Read dyu Zan ka kitabu 7 Bible Online

Zan ka kitabu 7 - dyu bible

Zan ka kitabu 7

¹O kɔ, Yezu tora ka Galile mara yaalayaala. A tun t'a fɛ ka taga Zude mara yaala, bari o yɔrɔ zuwifuw tun b'a fɛ k'a faga.

² O bɛɛ n'a ta, zuwifuw ka Sumanladon ɲanagwɛ tun surunyana ka ban,

³a dɔgɔninw y'a fɔ a ye ko: «Bɔ yan ka taga Zude, waasa i ka kalandenw k'i ka kabako kɛtaw ye fana.

⁴N'i b'a fɛ mɔgɔw k'i lɔn, e t'i ka kɛwaliw kɛ dogo la. I be kabakow kɛ cogo min na, taga i yɛrɛ yira diɲɛ na.»

⁵O y'a sɔrɔ a dɔgɔninw yɛrɛ tun ma la a la.

⁶Yezu y'u jaabi ko: «Ne ka waati ma se ban. Aw kɔni, waati bɛɛ ka ɲi aw fɛ.

⁷Adamadenw kɔni te se k'aw kɔniya. Nga u be ne kɔniya, bari ne be to k'a fɔ k'u ka kɛwaliw ka jugu.

⁸Aw yɛrɛ ka taga o ɲanagwɛ nin na, ne kɔni tena taga, bari ne ka waati ma se fɔlɔ.»

⁹A y'o kuma nunu fɔ ka ban, a tora Galile.

¹⁰Nga a dɔgɔninw taanin kɔ ɲanagwɛ la Zude, a fana ye sira ta, a ma sɔn mɔgɔ k'a ye. A tagara dogo la.

¹¹Zuwifuw tun be Yezu yɔrɔ ɲinina ɲanagwɛ tuma na. U tun b'a fɔ ko: «A yɛrɛ be min le sa?»

¹²Mɔgɔw tun be ɲɔgɔn sɔsɔra kosɔbɛ a ka koo la. Dɔw ko mɔgɔɲuman lo, nga dɔw ko jama kunnacɛnbaga lo.

¹³Nga mɔgɔ si tun te se k'a koo fɔ u kunfɛ ten, bari u tun be siran zuwifuw ɲa.

¹⁴K'u to ɲanagwɛ la a tile naaninan ɲɔgɔn, Yezu tagara Alabatosoba kɔnɔ k'a daminɛ ka mɔgɔw kalan.

¹⁵Zuwifuw kabakoyara kosɔbɛ, u tora k'a fɔ ko: «A kɛra cogo di ka kɛ lɔnnikɛla ye ten, a do ma kalan mɔgɔ si fɛ.»

¹⁶Yezu y'u jaabi ko: «Ne be mɔgɔw kalan koo minw na, u ma bɔ ne fɛ, u bɔra ne cibaga le fɛ.

¹⁷Mɔgɔ min b'a fɛ ka Ala sago kɛ, o tigi ben'a lɔn ko ne ka kalan be bɔ Ala fɛ, ko ne yɛrɛ ka kuma tɛ.

¹⁸Mɔgɔ min b'a yɛrɛ koo fɔ, o b'a yɛrɛ tanuyɔrɔ le ɲini. Nga min b'a cibaga koo fɔ, janko ka boɲa l'a kan, ale ye tiɲɛfɔla ye, dibidibi foyi t'o tigi ka kuma na.

¹⁹Musa le ma sariya di aw ma wa? K'a sɔrɔ aw si t'o sariya bato. Mun na aw b'a fɛ ka ne faga?»

²⁰Mɔgɔw y'a jaabi ko: «E ye jinatɔ le ye. Jɔn le b'a fɛ k'i faga?»

²¹Yezu y'u jaabi ko: «Ne ye koo kelen kɛ, o y'aw bɛɛ dabari ban.

²² Musa ye kɛnɛkɛnɛ sariya fɔ aw ye (k'a sɔrɔ a ma daminɛ ale ma, nga a bɔra an faaw le la). Ayiwa, aw be deenw kɛnɛkɛnɛ lafiɲɛlon na.

²³ Ka mɔgɔ kɛnɛkɛnɛ lafiɲɛlon na, n'o te Musa ka sariya cɛn, mun na aw be dimi ne kɔrɔ ko ne ye mɔgɔ kɛnɛya lafiɲɛlon na?

²⁴Aw kana koo yeta dama filɛ ka mɔgɔ jalaki. Nga, aw k'o kɛ ni tilenninya ye.»

²⁵Zeruzalɛmuka dɔw tun b'a fɔra ko: «U te cɛɛ nin le fagayɔrɔ ɲinina wa?

