Read dyu Zan ka kitabu 3 Bible Online

Zan ka kitabu 3 - dyu bible

Zan ka kitabu 3

¹*Fariziɲɛ dɔ tun be yen, a tɔgɔ ko Nikodɛmu. Zuwifuw ka mɔgɔbaba dɔ tun lo.

²Ale nana Yezu sɔrɔ sufɛ k'a fɔ a ye ko: «Karamɔgɔ, anw y'a lɔn ko Ala le y'i ci. Bari i be kabako minw kɛ, ni Ala te e mɔgɔ min fɛ, e te se k'o kɛ.»

³Yezu y'a fɔ a ye ko: «Tiɲɛ tiɲɛ na, ne b'a fɔ i ye ko ni mɔgɔ min ma segi ka wolo tugu, o tigi te se ka don Ala ka masaya la.»

⁴Nikodɛmu ko: «Ni mɔgɔ kɔrɔla ka ban, o tigi be se ka segi ka wolo tugu cogo di? A be se ka segi ka don a baa kɔnɔ ka wolo tugu wa?»

⁵Yezu y'a jaabi ko: «Tiɲɛ tiɲɛ na, ne b'a fɔ i ye ko ni mɔgɔ min ma wolo jii, ani Nii Senuman barika la, o tigi te se ka don Ala ka masaya la.

⁶Mɔgɔ min wolola adamaden barika la, o tigi ye adamaden ye. Mɔgɔ min wolola Nii Senuman barika la, o tigi ye Ala deen ye.

⁷Ne y'a fɔ ko fɔɔ mɔgɔ ka segi ka wolo, e kan'a to o b'i dabari ban.

⁸Yɔrɔ min ka di fɔɲɔ ye, a be taga o yɔrɔ la. I b'a mankan mɛn, i t'a bɔyɔrɔ n'a taayɔrɔ lɔn. Ala ka baara lo, adamaden te se ka min faamu. Mɔgɔ min wolola Nii Senuman barika la, o fana be ten.»

⁹Nikodɛmu y'a fɔ ko: «Uun! O koow be se ka kɛ cogo di?»

¹⁰Yezu y'a jaabi ko: «E min ye Isirayɛli karamɔgɔ dɔ ye, e ma o lɔn wa?

¹¹Tiɲɛ tiɲɛ na, ne b'a fɔ i ye ko an be koo min lɔn, an b'o le fɔ. An ye koo min ye, an be lɔ n'o le seereya ye. Aw do te sɔn o ma.

¹²Ne be diɲɛ koow fɔra aw ye, aw te lara o la. Ni ne ye arijana koow fɔ aw ye, aw bena la o la cogo di?

¹³Mɔgɔ si ma yɛlɛ ka taga arijana na fɔɔ Mɔgɔ Dencɛ min bɔra o yɔrɔ la.

¹⁴ «Musa ye saa nigɛlaman kɔrɔta sanfɛ lɔgɔ kan cogo min na kongokolon kɔnɔ, fɔɔ Mɔgɔ Dencɛ fana kɔrɔ ka ta ten,

¹⁵waasa ni mɔgɔ min y'a jigi la a kan, o tigi ka nii banbali sɔrɔ.

¹⁶Ala ye diɲɛ kanu haali, fɔɔ a y'a Deen kelenpe ci mɔgɔw ma, waasa ni mɔgɔ min y'a jigi la a kan, o tigi kana halaki, nga o ka nii banbali sɔrɔ.

¹⁷Ala m'a Dencɛ ci diɲɛ na waasa ka mɔgɔw jalaki, nga waasa k'u kisi.

¹⁸Ni mɔgɔ min y'a jigi la a kan, o tigi kisira kiti ma, nga ni min m'a jigi la a kan, o tigi jalakira ka ban bari a ma sɔn ka la Ala Dencɛ kelenpe la.

¹⁹U jalakira ka ban bari yeelen bɔra diɲɛ mɔgɔw ye. O bɛɛ n'a ta, dibi koo diyara u ye ka tɛmɛ yeelen kan. Bari u ka kɛwaliw ma ɲi.

²⁰O ye wajibi ye, yeelen koo man di kojugukɛla ye, a be siran k'a ka kɛwaliw kɛ kɛnɛ kan, bari, u ben'a ye.

²¹Nga mɔgɔɲuman b'a ta kɛ yeelen na, waasa mɔgɔw k'a ka kɛwaliɲumanw ye, a be minw kɛ Ala sago la.»

²²O tɛmɛnin kɔ, Yezu n'a ka kalandenw nana to Zude mara la. A tun be mɔgɔw batize.

²³Zan fana tun be mɔgɔw batizera Ayinɔn, o ni Salimu man jan. Jii tun ka ca o yɔrɔ la. Mɔgɔw tun be na batize yen.

²⁴ O y'a sɔrɔ u ma Zan minɛ k'a don kaso la fɔlɔ.

²⁵Loon dɔ la, sɔsɔli wilila Zan ka kalanden dɔw ni zuwifu dɔ cɛ ka taga saniyako faan fɛ ka kɛɲɛ ni landa ye.

²⁶U tagara Zan sɛgɛrɛ k'a fɔ a ye ko: «Karamɔgɔ, cɛɛ min tun be n'i ye Zurudɛn baji kɔfɛ, fɔɔ e tun ye min koo fɔ, a b'a la fana ka mɔgɔw batize, bɛɛ be tagara ale kɔ.»

²⁷Zan y'u jaabi ko: «Adamaden te se ka foyi sɔrɔ ni Ala m'a d'a ma.

²⁸ Ne y'a fɔ tuma min na ko ne te Ala ka Mɔgɔ wolomanin nin ye, ko ne cira a ɲa le, aw ye ne seerew ye.

²⁹Kɔnyɔmuso ye kɔɲɔcɛ ta le ye. Nga kɔɲɔcɛ tericɛ be lɔ gɛrɛfɛ, ka to ka mɛnni kɛ a fɛ. A nisɔn be diya bari a be mɛnni kɛra kɔɲɔcɛ fɛ. O nisɔndiya ɲɔgɔn le be n na. N nisɔn ka di kosɔbɛ.

³⁰Wajibi lo, ale ka kunkɔrɔta sɔrɔ, ne ka dɔgɔya.

³¹«Mɔgɔ min bɔra sankolo la, o tigi be fɛɛn bɛɛ kunna. Min be dugukolo kan, o ye diɲɛ mɔgɔ le ye, o be diɲɛ koow le fɔ. Mɔgɔ min bɔra arijana na,

³²a ye min ye, ka min mɛn, a b'o le fɔ. Nga adamadenw te sɔn o le ma.

³³Ni mɔgɔ min lara a ka kuma fɔninw na, o tigi b'a yira ko Ala ye tiɲɛtigi ye.

³⁴Ala ye mɔgɔ min ci, o tigi be Ala ka kuma yɛrɛ le fɔ bari Ala be Nii Senuman d'a ma, daan te min dili la.

³⁵ Faa b'a Deen kanu fɔɔ a ye fɛɛnw bɛɛ don a bolo.

³⁶Ni mɔgɔ min y'a jigi la Ala Deen kan, o tigi ye nii banbali sɔrɔ ka ban. Nga ni mɔgɔ min ma sɔn k'a jigi la a Deen kan, o tigi tena nii banbali sɔrɔ, Ala ben'a tɔɔrɔ kosɔbɛ.»