Read dyu Zan ka kitabu 5 Bible Online

Zan ka kitabu 5 - dyu bible

Zan ka kitabu 5

¹O tɛmɛnin kɔ, zuwifuw ka ɲanagwɛ dɔ tun be kɛra Zeruzalɛmu. Yezu tagara yen.

²O be don ni sagaw ye daa min fɛ dugu kɔnɔ, o gɛrɛfɛ, jii lɔyɔrɔ dɔ tun be yen, o b'o yɔrɔ nin wele eburukan na ko Bɛtizata. O y'a yɔrɔ nin lɔ ka bulonda duuru kɛ a la.

³O bulon nunu kɔnɔ, banabagatɔw tun be la yen caaman: fiɲɛntɔw, senkelenninw, ani murukuw. [U tun be la yen ka jii magamagatuma kɔnɔ.

⁴Bari tuma dɔ, Matigi ka mɛlɛkɛ dɔ tun be jigi ka jii lamaga. Ni banabagatɔ min kɔnna ka jigi jii la a lamaganin kɔ, o tigi be kɛnɛya, hali n'a ka bana tun be cogo o cogo.]

⁵Cɛɛ dɔ tun be yen, ale saan bi saba ni seegi tun lo a ka bana na.

⁶Yezu ye cɛɛ lanin ye, k'a lɔn ko a banatuma mɛnna kosɔbɛ. A y'a ɲininga ko: «I b'a fɛ ka kɛnɛya wa?»

⁷A y'a jaabi ko: «Matigi, mɔgɔ te n fɛ n'a be n ta ka n jigi jii la a magamagawaati la. Sanni ne b'a fɔ ko n be dɛmɛdɛmɛ ka jigi, dɔ be kɔn ka jigi ne ɲa.»

⁸Yezu y'a fɔ a ye ko: «Wili k'i ka dilan ta ka taama.»

⁹O yɔrɔnin bɛɛ, cɛɛ kɛnɛyara, a wilila k'a ka dilan ta ka to ka taga. O loon nin tun ye lafiɲɛlon ye.

¹⁰ O la, zuwifuw y'a fɔ cɛɛ ye ko: «Cɛɛ, bii ye lafiɲɛlon ye, a ma daga k'i ka dilan ta ka taga.»

¹¹Nga a y'u jaabi ko: «Cɛɛ min ye ne kɛnɛya, ale lo ko ne ka n ka dilan ta ka taga dɛ!»

¹²U y'a ɲininga ko: «Jɔn le y'a fɔ i ye ko i k'i ka dilan ta ka taga?»

¹³Nga mɔgɔ min tun ye cɛɛ kɛnɛya, a tun m'o lɔn. Bari Yezu yɔrɔ tun janfara o yɔrɔ jama na.

¹⁴O kɔ, Yezu ye cɛɛ kunbɛn Alabatosoba kɔnɔ, a y'a fɔ a ye ko: «Ayiwa, i kɛnɛyara sisan, i kana kojugu wɛrɛ kɛ tugu waasa o sara kana juguya ni fɔlɔta ye.»

¹⁵Cɛɛ tagar'a fɔ zuwifuw ye ko a kɛnɛyabaga ye Yezu le ye.

¹⁶Kabini o tuma na, zuwifuw tun be Yezu darabɔ, bari a tun ye koo nin kɛ lafiɲɛlon na.

¹⁷Nga Yezu y'a fɔ u ye ko: «N Faa be baara la halibi, o la, ne fana b'a kɛ.»

¹⁸O kama, zuwifuw tun b'a ɲini jagoya la janko k'a faga. Lafiɲɛlon batobaliya dama tun t'a kuun ye. Nga u ko a be Ala wele ko a Faa, ani ko a b'a yɛrɛ suma ni Ala ye.

¹⁹O la, Yezu ye kuma ta k'a fɔ u ye ko: «Tiɲɛ tiɲɛ na, ne b'a fɔ aw ye ko Deen te se ka foyi kɛ a yɛrɛ ma. A b'a Faa ka kɛta le filɛ. Ni Faa ye fɛɛn o fɛɛn kɛ, Deen fana b'o ɲɔgɔn kɛ.

²⁰Bari Deen koo ka di a Faa ye, o la a b'a ka koo kɛta bɛɛ yira a la. A bena dɔ wɛrɛw yɛrɛ yira a la minw be tɛmɛ nunu kan fɔɔ aw yɛrɛ bena kabakoya.

²¹N Faa be suuw kunun ka nii di u ma cogo min na, o cogo kelen na, a Deen fana be nii di a diyanamɔgɔw ma.

