Read dyu Zan ka kitabu 10 Bible Online

Zan ka kitabu 10 - dyu bible

Zan ka kitabu 10

¹Yezu ko: «Tiɲɛ tiɲɛ na, ne b'a fɔ aw ye ko ni mɔgɔ min ma don ni wɛɛrɛ daa ye, fɔɔ ka pan ka don ni faan wɛrɛ ye, o tigi ye soon ye, benkannikɛla lo.

²Nga min be don ni wɛɛrɛ daa ye, ale lo ye saga nunu dɛndɛbaga ye.

³Daa kɔlɔsibaga be daa yɛlɛ a ye. Sagaw be mɛnni kɛ a fɛ, minw y'a taw ye, a b'u tɔgɔw wele kelen kelen ka bɔ n'u ye kɛnɛma.

⁴N'a bɔra n'a ta nunu bɛɛ ye kɛnɛma ka ban, a be bila u ɲa, u be tugu a kɔ, bari u b'a kaan lɔn.

⁵U tena tugu mɔgɔ wɛrɛ kɔ fewu, u bena boli a ɲa yɛrɛ, bari u te ale kaan lɔn.»

⁶Yezu y'o talen nin la u ye. Nga, u m'a famu.

⁷Yezu y'a fɔ tugu ko: «Tiɲɛ tiɲɛ na, ne b'a fɔ aw ye ko sagaw be don ni daa min ye wɛɛrɛ kɔnɔ, ne lo.

⁸Minw bɛɛ kɔnna ne ɲa, olu bɛɛ ye soonw ni benkannikɛlaw le ye. Nga sagaw ma mɛnni kɛ u fɛ.

⁹Ne le ye donda ye. Ni mɔgɔ min donna n'o daa ye, o tigi bena kisi. A bena don, ka bɔ, k'a ka dumuni sɔrɔ.

¹⁰Soon kɔni te na foyi kama ni soɲali ni fagali ni cɛnni tɛ. Ne nana waasa mɔgɔw ka kisi ani u ka hɛrɛ ka sabati.

¹¹Ne ye sagaw dɛndɛbagaɲuman ye. Sagaw dɛndɛbaga ɲanaman b'a nii di a ka sagaw kosɔn.

¹²Nga min b'u dɛndɛ a yɛrɛ ka nafa kosɔn n'a ta te sagaw ye, n'ale ye wara natɔ ye, a be sagaw to, ka boli. Wara be minɛni kɛ, sagaw be jɛnsɛn.

¹³A be boli bari wariɲinila dama lo, a mako te sagaw fagako la.

¹⁴Ne ye sagaw dɛndɛbaga ɲanaman ye. Ne be n ka sagaw lɔn, n ka sagaw fana be n lɔn.

¹⁵ O la, ne be n Faa lɔn, n Faa fana be n lɔn. Ne be n nii di n ka sagaw kosɔn.

¹⁶Saga dɔ wɛrɛw be ne fɛ minw te wɛɛrɛ nin kɔnɔ. Fɔɔ n ka na n'u ye. U bena na n kaan mɛn. U bɛɛ be kɛ kulu kelen ye, ani dɛndɛbaga kelen u kɔ.

¹⁷N Faa be n kanu, bari, ne be n nii saraka janko ka tila k'a sɔrɔ tugu.

¹⁸Mɔgɔ si te ne nii bɔ dɛ, ne yɛrɛ le b'a di. See be ne ye k'a di, see be ne ye k'a minɛ tugu. N Faa y'o le ɲini n fɛ.»

¹⁹O kuma nunu nana ni farali ye zuwifuw cɛma tugu.

²⁰U caaman tun b'a fɔra ko: «Jinatɔ lo, a kuun wilila, a lamɛnkun?»

²¹Dɔw ko: «A ka kuma nunu te jinatɔ kumaw ye han! Jina be se ka fiɲɛntɔ ɲaa yɛlɛ wa?»

²²Alabatosoba saniya ɲanagwɛ tun be kɛra Zeruzalɛmu, nɛnɛ tuma na.

²³Alabatosoba donda yɔrɔ min be wele ko Solomani ka bulonda, Yezu tun be yalaya la yen.

²⁴Zuwifuw tagar'a lamini k'a ɲininga ko: «I be waati jumɛn le kɔnɔ ka sɔrɔ ka tiɲɛ fɔ an ye? N'o y'a sɔrɔ i ye Ala ka Mɔgɔ wolomanin nin ye, a fɔ an ye ka gwɛ.»

²⁵Yezu y'u jaabi ko: «Ne y'a fɔ aw ye ka ban, nga aw te lara ne la. O bɛɛ n'a ta, ne be kɛwali minw kɛ n Faa tɔgɔ la, o be ne ka koo yira fana.

²⁶Aw te la ne la bari aw te n ka sagaw dɔw ye.

²⁷Ne be n ka sagaw lɔn, u be mɛnni kɛ n fɛ, u be tugu n kɔ.

²⁸Ne fana be nii banbali di u ma. U tena halaki abada, mɔgɔ si fana te se k'u bɔsi n na.

²⁹N Faa min y'u di n ma, ale ka bon ni fɛɛn bɛɛ ye. Mɔgɔ te yen min be se ka fɛɛn bɔsi n Faa bolo.

³⁰Ne ni n Faa ye kelen ye.»

³¹Zuwifu nunu wilila tugu ka kabakuruw cɛ k'u b'a bon.

³²O la, Yezu y'a fɔ u ye ko: «Ne ye koɲuman caaman kɛ n Faa barika la, aw y'u ye. Aw b'a fɛ ka ne bon olu jumɛn lo kama?»

³³ U y'a jaabi ko: «Anw m'a fɔ ko an b'i bon koɲuman kɛnin kama, nga anw b'a fɛ k'i bon bari i ye kuma fɔbali fɔ. Ele adamadentɔ, i b'a fɔ ko i ye Ala ye!»

³⁴ Yezu y'u jaabi ko: «Ala ko: ‹Aw ye batofɛn dɔw ye.› O ma sɛbɛn aw ka sariyasɛbɛ kɔnɔ wa?

³⁵Ala ye min fɔ, o ye kuma yɛlɛmabali ye. A tun be kumana mɔgɔ le fɛ, n'a y'a fɔ u ye ko: ‹Aw ye ala dɔw ye.›

³⁶Ala ye mɔgɔ min woloma k'a ci diɲɛ na, aw ko ale ma: ‹I ye kuma fɔbali fɔ.› Bari ne y'a fɔ ko ne ye Ala Deen ye.

³⁷N'o y'a sɔrɔ ni ne te n Faa ka kɛwaliw kɛ, aw kana la ne la.

³⁸Nga ne b'o kɛra, o bɛɛ n'a ta, aw te lara ne la. Ayiwa, n be baara minw kɛra, aw ye la olu la, janko aw ka se k'a lɔn ko n Faa be ni ne ye, ko ne be ni n Faa ye.»

³⁹O la, u tun b'a fɛ k'a minɛ tugu nga a sera k'a yɛrɛ bɔsi u bolo.

⁴⁰ Zan tun ye mɔgɔ batizeli daminɛ Zurudɛn baji kɔ yɔrɔ min na, Yezu segira ka taga to o yɔrɔ la.

⁴¹Mɔgɔ caaman tagar'a fɛ. U tun be to k'a fɔ ko: «Zan kɔni ma kabakow kɛ, nga a ye min bɛɛ fɔ cɛɛ nin ka koo la, a bɛɛ kɛra tiɲɛ ye.»

⁴²Mɔgɔ caaman y'u jigi la Yezu kan o yɔrɔ la.