Read dyu Zan ka kitabu 14 Bible Online

Zan ka kitabu 14 - dyu bible

Zan ka kitabu 14

¹Yezu y'a fɔ a ka kalandenw ye ko: «Aw hakili kana ɲagami. Aw lara Ala la, aw ye la ne fana na.

²Boon caaman be n Faa ka luu kɔnɔ, n'o te ne tun ten'a fɔ ko ne be taga yɔrɔ labɛn aw ye.

³Ni n tagar'a labɛn ka ban, n bena kɔsegi ka n'aw ta ka taga n'aw ye, janko ne be yɔrɔ min na, aw fana ka kɛ yen.

⁴Aw be ne taayɔrɔ sira lɔn.»

⁵Toma y'a fɔ a ye ko: «Matigi, an t'i taayɔrɔ lɔn, an fana bena kɛ di k'a sira lɔn?»

⁶Yezu y'a jaabi ko: «Ne le ye sira, ni tiɲɛ, ani nii dibaga ye. Mɔgɔ si te se n Faa fɛ ni ne sababu tɛ.

⁷N'aw be ne lɔn, aw bena n Faa fana lɔn, sisan aw yɛrɛ y'a lɔn ka ban, aw y'a ye fana.»

⁸Filipu y'a fɔ a ye ko: «I Faa yira an na, o b'an wasa.»

⁹Yezu y'a fɔ Filipu ye ko: «Ne be n'aw ye kabini tumajan, o bɛɛ n'a ta, e ma ne lɔn wa Filipu? Ni mɔgɔ min ɲaa lara ne kan, o tigi ye n Faa fana ye, mun na e b'a fɔ ko ne ka n Faa yira aw la?

¹⁰I lanin t'a la ko ne ni n Faa bɛɛ ye kelen ye wa? Ne be kuma minw fɔ, ne t'o fɔ n yɛrɛ ma, n Faa min ni ne ye kelen ye, ale lo b'a ka baara kɛ.

¹¹Aw ye la ne la, ne ni n Faa bɛɛ ye kelen ye. N'aw ma la ne ka kuma na, aw ka la u la kɛwali nunu kosɔn.

¹²Tiɲɛ tiɲɛ na, ne b'a fɔ aw ye ko mɔgɔ min lara ne la, o tigi bena se ka ne ka kɛwaliw ɲɔgɔn kɛ. A yɛrɛ bena koo dɔw kɛ minw ka bon ni ne taw ye, bari ne be taga n Faa fɛ.

¹³Aw mana fɛɛn o fɛɛn daali ne tɔgɔ la, ne bena o kɛ, janko ka boɲa la Faa kan, a Dencɛ barika la.

¹⁴N'aw ye fɛɛn min ɲini ne tɔgɔ la, ne bena o kɛ.»

¹⁵«N'aw be ne kanu, aw bena ne ka kuma bato.

¹⁶Ne bena n Faa Ala daali a be dɛmɛbaga wɛrɛ ci aw ma, janko ale ka to ni aw ye tuma bɛɛ.

¹⁷Ale lo ye Nii Senuman ye, Tiɲɛtigi. Diɲɛ mɔgɔw te se ka sɔn a ma bari u t'a yera, u fana m'a lɔn. Aw kɔni b'a lɔn, bari a be n'aw ye, a bena sigi aw kɔnɔ.

¹⁸Ne tena aw to aw kelen na, ne bena segi ka na aw fɛ.

¹⁹Yanni waati dɔɔni diɲɛ mɔgɔw tena ne ye tugu, nga aw bena ne ye. Ne be nii na min kɛ, o la, aw fana bena to nii na.

²⁰O loon na, aw ben'a lɔn ko ne ni n Faa bɛɛ ye kelen ye, ko aw ni ne fana ye kelen ye.

²¹Mɔgɔ min ye ne ka kuma mɛn k'a bato, o tigi le be ne kanu. Mɔgɔ min be ne kanu, n Faa fana bena o tigi kanu, ne fana bena o tigi kanu ka ne yɛrɛ yira a la.»

²²Zude, min be danna Zuda Isikariyɔti la, ale y'a fɔ Yezu ye ko: «Matigi, mun na e bena i yɛrɛ yira anw dama na n'i t'i yɛrɛ yira mɔgɔ tɔw la?»

²³Yezu y'a jaabi ko: «Ni mɔgɔ min be ne kanu, o tigi bena ne ka kuma bato, n Faa bena o tigi kanu fana, anw bena na o tigi fɛ ka to n'a ye.

²⁴Mɔgɔ min te ne kanu, o tigi fana te ne ka kuma bato. Aw be kuma min mɛnna ne fɛ, o tɛ ne yɛrɛ ka kuma ye, nga n Faa min ye n ci, ale ta lo.

²⁵Ne y'o koo bɛɛ fɔ aw ye ka ne to aw cɛma.

²⁶Nga Dɛmɛbaga, min ye Nii Senuman ye, n Faa bena min ci n tɔgɔ la, ale ben'aw kalan koo bɛɛ la, ani ne ye koo minw bɛɛ fɔ aw ye, a ben'aw hakili jigi o bɛɛ la.

²⁷Ne be hɛrɛ le di aw ma, hɛrɛ min be bɔ ne fɛ, ne be o le di aw ma, ne t'a dira i n'a fɔ diɲɛ mɔgɔw b'a kɛ cogo min na. Aw hakili kana ɲagami, aw kana siran.

²⁸Aw y'a mɛn ka ban ne fɛ ko ne be taga, o kɔ n bena kɔsegi ka na aw fɛ. N'aw tun be ne kanu, aw tun bena nisɔndiya, bari ne be taga n Faa fɛ, ale ka bon ni ne ye.

²⁹Ne y'o fɔ aw ye kabini sisan, n'o ma kɛ fɔlɔ, janko n'o kɛra tuma min na, aw ka la ne la.

³⁰K'a ta sisan ma, ne tena kuma caaman fɔ aw ye tugu, bari diɲɛ nin kuntigi be nana. A te se ne kɔrɔ.

³¹Nga diɲɛ mɔgɔw ka kan k'a lɔn ko ne be n Faa kanu, o la, a ye min fɔ ne ye, ne b'o le kɛ. Aw ye wili an ka bɔ yan.»