Read dyu Sariya diko filanan kitabu 8 Bible Online

Sariya diko filanan kitabu 8 - dyu bible

Sariya diko filanan kitabu 8

¹«Ne be koo minw fɔra aw ye bii, aw ka jija k'o bɛɛ kɛ, janko aw ka to nii na, ka caya, ani ka se ka don jamana nin kɔnɔ k'a minɛ. Masaba ye min layidu ta aw bɛmaw ye.

²Aw k'aw hakili to taamajan nin na, Masaba aw ka Ala y'a kɛ aw ye min kɛ saan bi naani, kongokolon kɔnɔ. A y'o kɛ janko k'aw majigi k'a filɛ min b'aw kɔnɔ na, ni aw tun bena sɔn k'a ka kuma bato, walima n'aw tun tena sɔn.

³ A y'aw majigi k'aw tɔɔrɔ ni kɔngɔ ye, ka sɔrɔ ka maanɛ di aw ma, aw n'aw bɛmaw tun te min lɔn. A y'a yira aw la ten ko mɔgɔ te balo ni dumunifɛn dama ye, nga a be balo ni Masaba dalakuma fana ye.

⁴Kabini saan bi naani kɔnɔ, aw ka faniw ma cɛn, aw seenw ma funu.

⁵Aw k'a lɔn sɛbɛ la ko Masaba aw ka Ala tun b'aw kolo, i n'a fɔ faa b'a deen kolo cogo min na.

⁶«Aw ka Masaba aw ka Ala ka fɔtaw bato k'a ka sira taama ani ka siran a ɲa.

⁷Masaba aw ka Ala ben'a kɛ aw be don jamanaɲuman kɔnɔ, kɔɔw be yen, ni jii bɔyɔrɔw, jisiraw be dugukolo jukɔrɔ n'u be bɔ ka woyo kuluw n'u furancɛw la.

⁸Suman be ɲa yen. *Ɛrɛzɛnforow, ni torosunw, ni gerenadiyiriw, ani olivutulu, ani lii be yen.

⁹Aw bena dumuni kɛ aw sago la jamana nin kɔnɔ, foyi tena dɛsɛ aw la yen. Nigɛ fana be sɔrɔ o yɔrɔ kabakuruw kɔnɔ. Aw bena to ka zira bɔ o yɔrɔ kuluw kɔnɔ.

¹⁰N'aw ye dumuni kɛ ka fa tuma min na, aw ka Masaba aw ka Ala fo yɔrɔɲuman nin kosɔn, a ye min di aw ma.

¹¹ «Aw k'aw yɛrɛ kɔlɔsi, aw kana ɲinɛ Masaba aw ka Ala kɔ k'aw mako bɔ a ka ciiw n'a ka landaw n'a ka sariyaw la ne be minw fɔ aw ye bii.

¹²N'aw ye dumuni kɛ ka fa, ka boon ɲanamanw lɔ ka sigi u kɔnɔ tuma min na,

¹³n'aw ka dabaw n'aw ka begɛnmisɛnw cayara, ani ka warigwɛ ni sanu sɔrɔ caaman tuma min na, ka kɛ fɛɛn bɛɛ tigiw ye,

¹⁴aw kana aw yɛrɛ boɲa fɔɔ ka ɲinɛ Masaba aw ka Ala kɔ. Ale min y'aw bɔ Ezipiti jamana kɔnɔ jɔnya la.

¹⁵A y'a to aw taamana kongokolon kabakoman nin kɔnɔ, min tun fanin be sajuguw ni bunteniw na. Jii tun te o yɔrɔ la, yɔrɔ janin tun lo, a y'a kɛ jii bɔra farakuru kɔnɔ, aw y'o min.

¹⁶A ye maanɛ di aw ma o kongokolon nin kɔnɔ, aw bɛmaw tun te dumuni min lɔn, ko aw k'o dumu janko k'aw majigi ani k'aw kɔrɔbɔ, waasa ka se ka koɲuman kɛ aw ye sini.

¹⁷Aw kana miiri ko aw ye nafolo sɔrɔ aw yɛrɛ ka fanga barika la dɛ.

¹⁸Nga aw k'aw hakili to Masaba aw ka Ala la, ale min be see d'aw ma, aw ka se ka nafolo sɔrɔ, janko a ye layidu min ta aw bɛmaw ye, a ka se k'a yira ko a bena o dafa i n'a fɔ a be cogo min na bii.

¹⁹«N b'a fɔ aw ye bii k'a gwɛlɛya ko n'aw ɲinɛna Masaba aw ka Ala kɔ, k'aw jigi la batofɛn wɛrɛw kan ka to k'u bato ani k'aw kunbiri gwan u kɔrɔ, aw bena halaki pewu.

²⁰Tiɲɛ na, n'aw ma Masaba aw ka Ala ka kuma bato, aw bena halaki i n'a fɔ Masaba ye siya minw halaki aw ɲafɛ.