Read dyu Zan ka kitabu 2 Bible Online

Zan ka kitabu 2 - dyu bible

Zan ka kitabu 2

¹Tile fila tɛmɛnin kɔ, kɔɲɔya dɔ tun be kɛra Kana, Galile mara la. Yezu bamuso tun be yen.

²Yezu n'a ka kalandenw fana tun welela yen.

³Duvɛn banna minkɛ, Yezu baa tagar'a fɔ a ye ko: «U ka duvɛn banna.»

⁴Nga Yezu y'a jaabi ko: «Muso! E ko ne ka mun kɛ? [1] Ne ka waati ma se fɔlɔ.»

⁵A baa tagar'a fɔ baaradenw ye ko: «N'a ye fɛɛn o fɛɛn fɔ aw ye, aw k'o kɛ.»

⁶Daga wɔɔrɔ tun be o yɔrɔ la, olu bilanin tun be zuwifuw ka yɛrɛ saniyali kosɔn ka kɛɲɛ n'u ka landa ye, o kelen kelen bɛɛ be litiri kɛmɛ ɲɔgɔn bɔ.

⁷Yezu y'a fɔ u ye ko: «Aw ka daga nunu fa jii la.» U y'u fa.

⁸Yezu y'a fɔ u ye ko: «Aw ka dɔ bɔ sisan ka taga di ɲamɔgɔ ma.» U ye dɔ bɔ ka taga d'a ma.

⁹A ye jii nin nɛnɛ, jii min tun yɛlɛmana ka kɛ duvɛn ye. Cɛɛ m'o duvɛn bɔyɔrɔ lɔn. Nga baaradenw kɔni tun b'a lɔn, bari olu yɛrɛw le tun ye dagaw fa jii la. Ɲamɔgɔ ye kɔɲɔcɛ wele

¹⁰k'a fɔ a ye ko: «O ɲɔgɔn na, mɔgɔ bɛɛ be bɔ ni duvɛn diman le ye fɔlɔ. Ni mɔgɔ weleninw be ɲini ka fa tuma min na, u be sɔrɔ ka bɔ ni duvɛn kumunin ye. Nga ele kɔni ye duvɛn diman mara fɔɔ sisan!»

¹¹Yezu y'a ka kabako fɔlɔ kɛ ten le Kana, Galile mara la. A y'a ka sebagaya yira ten a ka kalandenw na, u lar'a la.

¹² O kɔ, a tagara Kafaranamu n'a bamuso, n'a dɔgɔninw n'a ka kalandenw ye. Nga u ye tile damani dɔrɔn le kɛ yen.

¹³ Zuwifuw ka *Hɔrɔnya ɲanagwɛ tun surunyana, Yezu tagara Zeruzalɛmu.

¹⁴A donna Alabatosoba kɔnɔ ka misiw ni sagaw ni tuganin feerebagaw, ani warifalenbagaw sɔrɔ yen.

¹⁵A ye juru kɛ busan ye k'u bɛɛ gwɛn ka bɔ Alabatosoba kɔnɔ, misiw ni sagaw bɛɛ. A ye warifalenbagaw ka tabaliw ɲɔti k'u benben k'u ka wariw yɛrɛkɛ!

¹⁶A y'a fɔ tuganin feerebagaw ye ko: «Aw ye nunu ta ka bɔ yan! Aw kana n Faa ka soo kɛ jago kɛyɔrɔ ye.»

¹⁷ O la, a ka kalandenw hakili jigira a la ko a fɔra Ala ka kuma na ko: «E ka soo hami be ne tɔɔrɔ n dusu la kosɔbɛ.»

¹⁸O tuma na, zuwifuw y'a ɲininga ko: «I ye koo min kɛ sisan, i be se ka kabako jumɛn kɛ min b'a yira an na ko i ka kan ka nin kɛ?»

¹⁹ Yezu y'u jaabi ko: «Aw ka Alabatosoba nin ci, ne ben'a lɔ tile saba kɔnɔ.»

²⁰Zuwifuw y'a jaabi ko: «I ko di? Soo nin lɔra saan bi naani ni wɔɔrɔ kɔnɔ, e ko i bena o lɔ tile saba kɔnɔ kɛ!»

²¹Yezu tun be Alabatosoba min ma, o tun ye a yɛrɛ ye.

²²Yezu sara ka kunun tuma min na, a ka kalandenw hakili sɔrɔla ka jigi a ka kuma fɔnin na. O tuma na, u lara Ala ka kuma na, ka la Yezu ka kuma fɔninw fana na.

²³Ka Yezu to Zeruzalɛmu *Hɔrɔnya ɲanagwɛ la, a ye kabako minw kɛ mɔgɔw ɲana, caaman lara a la olu kosɔn.

²⁴Nga Yezu kɔni tun ma la olu la, bari a tun b'u bɛɛ kɔnɔnakow lɔn.

²⁵Ka mɔgɔw ka koo ɲafɔ a ye, a mako tun te o la, bari a be adamaden n'a kɔnɔnako bɛɛ lɔn.