Read dyu Zan ka kitabu 17 Bible Online

Zan ka kitabu 17 - dyu bible

Zan ka kitabu 17

¹Yezu y'o kuma nin fɔ ka ban dɔrɔn, a y'a ɲaa kɔrɔta sanfɛ k'a fɔ ko: «N Faa, waati sera sisan i ka boɲa la i Deen kan, janko ne fana ka boɲa la e kan,

²bari i ye kuntigiya di ne ma adamaden bɛɛ kan, ka nii banbali di ne ka mɔgɔw bɛɛ ma i ye minw di ne ma.

³Nii banbali sɔrɔko be bɔ ele lɔnko la, e min ye Ala kelenpe ye, ani ka ne Yezu Krista lɔn, e ye ne min ci.

⁴Ne y'i boɲa ka ban dugukolo kan, i tun ye baara minw di ne ma, ne y'olu bɛɛ kɛ ka ban.

⁵Sisan n Faa, boɲa min tun be ne kan i gɛrɛfɛ fɔlɔfɔlɔ sanni diɲɛ ka dan, i k'o ɲɔgɔn la ne kan ne ka to i gɛrɛfɛ tugu.

⁶I ye mɔgɔ minw woloma k'u bɔ diɲɛ mɔgɔw cɛma k'u di ne ma, ne y'i ka koo yira u la. U tun y'i taw ye, e tun y'u di ne ma, olu fana y'i ka kuma bato.

⁷Sisan u y'a faamu ko i ye fɛɛn minw di ne ma, k'u bɛɛ bɔra ele fɛ,

⁸ne ye kuma min bɛɛ fɔ u ye, u lara o la ko ele le y'o fɔ ne ye, u sɔnna o ma, u fana y'a faamu sɔbɛ la ko ne bɔra e fɛ, u lar'a la ko ele le ye ne ci.

⁹Ne t'i daali diɲɛ mɔgɔw bɛɛ ye dɛ. Nga i ye minw di ne ma, ne b'i daali olu le ye, bari u kɛra i ta ye.

¹⁰Fɛɛn o fɛɛn ye ne ta ye, o fana ye ele ta ye i n'a fɔ min ye i ta ye, o ye ne ta ye cogo min na, ne ye boɲa sɔrɔ olu sababu la.

¹¹Ne tena to diɲɛ kɔnɔ tugu. Olu bena to diɲɛ na, ne do be tagara e fɛ. N Faɲuman, ne b'i daali i k'u mara i tɔgɔ kosɔn i ye min di ne ma, janko u ka se ka kɛ kelen ye i n'a fɔ ne ni ele ye kelen ye cogo min na.

¹² Ka ne to n'olu ye yan, i ye minw woloma k'o di ne ma, ne y'o bɛɛ mara i barika la, k'u tanga juguman ma, fɔɔ min tun latigɛra halaki ma. O fana kɛra janko min fɔra i ka kuma na, o ka kɛ.

¹³Sisan ne be tagara e fɛ, ne be nin kuma nin fɔ u ye diɲɛ na, janko u ka ne ka nisɔndiya dafanin sɔrɔ.

¹⁴Ne ye i ka kuma fɔ u ye, o la diɲɛ mɔgɔw be u kɔniya, bari u te diɲɛ mɔgɔw ye, i n'a fɔ ne fana te diɲɛ mɔgɔ ye cogo min na.

¹⁵Ne te i daali ko i k'u ta ka bɔ diɲɛ na, nga i k'u tanga juguman ma.

¹⁶U te diɲɛ mɔgɔw ye i n'a fɔ ne fana te diɲɛ mɔgɔ ye cogo min na.

¹⁷I k'o saniya i ka tiɲɛ barika la. I ka kuma le ye tiɲɛ ye.

¹⁸E ye ne ci diɲɛ na cogo min na, o cogo la fana ne b'u ci diɲɛ kɔnɔ.

¹⁹Ne fana be ne yɛrɛ di u kosɔn, janko u fana ka se k'u yɛrɛ d'i ma sɔbɛ la.

²⁰Ne t'i daali olu dama ye dɛ, nga minw bena la ne la u ka kuma barika la, ne b'i daali olu fana ye,

²¹janko u bɛɛ ka kɛ kelen ye, n Faa, i n'a fɔ ne ni e ye kelen ye cogo min na. Olu fana ka kɛ kelen ye ten n'an ye, janko diɲɛ mɔgɔw ka l'a la ko e ye ne ci.

²²I ye boɲa min di ne ma, ne y'o di u ma, janko u ka se ka kɛ kelen ye i n'a fɔ an fana ye kelen ye cogo min na.

²³Ne ka to u fɛ, i n'a fɔ e be ne fɛ cogo min na, janko u ka se ka bɛn ka kɛ kelen ye, ani diɲɛ mɔgɔw k'a lɔn ko e ye ne ci ani ko i y'u kanu i n'a fɔ i ye ne kanu cogo min na.

²⁴N Faa, e ye minw woloma k'o di ne ma, ne b'a fɛ ne be yɔrɔ min na, olu fana ka kɛ o yɔrɔ la, i ye boɲa min la ne kan, u ka se k'o ye, bari e ye ne kanu kabini fɔlɔfɔlɔ sanni diɲɛ ka dan.

²⁵N Faa, e min ka ɲi, diɲɛ mɔgɔw ma e lɔn, ne y'i lɔn. Nunu fana y'a lɔn ko e lo ye ne ci.

²⁶Ne y'i koo fɔ u ye, ani n bena tila k'a fɔ u ye tugu, janko i ye ne kanu cogo min na, o kanuya ɲɔgɔn ka don u dusu la, ani ne fana ka kɛ olu fɛ.»