuru ye, a ka koo dafanin lo, a ka koow bɛɛ tilennin lo. Ala ye kantigi ye, tilenbaliya t'a ka koo la. Ale lo ye tiɲɛtigi ye, a tilennin lo.

⁵U kɛra janfaciw ye a faan fɛ. Maloya ka kɛ u ta ye! U t'a deenw ye tugu. Mɔgɔjuguw lo, u tilennin tɛ.

⁶Siya naloman ni hakilitanw! Nin ye Masaba minɛcogo ye wa? Ale lo te aw Faa ye wa? Aw Danbaga tɛ wa? Ale lo y'aw kɛ siya ye.

⁷Aw ye miiri loon tɛmɛninw na, aw ye miiri fɔlɔfɔlɔ mɔgɔw ka koo la. Aw k'aw faaw ɲininga, u bena dɔ fɔ aw ye. Aw ka cɛkɔrɔbaw ɲininga, u ben'a ɲafɔ aw ye.

⁸ Fɛɛn bɛɛ kuntigi ye siyaw ka maraw d'u ma tuma min na, a ye daan bila u cɛ tuma min na, a ye siyaw ka jamanaw daanw bɔ, a y'u kelen kelen bɛɛ bila sankolo kɔnɔ setigi dɔw ka kuntigiya kɔrɔ.

⁹Bari Masaba ye Isirayɛlidenw mara a yɛrɛ ye, a ye Yakuba kɔmɔgɔw kɛ a yɛrɛ ta ye.

¹⁰A ye Isirayɛlidenw sɔrɔ kongokolon kɔnɔ, yɔrɔ janin na, kongosogow kulekan cɛma. A jantora u la, k'u kolo, a y'u kɔlɔsi i ko a ɲadenw.

¹¹A kɛra i ko sɛgɛn min be tɛmɛ a ɲaga kunna k'a deenw dege pan na. A b'a gaman yɛrɛkɛ u jukɔrɔ, a b'u ta a gamanw kan.

¹²Masaba kelen y'a ka jama bila sira, batofɛn wɛrɛ ka dɛmɛ tun t'a la.

¹³A y'u bila kuluyɔrɔw la, k'u balo ni foro sumanw ye. A ye lii d'u ma ka bɔ farawo la, ka tulu bɔ farakuluw woo kɔnɔ u ye.

¹⁴A ye naare d'u ma, ni baa nɔnɔ, sagadenw, *Basan sagajigiw, ani bakɔrɔnin tulɔninw, ani suman ɲumamanw. Aw tun be duvɛn ɲanaman le min.

¹⁵Yesurun [1] tulɔra ka boɲa, ka sɔrɔ ka muruti. A fara, a tulɔra ka waga. A y'a Danbaga Ala bila, a y'a Kisibaga n'a Tangakabakuru bila.

¹⁶Isirayɛlidenw ka josɔnko ye keliya bila Masaba la, u ka kɛwalikolonw y'a dusu gwan.

¹⁷ U ye sarakaw bɔ jinaw ye, minw te Ala ye, u tun te batofɛn minw lɔn. Fɛɛn natɔ kuraw lo, aw bɛmaw yɛrɛ tun ma siran minw ɲa.

¹⁸Aw y'aw Tangabaga to yen, min y'aw bila diɲɛ kɔnɔ. Ala min ye nii di aw ma, aw ɲinɛna ale kɔ.

¹⁹Masaba y'o ye, a dimina. A dimin'a dencɛ n'a denmusow kɔrɔ.

²⁰A ko: «N bena n yɛrɛ dogo u la, n ben'a ye u ka siniko bena kɛ min ye. Bari mɔgɔjuguw lo, deen tilenbaliw lo.

²¹ U ye keliya don ne la ni batofɛnkolonw ye, u ye ne dusu wili n'u ka joow ye. Siya min te foyi ye, ne bena olu kɛ ka keliya don u la. Hakili te siya min fɛ, n ben'a kɛ u be dimi olu kosɔn.

²²Tiɲɛ na, ne dusu gwannin be, a funteni be se fɔɔ lahara yɛrɛ. O tasuma nin be dugukolo n'a sumanw cɛn, a be kulu jukɔrɔlaw jɛni.

²³N bena kojugu caaman lase u ma, n bena n ka biɲɛw kɛ k'u bon.

²⁴U barika bena dɛsɛ kɔngɔ bolo, farigwan ni fɔɲɔbana ben'u fasa. N bena sogojuguw ci u ma, n bena sajuguw ci u ma.

²⁵Murujan bena u deenw faga sira kan, soo kɔnɔna be kɛ siranyayɔrɔba ye. Kanbelenw ni sunguruw bena sa, mɔgɔkɔrɔbaw ni denmisɛnw tena kisi.

²⁶Ne tun ko n bena u bɛɛ halaki pewu, k'u tɔgɔ tunu ka bɔ mɔgɔw hakili la.

²⁷Nga ne siranna ko u juguw kana yɛlɛ ne la, ka miiri k'olu yɛrɛ le ye koo nin kɛ, ko ne t'a kɛbaga ye.

