Read dyu Sariya diko filanan kitabu 6 Bible Online

Sariya diko filanan kitabu 6 - dyu bible

Sariya diko filanan kitabu 6

¹«Aw bena sariya ni cii ani landa minw bato jamana nin kɔnɔ, aw bena Zurudɛn baji tigɛ ka don o min kɔnɔ k'a minɛ, olu filɛ. Masaba aw ka Ala ko ne k'aw kalan u la,

²janko aw ka siran a ɲa, aw n'aw deenw n'aw mamadenw, ka se ka sariya ni cii ani landa nunu bɛɛ bato aw sii bɛɛ kɔnɔ. Ne be minw fɔra aw ye, ani janko aw ka se ka sijan sɔrɔ.

³Isirayɛlidenw, aw ka mɛnni kɛ, ani ka banba k'o bato. O la, aw bena hɛrɛ sɔrɔ, ani ka caya kosɔbɛ o jamana diman nin kɔnɔ, nɔnɔ ni lii ka ca kosɔbɛ yɔrɔ min na, i n'a fɔ Masaba, aw bɛmaw ka Ala y'a daa di aw ma cogo min na.

⁴ «Isirayɛlidenw, aw k'aw tulo malɔ! Masaba an ka Ala ye Ala kelenpe ye.

⁵ Aw ka Masaba aw ka Ala kanu n'aw dusu bɛɛ ye, n'aw kɔnɔ bɛɛ ye, n'aw fanga bɛɛ ye.

⁶ Ne be kuma minw fɔra aw ye bii, aw k'o to aw dusu la.

⁷Aw k'aw deenw kalan o la. K'aw siginin to aw fɛ, walima k'aw to sira kan taama na, n'aw latuma na, n'aw wilituma.

⁸Aw k'o kɛ taamasiɲɛ ye k'o siri aw bolo la n'aw teen na.

⁹Aw k'o sɛbɛn aw ka soo dondaw la, n'aw ka dugu dondaw la.

¹⁰ «Masaba aw ka Ala tun ye jamana min layidu ta aw bɛma Ibrayima ni Isiyaka ani Yakuba ye, n'a y'a kɛ aw donna o kɔnɔ tuma min na, dugubaba ɲumamanw be min kɔnɔ aw ma minw lɔ,

¹¹ani boon minw fanin be fɛnɲuman sifa bɛɛ la aw ma minw ɲini, ni kɔlɔnw be yen, aw ma minw sogi, ani *ɛrɛzɛnforow ni olivuyiriw aw ma minw tutu, n'aw ye dumuni kɛ ka fa tuma min na,

¹²aw k'aw yɛrɛ kɔlɔsi. Aw kana ɲina Masaba kɔ ale min y'aw bɔ Ezipiti, aw tun ye jɔɔnw ye yɔrɔ min na.

¹³ Aw ka siran Masaba aw ka Ala ɲa, ka baara kɛ ale kelenpe ye. Aw ka kali ale tɔgɔ la.

¹⁴Siya minw b'aw lamini na, aw kana olu ka batofɛnw bato,

¹⁵bari Masaba aw ka Ala min be aw cɛma, keliya b'a la. Aw kan'a dusu dimi, n'o tɛ, a bena aw halaki ka bɔ dugukolo kan.

¹⁶ Aw kana Masaba aw ka Ala kɔrɔbɔ i n'a fɔ aw tun y'a kɛ cogo min na k'aw to Masa.

¹⁷«Aw ka Masaba aw ka Ala ka cii, n'a ka sariya ani a ka fɔtaw bato ka ɲa.

¹⁸Aw ka koɲuman ni tilenninyakow kɛ Masaba ɲakɔrɔ janko aw ka hɛrɛ sɔrɔ, ani Masaba ye jamanaɲuman min layidu ta aw bɛmaw ye, aw ka se ka don o kɔnɔ k'a minɛ,

¹⁹ani k'aw juguw gwɛn aw ɲa, i ko Masaba y'a fɔ cogo min na.

²⁰«Sini, n'aw dencɛw y'aw ɲininga ko: ‹Mun na Masaba an ka Ala ye cii, ni sariya, ni landa nunu sigi aw ye?›,

²¹aw k'u jaabi ko: ‹Anw tun ye Ezipiti masacɛ ka jɔɔnw ye Ezipiti. Nga Masaba y'an bɔ jamana nin kɔnɔ a ka sebagaya barika la.

²²Masaba ye taamasiɲɛw ni kabakobabaw kɛ an ɲana, ka Ezipitikaw n'u ka masacɛ n'a ka somɔgɔw bɛɛ tɔɔrɔ.

²³A y'an bɔ Ezipiti kɔnɔ, ka don n'an ye jamana kɔnɔ a tun ye o min layidu ta an bɛmaw ye, k'a d'an ma.

²⁴A y'a ɲini an fɛ ko, an ka sariya nunu bɛɛ bato, ani ka siran a ɲa, janko an ka to hɛrɛ la waati bɛɛ, ani k'an ɲanaman to i n'a fɔ an be cogo min na bii.

²⁵N'an be banba k'o cii nunu bɛɛ bato Masaba an ka Ala ɲakɔrɔ, i n'a fɔ a y'a ɲini an fɛ cogo min na, an bena kɛ mɔgɔtilenninw ye.›