²²N Faa tena mɔgɔ si kiti. Bari a ye kitiko bɛɛ to a Deen bolo,

²³waasa bɛɛ k'a Deen boɲa i n'a fɔ u be Faa boɲa cogo min na. Ni mɔgɔ min m'a Deen boɲa, o tigi ma Faa fana boɲa, min y'a cibaga ye.

²⁴Tiɲɛ tiɲɛ na, ne b'a fɔ aw ye ko ni mɔgɔ min ye n ka kuma lamɛn ka la n cibaga la, o tigi ye nii banbali sɔrɔ. A tena kiti, a niin bɔra saya la ka don hɛrɛ la ka ban.

²⁵Tiɲɛ tiɲɛ na, ne b'a fɔ aw ye ko waati dɔ bena se. A yɛrɛ sera ka ban. Suuw bena mɛnni kɛ n fɛ. N'o minw ye n ka kuma mɛn, Ala bena nii d'u ma.

²⁶N Faa ye nii tigi ye, o la, a ye nii diko see di a Dencɛ fana ma.

²⁷A ye kiti tigɛko see d'a ma, bari Mɔgɔ Dencɛ lo.

²⁸Ayiwa, o kana aw kabakoya. Waati dɔ bena se, suuw bena ne kaan mɛn.

²⁹ U bena kunun. Minw tun be ɲuman kɛ, olu bena kunun ka balo banbali sɔrɔ. Kojugukɛlaw bena kunun kiti kama.

³⁰Ne te se ka foyi kɛ n yɛrɛ ma. Ne be min mɛn, ne be kiti tigɛ ka kɛɲɛ n'o le ye. Ne ka kiti fana tilennin lo. Bari ne te n yɛrɛ sago kɛra fɔɔ ne cibaga sago.»

³¹Yezu y'a fɔ ko: «N'a tun kɛra ko ne yɛrɛ le be n yɛrɛ koo fɔra, o tiɲɛ yɔrɔ tun te lɔn.

³²Nga mɔgɔ wɛrɛ le ye ne seere ye. Ale be min fɔ n ka koo la, o ye tiɲɛ yɛrɛ le ye.

³³ Aw tun ye mɔgɔw ci Zan fɛ k'a ɲininga. A ye tiɲɛ fɔ aw ye ne ka koo la.

³⁴A ma kɛ ko ne mako be adamaden ka seereya la. Nga ne be kuma ten waasa aw ka kisi.

³⁵Zan kɛra fitinɛ ye min be yeelen bɔ. Aw tun b'a fɛ ka nisɔndiya a ka yeelen fɛ waatinin kɔnɔ.

³⁶Ayiwa, seere wɛrɛ be ne la, min ka seereya ka bon ni Zan ta ye. N Faa ye baara minw di ne ma, ne be minw kɛ, o le b'a yira ko Faa ye ne ci.

³⁷ N Faa min ye n ci, ale fana be ne koo fɔ. Nga aw ma deli k'a kumakan lamɛn, ani min b'a yira aw la, aw t'o lɔn.

³⁸A ka kuma sigiyɔrɔ te aw dusu la fana, bari a ye min ci, aw lanin te ale la.

³⁹Aw be Ala ka kuma kalan kosɔbɛ bari aw be miiri ko aw bena nii banbali sɔrɔ o kalan fɛ. K'a sɔrɔ o kuma nunu be ne le koo fɔ.

⁴⁰Aw do t'a fɛ ka la ne la waasa ka nii sɔrɔ.

⁴¹Ne ka boɲa sɔrɔ, o te bɔ adamadenw fɛ.

⁴²Ne b'aw lɔn, aw te Ala kanu.

⁴³Ne nana n Faa Ala tɔgɔ la, nga aw ma sɔn ne ma. Ni mɔgɔ dɔ nana a yɛrɛ tɔgɔ la sisan, aw be sɔn ale ma.

⁴⁴Aw be se ka la ne la cogo di? Aw minw b'aw ka boɲa sɔrɔ aw adamaden ɲɔgɔnw fɛ, sanni aw k'o ɲini Ala kelen fɛ.

⁴⁵Aw kan'a miiri ko ne lo bena aw jalaki kiti tigɛlon na n Faa ɲakɔrɔ dɛ! Aw jalakibaga ye Musa le ye, aw y'aw jigi la min kan.

⁴⁶N'aw tun lara Musa la, aw tun bena la ne la. Bari Musa ye ne le koo fɔ a ka sɛbɛ kɔnɔ.

⁴⁷A ye min sɛbɛn, n'aw ma la o la, ne be min fɔra, aw bena se ka la o la cogo di?»