Read dyu Zan ka kitabu 1 Bible Online

Zan ka kitabu 1 - dyu bible

Zan ka kitabu 1

¹Fɔlɔfɔlɔ, sanni diɲɛ ka dan, Kuma tun be yen. O Kuma nin tun be ni Ala ye, o Kuma nin tun ye Ala ye.

²A tun be ni Ala ye fɔlɔfɔlɔ.

³Fɛɛn bɛɛ danna ale barika la. Fɛɛn si te yen min ma dan a barika la.

⁴Nii tun be sɔrɔ ale barika la. Ale tun be yeelen bɔ adamadenw ye.

⁵O yeelen nin bɔra dibi la. Nga dibi ma sɔn a ma.

⁶ Ala ye cɛɛ dɔ ci min tɔgɔ tun ko Zan.

⁷Ale nana waasa ka kɛ yeelen nin seere ye k'a koo fɔ mɔgɔw ye janko u bɛɛ ka la yeelen nin na ale sababu la.

⁸Ale Zan tun te yeelen nin ye, nga a nana waasa ka yeelen le koo fɔ.

⁹O yeelen nin tun ye yeelen yɛrɛ yɛrɛ ye, min nana diɲɛ na ka kɛnɛ bɔ mɔgɔw bɛɛ ye.

¹⁰A tun be diɲɛ na, ale lo ye diɲɛ dan, nga diɲɛ mɔgɔw bann'a la.

¹¹A nan'a ka siya mɔgɔw fɛ, a ka siya mɔgɔw bann'a la.

¹²Nga minw sɔnn'a ma, ka l'a la, a ye see di olu ma ka kɛ Ala deenw ye.

¹³O deen nunu ma sɔrɔ adamadenw sago la. Nga u sɔrɔla Ala ka sebagaya le la.

¹⁴O kuma nin kɛra mɔgɔ ye, ka na sigi n'an ye. An y'a ka nɔɔrɔ ye, dencɛ kelen be min sɔrɔ a Faa fɛ. Ale lo ye tiɲɛtigi ni nɛɛmatigi ye.

¹⁵Zan y'a koo fɔ ko: «Ne tun ye min koo fɔ ko a bena na ne kɔfɛ, ale lo ye nin ye. A ka bon ni ne ye, bari sanni ne ka wolo, ale tun be yen.»

¹⁶Anw bɛɛ ye duba caaman sɔrɔ a ka nɛɛma barika la.

¹⁷Ala ka sariya sɔrɔla Musa sababu la. Nga Yezu Krista le nana ni Ala ka nɛɛma, n'a ka tiɲɛ ye.

¹⁸Mɔgɔ si ma deli ka Ala ye abada, nga a Deen kelenpe, min fana ye Ala ye, ale n'a Faa Ala be ɲɔgɔn fɛ, ale lo nana Ala cogo yira an na.

¹⁹Zuwifuw tun ye sarakalasebaga dɔw ni Levi kɔmɔgɔ dɔw ci ka bɔ Zeruzalɛmu ka taga Zan sɛgɛrɛ tuma min na, u y'a ɲininga ko: «E ye jɔn ye?» Zan y'u jaabi. [1]

²⁰A ma sigasiga, a y'a fɔ ka gwɛ u ye ko: «Ne te Ala ka Mɔgɔ wolomanin ye dɛ.»

²¹ U y'a ɲininga ko: «O tuma na, e ye jɔn ye? E ye Eli ye wa?» A y'u jaabi ko: «Ne te Eli ye.» U ko: «E ye kiraba nin ye wa?» A ko ayi.

²²O tuma na, u y'a fɔ a ye ko: «E ye mɔgɔ min ye, o fɔ an ye, waasa an ka se ka taga o fɔ an cibagaw ye. Ɔnhɔn. O tuma na, e ye jɔn ye?»

²³ A ye kira Ezayi ka kuma ta k'u jaabi ko: «Mɔgɔ min be pɛrɛnna kongokolon kɔnɔ ko: ‹Aw ka siratilennin labɛn Matigi ye,› » a ko o y'ale Zan ye.

²⁴Ciden nunu tun ye *Fariziɲɛw ye.

²⁵U ye Zan ɲininga tugu ko: «Ni e te Ala ka Mɔgɔ wolomanin nin ye, ni e te Eli ye, walima kiraba, e do be mɔgɔw batize mun na?»

²⁶A y'u jaabi ko: «Ne kɔni be mɔgɔw batize jii la. Nga mɔgɔ dɔ b'aw cɛma, aw t'ale lɔn,

²⁷ale be na ne kɔ, ne ka dɔgɔ k'a ka sanbara juru foni.»

²⁸O koo nunu bɛɛ kɛra Betani faan fɛ Zurudɛn baji kɔfɛ, Zan tun be mɔgɔw batizera yɔrɔ min na.

