Read dyu Zan ka kitabu 19 Bible Online

Zan ka kitabu 19 - dyu bible

Zan ka kitabu 19

¹Pilati ye Yezu di k'u k'a bugɔ.

²Sɔlidasiw ye ŋɔni tigɛ k'o meleke k'o kɛ i n'a fɔ masafugulan ye, k'o biri a kuun na, ka faniba wuleman biri a kan,

³ka to ka gwɛrɛ k'a fɔ a ye ko: «I ni sɛ zuwifuw ka masacɛ.» U tun be to k'a bugɔ.

⁴Pilati kɔsegira ka bɔ tugu k'a fɔ zuwifuw ye ko ale bena bɔ n'a ye kɛnɛma janko u k'a faamu ko ale ma jalakiyɔrɔ ye cɛɛ nin na.

⁵Yezu bɔra kɛnɛma tuma min na, o ŋɔni fugulan tun birinin be a kuun na, ani faniwulen nin fana tun birinin be a kan. Pilati y'a fɔ zuwifuw ye ko: «Cɛɛ filɛ nin ye.»

⁶Sarakalasebagaw kuntigiw n'u ka mɔgɔw y'a ye dɔrɔn, u y'a daminɛ ka pɛrɛn ko: «A ka gwengwen lɔgɔ kan! A ka gwengwen lɔgɔ kan!» Pilati y'a fɔ u ye ko: «Aw yɛrɛ k'a minɛ k'a gwengwen, ne kɔni ma jalakiyɔrɔ si ye a la.»

⁷Zuwifu nunu y'a fɔ ko sariya be olu fɛ, k'olu ka sariya la a ka kan ka faga, bari a y'a yɛrɛ kɛ Ala Deen ye.

⁸Pilati y'o kuma mɛn tuma min na, a siranna kosɔbɛ.

⁹A kɔsegira ka don ka Yezu ɲininga ko a bɔra min. Nga Yezu m'a jaabi.

¹⁰Pilati y'a fɔ a ye ko: «I te ne jaabi wa? I m'a lɔn ko ne be se k'i gwengwen lɔgɔ kan, walima k'i labila wa?»

¹¹Yezu y'a jaabi ko: «See min b'i fɛ k'a yira ne la, i m'o sɔrɔ i yɛrɛ ma, Ala le ye o see d'i ma, o la do, mɔgɔ min ye ne don i bolo, o tigi le ye hakɛba kɛ ka tɛmɛ e kan.»

¹²Pilati y'o kuma mɛn dɔrɔn, a tun be cogo ɲinina ka Yezu labila, nga zuwifuw tora ka pɛrɛn ko: «N'i y'a bila, i te Ɔrɔmu masacɛ teri ye tugu. Bari mɔgɔ min b'a yɛrɛ kɛ masa ye, o tigi be wili masacɛ le kama.»

¹³Pilati y'o kuma nunu mɛn tuma min na, a ko u ka bɔ ni Yezu ye luu kɔnɔ ka taga sigi kiti tigɛyɔrɔ la, min dilanna ni kabakuru ye n'a be wele Gabata eburukan na.

¹⁴O tun ye *Hɔrɔnya ɲanagwɛ labɛnlon ye. Tilegwan tuma na, Pilati y'a fɔ zuwifuw ye ko: «A ye aw ka masacɛ filɛ.»

¹⁵Nga u y'a jaabi ko a ka faga, a ka faga lɔgɔ kan! Pilati y'a fɔ u ye ko: «Ne k'aw ka masacɛ faga lɔgɔ kan wa?» Sarakalasebagaw kuntigiw y'a jaabi ko masacɛ wɛrɛ te olu fɛ Ɔrɔmu masacɛ kɔ.

¹⁶A ye sira di k'u ka taga Yezu gwengwen lɔgɔ kan, u y'a minɛ ka taga n'a ye.

¹⁷Yezu y'a ka gwengwenlɔgɔ ɲun. U tagara se yɔrɔ dɔ la min tɔgɔ ko Kungolo yɔrɔ, u b'a wele eburukan na ko Gɔligota.

¹⁸O yɔrɔ la, u y'a gwengwen ani mɔgɔ fila wɛrɛ fana, kelen a kinibolo fɛ, kelen a numanbolo fɛ, Yezu tora cɛmancɛ la.

¹⁹Pilati tun ye sɛbɛ dɔ kɛ k'o gwengwen Yezu kuun sanfɛ, a sɛbɛnnin tun be ko: «Nazarɛtika Yezu, zuwifuw ka masacɛ.»

²⁰Zuwifu caaman tun ye o sɛbɛ nin kalan, bari Yezu tun gwengwenna yɔrɔ min na, o yɔrɔ tun man jan dugu la, ani o kuma nin tun sɛbɛnna eburukan na, ni latɛnkan, ani girɛkikan na.

²¹Sarakalasebagaw y'a fɔ Pilati ye ko a kan'a sɛbɛn «Zuwifuw ka masacɛ», nga a k'a sɛbɛn ko «Cɛɛ nin ko ale ye zuwifuw ka masacɛ ye.»

