Read dyu Sariya diko filanan kitabu 7 Bible Online

Sariya diko filanan kitabu 7 - dyu bible

Sariya diko filanan kitabu 7

¹ «Aw bena jamana min minɛ, ni Masaba aw ka Ala y'a kɛ aw donna o kɔnɔ, n'a ye siya caaman nunu gwɛn ka bɔ aw ɲa, olu minw ye itiw ye, ni girigasiw, ani amoriw, ni kanaanw, ani periziw, ni iviw, ani zebuziw ye. Siya wolonwula minw ka ca, fanga b'o la fana ka tɛmɛ aw kan.

²Ni Masaba aw ka Ala y'u don aw bolo tuma min na, n'aw sera u kɔrɔ, aw bena u halaki pewu k'u kɛ a ta ye. Aw kana bɛn n'u ye, aw kana makari u la.

³Aw kana furu n'u ye, aw kana aw denmusow di u dencɛw ma, aw kana u denmusow di aw dencɛw ma fana.

⁴N'o tɛ, u ben'a kɛ aw kɔmɔgɔw be ban Ala ma, ka fɛɛn wɛrɛw bato. N'o kɛra, Masaba bena dimi aw kɔrɔ kosɔbɛ, k'aw bɛɛ faga yɔrɔnin kelen.

⁵ Nga aw ka kan ka min kɛ u la, o filɛ nin ye: Aw k'u ka sɔnnikɛyɔrɔw walaka, k'u ka jokabakuruw ci, ani k'u ka *Asera jaaw tigɛ k'u ben, k'u ka joow jɛni.

⁶ Bari aw ye Masaba aw ka Ala ka jama ye. Masaba aw ka Ala y'aw woloma siya tɔw bɛɛ cɛma dugukolo kan janko aw ka kɛ a yɛrɛ tɔgɔlataw ye.

⁷«Ni Masaba nɔrɔla aw la ani k'aw woloma, o t'a yira ko aw ka ca ni siya tɔw bɛɛ ye dɛ! Aw ka dɔgɔ n'u bɛɛ ye.

⁸Nga aw koo ka di Masaba ye, ani a ye layidu min ta aw bɛmaw ye, a y'o dafa. O la, a y'aw bɔsi Ezipiti masacɛ bolo k'aw bɔ jɔnya la, ani k'a to aw bɔra jamana nin kɔnɔ a ka sebagaya barika la.

⁹ «Aw ka l'a la ko Masaba aw ka Ala le ye Ala yɛrɛ yɛrɛ ye. A koo ka di mɔgɔ minw ye n'u b'a ka kuma bato, a tilennin lo, a b'a ka layidu dafa olu faan fɛ, ani ka ɲumanya kɛ u ye, n'u kɔmɔgɔw *filankuru waa caaman ye.

¹⁰Nga a b'a kɔniyabagaw sara yɔrɔnin kelen k'u tunu ka bɔ yen. A tena u to yen ka mɛn, a b'u sara yɔrɔnin kelen.

¹¹«O la, ne be sariya, ni ciiw, ani landa minw fɔra aw ye bii, aw ka banba k'olu bato.

¹² N'aw ye aw tulo malɔ landa nunu na, k'o bato ka ɲa, Masaba aw ka Ala ben'a ka layidu dafa, a ye min ta aw bɛmaw ye ani ka ɲumanya kɛ aw ye.

¹³Aw koo bena diy'a ye, a bena aw ta ɲa, ka deen caaman di aw ma, k'aw ka forow ɲa, ka suman caaman, ni duvɛnkɛnɛ caaman, ani tulu caaman di aw ma. A bena aw ka misiw caya, n'aw ka begɛnmisɛnw, jamana nin kɔnɔ. A tun ye min layidu ta aw bɛmaw ye ko a ben'a di aw ma.

¹⁴A bena aw ta ɲa ka tɛmɛ siya tɔw kan. Cɛɛ, walima muso min te se ka deen wolo, o tena sɔrɔ aw cɛma, ka fara aw ka begɛnw kan.

¹⁵Masaba bena aw kisi bana bɛɛ ma. Aw be banajugu minw lɔn n'u sera Ezipitikaw ma, olu tena se aw ma, a ben'a kɛ olu be se aw kɔniyabagaw le ma.

¹⁶Masaba aw ka Ala bena siya minw bɛɛ don aw bolo, aw k'u bɛɛ faga, aw kana makari u la. Aw kana u ka joow sɔn, n'o tɛ, o bena kɛ jaan ye aw ɲa.

¹⁷«N'a b'aw kɔnɔ ko siya nunu ka ca n'aw ye, ko aw bena kɛ cogo di k'u gwɛn,

¹⁸aw kana siran u ɲa. Masaba aw ka Ala ye min kɛ Ezipiti masacɛ ni Ezipitikaw bɛɛ la, aw ye miiri o la.

¹⁹A ye gwɛlɛya min lase u ma, ani ka taamasiɲɛ ni kabako minw kɛ ni sebagaya ye, tuma min na a tun ye aw bɔ u ka jamana kɔnɔ, aw ɲaa y'o ye. Aw be siran siya minw bɛɛ ɲa, a bena olu fana kɛ ten.

²⁰O dama tɛ, hali u tɔɔ min tora, n'u be dogora aw ɲa, a bena dondolibabaw ci olu kama fɔɔ u bɛɛ ka tunu ka ban pewu.

²¹Aw jaa kana tigɛ u kama bari Masaba aw ka Ala be n'aw ye, see b'a ye, siranyafɛn lo.

²²A bena siya nunu gwɛn ka bɔ aw ɲa dɔɔni dɔɔni. Aw man kan k'u halaki yɔrɔnin kelen, n'o tɛ, kongosogow bena caya kojugu fɔɔ aw tena se olu kɔrɔ.

²³Nga a bena u don aw bolo k'u jigi tigɛ pewu fɔɔ u ka halaki ka ban.

²⁴A bena u ka masacɛw don aw bolo, aw bena u tɔgɔ tunu ka bɔ dugukolo kan. U si tena se ka lɔ aw ɲakɔrɔ. Aw bena u halaki pewu.

²⁵Aw ka kan k'u ka joow jɛni. Warigwɛ ni sanu min b'u ka joo nunu kan, aw kana aw ɲaa bɔ o fɛ, k'o ta ka kɛ aw ta ye. N'o tɛ, o bena kɛ jaan ye aw fɛ, bari o fɛɛn nunu koo ka go Masaba aw ka Ala ye.

²⁶Fɛɛn minw nɔgɔninw lo, aw kana don ni olu si ye aw ka soo kɔnɔ, janko aw fana kana halaki i n'a fɔ olu. Aw ka kan k'o koo goya aw ye, u man kan ka diya aw ye fewu, bari u ka kan ka halaki le.