²⁸Isirayɛlidenw ye siya hakilitan le ye, u te koo faamu ka ɲa.

²⁹Ni hakilitigiw tun lo, u tun bena faamuyali kɛ, u tun ben'a ye koo nin be tagara n'u ye yɔrɔ min na!

³⁰Mɔgɔ kelen be se ka mɔgɔ waa kelen gwɛn cogo di, ni u Tangabaga ma u bila? Mɔgɔ fila be se ka mɔgɔ waa tan gwɛn cogo di, ni Masaba ma u to u kelen?

³¹An juguw b'a lɔn k'olu tangafɛn te an ta bɔ.

³²U ka jugu i ko Sodɔmukaw, u be i ko Gɔmɔrikaw. U be i ko *ɛrɛzɛnsun min be deen kunaman kɛ, i ko min be deen bagalaman kɛ.

³³U be i ko duvɛn min dilanna ni saa baga ye, saatutu baga.

³⁴A filɛ, ne Masaba ye min labɛn dogo la, n y'a latigɛ ko n bena min kɛ u la:

³⁵ N'u benlon nana se, ne le ka kan ka mɔnɛ bɔ, ne bena u sara. U ka lonjugu sera. Min labɛnna u kama, o tena mɛn n'o ma kɛ.»

³⁶ Masaba bena kotilennin kɛ a ka jama ye. A ka jɔɔnw makari ben'a minɛ, n'a y'u barika dɛsɛnin ye tuma min na, k'a ye ko jigi ani bolo minɛyɔrɔ t'u fɛ.

³⁷A ben'a fɔ ko: «Aw ka batofɛnw be min? Aw ka dogokabakuru be min?

³⁸Aw y'u balo ni begɛn sarakaninw tulu ye, aw ye duvɛn bɔn k'a kɛ saraka ye u ma! Sisan, u ka wili ka na aw dɛmɛ! U ka na aw kisi!

³⁹Aw k'a lɔn sisan ko ne kelen le ye Ala ye! Batofɛn wɛrɛ te yen ni ne tɛ. Ne le be nii don mɔgɔ la, ne le be nii minɛ. Ne le be mɔgɔ mandimi, ne le be mɔgɔ kɛnɛya. Mɔgɔ si te se ka mɔgɔ bɔsi ne bolo.

⁴⁰Ne kalila k'a fɔ ko: Tiɲɛ na, ne be yen kudayi minkɛ,

⁴¹ni ne ye n ka murujan manamananin daa diya, ni ne ye ɲagwanko daminɛ, ne bena n mɔnɛ bɔ n juguw la, ne bena ka juru sara n kɔniyabagaw la.

⁴²Ne ka biɲɛw bena fa joli la, ne ka murujan bena fa sogo la. Ne jugu si tena bɔsi, minw minɛna ka fara mandimininw kan, u bɛɛ bena sɔrɔ o la.»

⁴³ Siya wɛrɛw, aw ye Masaba ka jama tanu, Masaba b'a ka baarakɛlaw fagako mɔnɛ bɔra. A ben'a mɔnɛ bɔ a juguw le la, a ben'a ka jamana n'a ka jama ka hakɛ yafa.

⁴⁴Musa ni Nun deen Zozuwe nana jama ɲafɛ ka na dɔnkili nin kumadenw bɛɛ fɔ u ye.

⁴⁵Musa ye kuma nunu bɛɛ fɔ Isirayɛlidenw bɛɛ ye ka ban tuma min na,

⁴⁶a y'a fɔ u ye ko: «Ne ye kuma minw bɛɛ fɔ aw ye bii, aw k'u minɛ ni sɔbɛ ye. Aw k'u fɔ aw deenw ye, waasa u ka se ka Ala ka sariya kɔnɔnakuma bɛɛ mara.

⁴⁷Kuma nunu te kuma gwansanw ye, aw nii kisifɛn lo. O ben'a to aw be sijan sɔrɔ jamana nin kɔnɔ aw bena min ta Zurudɛn baji kɔfɛ.»

⁴⁸O loon kelen na, Masaba y'a fɔ Musa ye ko:

⁴⁹ «Yɛlɛ Abarimu kulu kan, Mowabu jamana la, Zeriko ɲafɛ, i ka yɛlɛ Nebo kulu sanfɛ. K'i to o yɔrɔ la, i ka Kanaan jamana filɛ, ne be min dira Isirayɛlidenw ma.

⁵⁰I bena sa kulu nin kan ka taga i faaw fɛ, i n'a fɔ i balimacɛ Arɔn sara Ɔri kulu kan cogo min, ka ta'a faaw fɛ.

⁵¹A bena kɛ ten bari Arɔn ni ele, aw filila kosɔbɛ ne ma Isirayɛlidenw ɲafɛ Meriba jiyɔrɔ la, Kadɛsi gɛrɛfɛ, Sin kongokolon kɔnɔ. O waati la, aw ma ne boɲa u cɛma.

⁵²O kosɔn, ne be jamana min dira Isirayɛlidenw ma, i bena se k'a ye k'i to yɔrɔjan, nga i tena don yen.»