²²Pilati y'a fɔ u ye ko ale ye min sɛbɛn ka ban, ko ale y'o sɛbɛn.

²³Sɔlidasiw ye Yezu gwengwen ka ban tuma min na, u y'a ka faniw tilan sigiyɔrɔ naani, u kelen kelen bɛɛ n'u ta. O kɔ, u y'a ka foroca ta, kalannɔ tun te min na,

²⁴ k'a fɔ ɲɔgɔn ye ko: «An kan'a faran, an ka kala la n'a bena kɛ mɔgɔ min ta ye, o ka lɔn.» O kɛra janko min fɔra Ala ka kuma na, o ka kɛ. A ko: «U ye ne ka faniw tilan ɲɔgɔn cɛ, u ye kala la janko ka ne ka foroca sɔrɔbaga lɔn.» Sɔlidasiw y'o le kɛ.

²⁵Yezu bamuso, n'a bamuso dɔgɔmuso, ani Kulopasi ka muso Mariyamu, ni Magidala Mariyamu, olu lɔnin tun be Yezu ka gwengwenlɔgɔ gɛrɛfɛ.

²⁶Yezu y'a bamuso, n'a ka kalanden dɔ nin ye, min koo tun ka d'a ye, u tun be ɲɔgɔn kɔrɔ. A y'a fɔ a bamuso ye ko: «Muso, i deen filɛ nin ye.»

²⁷O kɔ, a y'a fɔ kalanden nin fana ye ko: «I bamuso filɛ nin ye.» K'a ta o waati ma, kalanden nin y'a ladon a fɛ.

²⁸ O bɛɛ kɛnin kɔ, Yezu tun y'a lɔn ko koo bɛɛ dafara, ani janko min fɔra Ala ka kuma na, o ka kɛ, a y'a fɔ ko: «Minnɔgɔ be ne la.»

²⁹Daga dɔ tun be yen, min fanin be vinɛgiri la. Dɔ ye fuu ta k'o don vinɛgiri nin na, k'a siri *izɔpikala dɔ la, k'o wili k'a gwɛrɛ Yezu daa la.

³⁰Yezu ye vinɛgiri nin nɛnɛ tuma min na, a y'a fɔ ko: «Koo bɛɛ dafara.» O kɔ, a y'a kuun biri duguma, a nii bɔra.

³¹O kɛra *Hɔrɔnya ɲanagwɛ labɛnlon na minkɛ, zuwifuw tun be siran ko mɔgɔ minw gwengwenna, k'u suuw kana to lɔgɔ kan fɔɔ ka se lafiɲɛlon ma, o lafiɲɛlon ni tɔɔ nunu fana tun te kelen ye. O la, u tagar'a ɲini Pilati fɛ, ko a ka sira d'u ma ka mɔgɔ nunu seenw karikari k'u jigi ka bɔ yen.

³²Sɔlidasiw nana mɔgɔ kelen nin seenw kari, ka kelen dɔ nin fana ta kari.

³³U sera Yezu ma, u y'a ye ko a sara ka ban, o la, u m'ale seenw kari tugu.

³⁴Nga sɔlidasicɛ kelen y'a gɛrɛn sɔgɔ ni taman ye, joli ni jii bɔra ka woyo.

³⁵Mɔgɔ min y'o ye, ale lo b'o seereya fɔra, ani a ka seereya ye tiɲɛ ye. A fana lanin b'a la, ko ale be min fɔ, k'o ye tiɲɛ ye, janko aw fana ka se ka l'a la.

³⁶ O koo nunu bɛɛ kɛra, janko min fɔra Ala ka kuma na, o ka dafa. A tun fɔra ko: «A kolo si tena kari.»

³⁷ A fɔra Ala ka kuma na fana ko: «U ye min sɔgɔ, u bena ale filɛ.»

³⁸O koo nunu bɛɛ kɛra ka ban tuma min na, Yusufu min tun bɔra Arimate, ale fana tun ye Yezu ka kalanden ye dogo la, bari a tun be siran zuwifuw ɲa. Ale tagara Yezu suu daali Pilati fɛ, Pilati ye sira d'a ma, a nana Yezu suu jigi ka bɔ lɔgɔ kan.

³⁹ Nikodɛmu min tun tagara Yezu fɛ loon dɔ sufɛ, ale fana nana ni tulu kasadiman ɲagaminin ye, min tun be se kilo bi saba ma.

⁴⁰U ye Yezu suu meleke fani na, ani ka wusulan kɛ a kan ka kɛɲɛ ni zuwifuw ka suu doncogo ye.

⁴¹Yezu tun gwengwenna yɔrɔ min na, nankɔ dɔ tun be yen. Kaburukura dɔ tun b'o kɔnɔ, mɔgɔ si suu tun ma don ka ye o kɔnɔ fɔlɔ.

⁴²U ye Yezu suu don o kaburu nin kɔnɔ, bari zuwifuw tun be lafiɲɛlon labɛnna, ani kaburu nin fana yɔrɔ tun ka surun.