Read dyu Sariya diko filanan kitabu 5 Bible Online

Sariya diko filanan kitabu 5 - dyu bible

Sariya diko filanan kitabu 5

¹Musa ye Isirayɛlidenw bɛɛ wele k'a fɔ u ye ko: «Isirayɛlidenw, ne be sariya ni cii minw fɔra aw ye bii, aw k'o lamɛn, k'o kalan, k'o bato ka ɲa.

²Masaba an ka Ala bɛnna n'anw ye *Orɛbu kulu kɔrɔ.

³A ma o bɛɛn kɛ n'an bɛmaw ye do, nga a y'a kɛ n'anw le ye, an minw bɛɛ be yan bii.

⁴Masaba kumana aw fɛ daa ni daa kulu kan tasuma cɛma.

⁵O tuma na, ne tun be aw ni Masaba cɛ, ka kɛ a dalaminɛ ye bari aw tun siranna tasuma ɲa, o la, aw tun ma yɛlɛ kulu kan. Masaba tun ko:

⁶‹Ne ye Masaba aw ka Ala ye min y'aw bɔ Ezipiti jɔnya la.

⁷Aw kana fɛɛn wɛrɛw bato fɔɔ ne kelen.

⁸ Aw kana joo dilan, k'a kɛ sankolo fɛɛn si jaa ye, walima dugukolo kan taw, walima jii kɔnɔ taw, walima dugukolo kɔnɔ taw.

⁹ Aw kana aw kunbiri gwan o joow ɲafɛ, walima k'u sɔn, bari ne Masaba aw ka Ala, keliya be ne la. Ni mɔgɔ dɔ ye ne kɔniya, n b'o tigi tɔɔrɔ, n'a deenw, n'a mamadenw, n'a tulomasamaw.

¹⁰Ne koo ka di minw ye, n'u be ne ka kumaw bato, n bena ɲumanya kɛ olu kɔmɔgɔw ye fɔɔ u *filankuru waa caaman.

¹¹ Aw kana ne Masaba aw ka Ala tɔgɔ wele gwansan bari ni mɔgɔ min y'o kɛ, ne tena o jalakibali to.

¹² Aw ka lafiɲɛlon bato k'a kɛ ne ta ye i ko ne Masaba aw ka Ala y'a fɔ aw ye cogo min na.

¹³ Tile wɔɔrɔ le b'aw fɛ. Aw k'aw ka baaraw bɛɛ kɛ o kɔnɔ.

¹⁴Nga tile wolonwulanan loon, o ye lafiɲɛlon ye min tonin be ne Masaba aw ka Ala ye. Aw tena baara foyi kɛ o loon na, aw n'aw dencɛw, n'aw denmusow, n'aw ka baaraden cɛmanw, walima musomanw, n'aw ka tura, n'aw ka fali, n'aw ka begɛnw bɛɛ, walima lonan min b'aw fɛ, janko aw ka baaradenw ka se ka lafiɲɛ i n'a fɔ aw fana.

¹⁵Aw kana ɲinɛ ko aw tun ye jɔɔnw ye Ezipiti, ani ko ne Masaba aw ka Ala y'aw bɔ n ka sebagaya barika la. O kosɔn, n y'a ɲini aw fɛ ko aw ka lafiɲɛlon bato.

¹⁶ Aw k'aw faa n'aw baa boɲa i ko ne Masaba aw ka Ala y'a fɔ aw ye cogo min na, janko ne be jamana min dira aw ma, aw ka se ka sijan ni hɛrɛ sɔrɔ a kɔnɔ.

¹⁷ Aw kana mɔgɔ faga.

¹⁸ Aw kana kakalaya kɛ.

¹⁹ Aw kana soɲali kɛ.

²⁰ Aw kana galon tigɛ k'a la aw mɔgɔɲɔgɔn kan.

²¹ Aw kana aw ɲaa bɔ aw mɔgɔɲɔgɔn ka muso fɛ, walima a ka boon, n'a ka forow, n'a ka baaraden cɛman, walima musoman, walima a ka tura, walima a ka fali, walima a ka fɛɛn dɔ fɛ.›

²² «Masaba y'a kaan kɔrɔta ka kuma minw fɔ aw bɛɛ lajɛnnin ye kulu kan k'a to tasuma ni sankaba cɛma, ani dibi kɔnɔ, olu lo. A ma fɛɛn wɛrɛ fara o kan. O kɔ, a y'u sɛbɛn walaka kabakurulaman fila kan k'u di ne ma.

²³«Aw ye kumakan mɛn tuma min na, ka bɔ dibi kɔnɔ kulu kan, tasuma tun be min kan, aw ka ɲamɔgɔw bɛɛ n'aw ka cɛkɔrɔbaw gwɛrɛla ne la.

²⁴U y'a fɔ ko: ‹Masaba an ka Ala y'a ka nɔɔrɔ n'a ka boɲa yira an na. An y'a kumakan mɛn ka bɔ tasuma cɛma. An y'a ye bii ko Ala be se ka kuma mɔgɔ fɛ k'a tigi ɲanaman to.

²⁵Nga sisan, mun na anw ben'an yɛrɛ to nin tasumaba nin bolo, a b'an faga? Bari n'an tora ka Masaba an ka Ala kumakan mɛn, an bena sa.

²⁶Mɔgɔ jumɛn be yen n'a ye Ala kaan mɛn ka bɔ tasuma cɛma i n'a fɔ anw, n'o tigi ɲanaman tora?

²⁷O la, aw ko n ka gwɛrɛ Masaba an ka Ala la, ka mɛnni kɛ a fɛ, ani k'a ka kuma bɛɛ fɔ aw ye kɔfɛ. Ko aw ben'a mɛn, ani k'a bato.›

²⁸«Aw ye kuma min bɛɛ fɔ ne ye, Masaba y'o mɛn. A y'a fɔ ne ye ko: ‹Jama ye fɛɛn min bɛɛ fɔ i ye, ne y'o mɛn. U ka kuma bɛɛ ka ɲi.

²⁹N'o dusu ɲɔgɔn tun b'u fɛ, ka siran ne ɲa, ani ka n ka kuma bɛɛ bato tuma bɛɛ, waasa olu n'u deenw ka to hɛrɛ la tuma bɛɛ!

³⁰O kɔ, a ko n ka ta'a fɔ aw ye k'aw ka segi ka taga aw ka fanibuguw kɔnɔ.

³¹Nga a ko ne ka to ni ale ye, ko a bena sariya ni ciiw, ani landaw bɛɛ fɔ ne ye, n ka kan k'aw kalan minw na, janko aw ka se k'u bato o jamana kɔnɔ a be min dira aw ma a ka kɛ aw ta ye.›

³²«Masaba aw ka Ala ye koo minw fɔ aw ye, aw ka jija k'olu bato, aw kana olu dabila fewu.

³³Masaba aw ka Ala ye sira min yira aw la, aw k'o ta sɛbɛ la janko aw ka to nii na ka hɛrɛ ni sijan sɔrɔ, jamana nin kɔnɔ aw bena min minɛ.