Read dyu Zan ka kitabu 13 Bible Online

Zan ka kitabu 13 - dyu bible

Zan ka kitabu 13

¹*Hɔrɔnya ɲanagwɛ tun ma se fɔlɔ, Yezu tun y'a lɔn ko ale ka bɔwaati sera diɲɛ na ka ta'a Faa fɛ. A ka mɔgɔ minw tun be diɲɛ na, olu koo tun ka d'a ye, a y'u kanu fɔɔ ka taga se a daan na.

²K'u to dumuni na, ale n'a ka kalandenw, o y'a sɔrɔ Sutana tun ye Simɔn deen Zuda Isikariyɔti kɔnɔ fa ka ban ni Yezu janfako ye.

³Yezu tun y'a lɔn ko a Faa ye koo bɛɛ don ale bolo, ani ko ale bɔra Ala fɛ, ani a ka kan ka segi Ala fɛ tugu.

⁴A wilila ka bɔ dumuni kunna k'a ka foroca bɔ, ka fani wɛrɛ ta k'a cɛɛ siri n'o ye.

⁵O kɔ, a ye jii don minan dɔ kɔnɔ, k'a daminɛ k'a ka kalandenw seen ko, k'a cɛsirifani kɛ k'u jɔsi.

⁶A sera Simɔn Piyɛri ma tuma min na, Piyɛri y'a fɔ a ye ko: «Matigi, ele bena ne seen ko wa?»

⁷Yezu y'a jaabi ko: «Ne be koo min kɛra ten, e t'o faamuna sisan, nga kɔfɛ, i bena o faamu.»

⁸Piyɛri y'a fɔ a ye ko: «E tena ne seen ko abada!» Yezu y'a fɔ a ye ko: «Ni ne m'i seen ko, i tena niyɔrɔ sɔrɔ ne fɛ.»

⁹A y'a fɔ Yezu ye ko: «A kana dan n seen dama ma, nga n bolo ni n kuun fana ko.»

¹⁰Yezu y'a fɔ a ye tugu ko: «Ni mɔgɔ min kora ka ban, o tigi mako t'a la ka ko tugu fɔɔ k'a seen dama le ko, bari a fari saniyanin lo ka ban. Aw gwɛnin lo, nga aw bɛɛ tɛ.»

¹¹Mɔgɔ min tun ben'a don mɔgɔjuguw bolo, a tun b'o tigi lɔn. O le y'a to a ko: «Aw bɛɛ gwɛnin tɛ.»

¹² A y'u seen ko ka ban tuma min na, a y'a ka faniw ta k'u don ka sigi dumuni kunna tugu k'a fɔ u ye ko: «Ne ye koo min kɛ aw ye, aw y'o faamu wa?

¹³Aw be ne wele ko karamɔgɔ ani Matigi, o bɛnnin lo, bari ne y'o le ye.

¹⁴Ni ne y'aw seen ko, ne min ye aw ka Matigi ni karamɔgɔ ye, aw fana ka kan ka ɲɔgɔn seen ko ten.

¹⁵Ne y'o kɛ janko k'o ɲaa yira aw la. Ne ye fɛɛn min kɛ aw ye, aw k'o ɲɔgɔn kɛ aw mɔgɔɲɔgɔnw ye.

¹⁶ Tiɲɛ tiɲɛ na, ne b'a fɔ aw ye ko baaraden man fisa n'a kuntigi ye, walima ciden man fisa n'a cibaga ye.

¹⁷Sisan aw y'o koo lɔn, n'aw y'o koo nin kɛ, aw dagamuna.

¹⁸ Ne te kumana aw bɛɛ koo la dɛ. Ne ye minw woloma, ne be olu lɔn, nga min fɔra Ala ka kuma na, fɔɔ o ka kɛ. A tun fɔra ko: ‹Min tun be dumuni kɛ ni ne ye, ale lo wilila ne kama.›

¹⁹Ne be kɔn k'o fɔ aw ye yann'o ka se, janko n'o kɛra loon min na, ne ko ne ye min ye, aw ka l'a la ko ne y'o le ye. [1]

²⁰ Tiɲɛ tiɲɛ na, ne b'a fɔ aw ye ko ni mɔgɔ min ye ne ka ciden minɛ ka ɲa, o tigi ye ne le minɛ ka ɲa. Ni min ye ne minɛ ka ɲa, o tigi fana ye ne cibaga le minɛ ka ɲa.»