²⁹O dugusagwɛ, Zan ye Yezu natɔ ye a fɛ, a y'a fɔ ko: «Ala ka Sagaden filɛ min be mɔgɔw ka hakɛw ban.

³⁰N tun be ale lo koo fɔra ko mɔgɔ dɔ bena na ne kɔ min ka bon ni ne ye, bari sanni ne ka wolo, ale tun be yen.

³¹Ne yɛrɛ tun t'a lɔn, ne nana ka to ka mɔgɔw batize jii la, waasa Isirayɛlidenw k'a lɔn.»

³²Zan y'a fɔ tugu ko: «Ne ye Nii Senuman jigitɔ ye a kan ka bɔ sankolo la, i n'a fɔ tuganin, ka to a kan.

³³Ne tun t'a lɔn, nga min ye ne ci ka na mɔgɔw batize jii la, ale y'a fɔ n ye ko ni ne ye Nii Senuman jigitɔ ye ka sigi min kan, k'o tigi lo bena mɔgɔw batize ni Nii Senuman ye.

³⁴Ne y'o ye, o la ne ko ale lo ye Ala Deen ye.»

³⁵O dugusagwɛ, Zan tun b'o yɔrɔ kelen nin na, n'a ka kalandenw mɔgɔ fila ye.

³⁶A ye Yezu tɛmɛtɔ ye, a y'a fɔ ko: «Ala ka Sagaden filɛ nin ye.»

³⁷A ka kalanden fila nunu y'o mɛn minkɛ, u tugura Yezu kɔ.

³⁸Yezu y'a ɲaa yɛlɛma k'u ye a kɔ, a y'u ɲininga ko: «Aw be mun le ɲinina?» U y'a jaabi ko: «Arabi, e ka yɔrɔ be min?» (Arabi kɔrɔ ko karamɔgɔ.)

³⁹A ko: «Aw ye na, aw ben'a ye.» U tagara n'a ye k'a ka yɔrɔ ye. Wuladafɛ tun lo. U tora n'a ye o loon na.

⁴⁰Mɔgɔ fila minw tun ye Zan ka kuma mɛn ka tugu Yezu kɔ, u kelen tun ye Simɔn Piyɛri dɔgɔcɛ Andere ye.

⁴¹A sinna ka taga fɔ a kɔrɔcɛ Simɔn ye ko: «Anw ye Krista ye», o kɔrɔ ko Ala ka Mɔgɔ wolomanin nin.

⁴²U tagara Yezu fɛ. Yezu y'a filɛ furututu k'a fɔ a ye ko: «E ye Zan dencɛ Simɔn ye. An bena i wele ko *Sefasi», girɛkikan na, o ye Piyɛri ye.

⁴³O dugusagwɛ, Yezu y'a ŋaniya ta ko a be taga Galile mara la. A ye Filipu ye, k'a fɔ a ye ko: «Tugu ne kɔ.»

⁴⁴Filipu ni Andere ani Piyɛri nunu bɛɛ tun ye Bɛtisayidakaw ye.

⁴⁵Filipu ye Natanayɛli kunbɛn k'a fɔ a ye ko: «Mɔgɔ min koo fɔnin be Musa ka sariya sɛbɛ ni kiraw ka sɛbɛw kɔnɔ, anw y'a ye. Nazarɛtika Yezu lo, Yusufu dencɛ.»

⁴⁶Natanayɛli ko: «Ka bɔ Nazarɛti? Fɛnɲuman be se ka bɔ Nazarɛti wa?» Filipu y'a jaabi ko: «E ka na sa, e ben'a ye.»

⁴⁷Yezu ye Natanayɛli natɔ ye a fɛ, a y'a fɔ ko: «Nin ye Isirayɛliden yɛrɛ ye tigitigi. Namaramɔgɔ tɛ.»

⁴⁸Natanayɛli ko: «I ye ne lɔn min?» Yezu y'a jaabi ko: «Sanni Filipu k'i wele, ne ɲaa tun b'i la torosun kɔrɔ.»

⁴⁹Natanayɛli y'a jaabi ko: «Karamɔgɔ, i ye Ala Deen ye, i ye Isirayɛli ka masa ye.»

⁵⁰Yezu ko a ma: «Ne y'a fɔ ko ne y'i ye torosun kɔrɔ minkɛ, o la, i lara ne la kɛ. I bena fɛɛn wɛrɛw ye minw bena tɛmɛ nin kan.»

⁵¹ Yezu y'a fɔ tugu ko: «Tiɲɛ tiɲɛ na, aw bena sankolo dayɛlɛnin ye ka Ala ka mɛlɛkɛw yɛlɛtɔ n'u jigitɔ ye Mɔgɔ Dencɛ kan.»