²¹Yezu y'o kuma nunu fɔ ka ban dɔrɔn, a hakili ɲagamina kosɔbɛ, a y'a fɔ ko: «Tiɲɛ tiɲɛ na, ne b'a fɔ aw ye ko, aw dɔ bena ne don mɔgɔjuguw bolo.»

²²Kalandenw tora ka ɲɔgɔn filɛfilɛ, u tun m'a lɔn ko a be mɔgɔ min koo fɔra.

²³Kalanden nunu cɛma, min koo tun ka di Yezu ye kosɔbɛ, ale tun siginin b'a gɛrɛfɛ.

²⁴Simɔn Piyɛri y'a bolo kɛ k'a fɔ ale ye ko a k'a ɲininga ni mɔgɔ min lo.

²⁵O kalanden nin y'a yɛrɛ jɛngɛ Yezu faan fɛ, k'a ɲininga ko: «Matigi, jɔn lo?»

²⁶Yezu y'a jaabi ko: «Ne bena lɔgɔma nin sun k'a di mɔgɔ min ma, ale lo.» A ye lɔgɔma nin sun k'a di Simɔn deen Zuda Isikariyɔti ma.

²⁷A ye lɔgɔma nin di tuma min na, o waati yɛrɛ la Sutana y'a daminɛ ka baarajugu kɛ Zuda dusu la. Yezu y'a fɔ a ye ko: «E b'a fɛ ka fɛɛn min kɛ, i ka banba k'o kɛ.»

²⁸Kalanden tɔw si ma kuma nin kuun lɔn.

²⁹Dɔw tun b'a miiri ko Yezu y'a fɔ a ye ko a k'u ka makoyafɛn dɔ san ɲanagwɛ kama, walima ko a ka taga fɛɛn dɔ di fantanw ma, bari ale lo tun y'u ka warimarabaga ye.

³⁰Zuda y'o lɔgɔma nin minɛ k'a dumu ka ban tuma min na dɔrɔn, a wilila ka bɔ, o y'a sɔrɔ suu tun kora kosɔbɛ.

³¹Zuda bɔra ka ban dɔrɔn, Yezu y'a fɔ ko: «Sisan kɔni Mɔgɔ Dencɛ ye boɲa sɔrɔ, Ala fana ye boɲa sɔrɔ a barika la.

³²Ni Ala ye boɲa sɔrɔ a barika la, Ala fana ben'a kɛ a be boɲa sɔrɔ, a bena o kɛ sisan yɛrɛ.

³³ Ne deenw, ne be n'aw ye yanni waati dɔɔni dɔrɔn. O kɔ, aw bena ne yɔrɔ ɲini. Ne tun kɔnna k'a fɔ zuwifuw ye cogo min na k'u tena se ka na ne taayɔrɔ la, ne b'o koo kelen le fɔ aw ye fana.

³⁴ «Ne be cikura di aw ma ko: aw ka ɲɔgɔn kanu, ne y'aw kanu cogo min na, aw fana ka ɲɔgɔn kanu ten.

³⁵Mɔgɔ bɛɛ ben'a lɔn o seen fɛ ko aw kɛra ne ka kalandenw ye, ni aw be ɲɔgɔn kanu.»

³⁶Simɔn Piyɛri y'a ɲininga ko: «Matigi, i be taga min?» A y'a jaabi ko: «Ne be taga yɔrɔ min na, e te se ka tugu ne kɔ ka taga o yɔrɔ la fɔlɔ, nga yanni waati dɔ, e bena se ka tugu ne kɔ.»

³⁷Piyɛri y'a fɔ a ye tugu ko: «Mun na ne te se ka tugu i kɔ sisan? Ne bena n nii d'i kosɔn.»

³⁸Yezu y'a jaabi ko: «I bena i nii di ne kosɔn. Nga tiɲɛ tiɲɛ na, ne b'a fɔ i ye ko sanni dondo ka kasi, i ben'a fɔ siɲɛ saba ko i te ne lɔn.»