²⁶A ye n'a be kumana kɛnɛ kan u do te foyi fɔra a ye. Yala an ka siya ɲamɔgɔw y'a lɔn sisan ko ale lo ye Ala ka Mɔgɔ wolomanin nin ye wa?

²⁷Anw kɔni be nin bɔyɔrɔ lɔn. K'a sɔrɔ ni Ala ka Mɔgɔ wolomanin nin nana, mɔgɔ ten'a bɔyɔrɔ lɔn.»

²⁸O y'a sɔrɔ Yezu tun be mɔgɔw kalanna Alabatosoba kɔnɔ, a y'u jaabi ko: «Tiɲɛ na, aw be ne lɔn, aw be n bɔyɔrɔ fana lɔn! K'a sɔrɔ ne ma na n yɛrɛ ma. Ne cibaga ye tiɲɛtigi ye, aw te ale lɔn.

²⁹Nga ne be ale lɔn bari n bɔra ale lo fɛ, ale lo ye ne ci fana.»

³⁰O tuma na, u tun b'a fɛ k'a minɛ, nga mɔgɔ si ma se ka maga a la, bari a ka waati tun ma se fɔlɔ.

³¹O bɛɛ n'a ta, jama cɛma, caaman lar'a la, u tora k'a fɔ ko: «Ni Ala ka Mɔgɔ wolomanin nin nana tuma min na, yala a bena kabako dɔ wɛrɛw kɛ ka tɛmɛ cɛɛ nin ta kan wa?»

³²Mɔgɔw tun be Yezu ka koo ŋunuŋununa jama cɛma fɔɔ ka taga bila *Fariziɲɛw tulo la. Olu ni sarakalasebagaw kuntigiw ye Alabatosoba kɔlɔsibagaw ci k'u ka taga Yezu minɛ.

³³Yezu y'a fɔ jama ye ko: «Waati dɔɔni le tora ne bena min kɛ n'aw ye, o kɔ, ne be segi n cibaga fɛ.

³⁴Aw bena ne yɔrɔ ɲini ka dɛsɛ, aw tena ne ye. Bari ne bena to yɔrɔ min na, aw tena se ka na yen.»

³⁵Zuwifuw tora k'a fɔ u ni ɲɔgɔn cɛ ko: «Nin bena se ka taga yɔrɔ jumɛn n'anw ben'a yɔrɔ ɲini ka dɛsɛ? An ka siya minw jɛnsɛnnin be siya wɛrɛw cɛma, a bena taga olu le fɛ ka siya wɛrɛw kalan wa?

³⁶A y'a fɔ ko an bena ale yɔrɔ ɲini ka dɛsɛ, ko an tena ale ye. Ani ko ale bena to yɔrɔ min na, ko an tena se ka taga yen. O kɔrɔ ye mun ye?»

³⁷ Sumanladon ɲanagwɛ labanlon na, n'o y'a lonba ye, Yezu lɔra k'a fɔ jama ye ko: «Ni minnɔgɔ be mɔgɔ min na, o tigi ka na ne fɛ ka jii min.

³⁸ Ni mɔgɔ min lara ne la, o tigi bena kɛ jiɲuman buyiyɔrɔ ye i ko a fɔra Ala ka kuma na cogo min na.»

³⁹Mɔgɔ minw bena la a la, olu bena Nii Senuman min sɔrɔ, a tun be o le koo fɔra ten. Nii Senuman tun ma di fɔlɔ bari Yezu tun ma boɲa sɔrɔ fɔlɔ.

⁴⁰Dɔw ye Yezu ka kuma nunu mɛn minkɛ, u tora k'a fɔ jama cɛma ko: «Tiɲɛ na, nin le ye kiraba nin ye.»

⁴¹Dɔw ko: «Ala ka Mɔgɔ wolomanin lo.» Nga dɔw ko: «A ka kan ka bɔ Galile wa?

⁴² A ma fɔ Ala ka kuma na ko Ala ka Mɔgɔ wolomanin buruju bena bɔ masacɛ Dawuda la wa? N'o ka dugu ye Bɛtilehɛmu ye.»

⁴³Jama daa fɔnna ɲɔgɔn kɔ Yezu kosɔn.

⁴⁴U dɔw tun b'a fɛ k'a minɛ, nga o si ma se ka maga a la.

⁴⁵Alabatosoba kɔlɔsibaga nunu kɔsegira ka taga sarakalasebagaw kuntigiw ni *Fariziɲɛw fɛ. U y'u ɲininga ko: «Mun na aw ma na n'a ye?»

⁴⁶U y'u jaabi ko: «Ii! Mɔgɔ ka kuma te ɲa ka tɛmɛ nin ta kan!»

⁴⁷Fariziɲɛw y'u ɲininga ko: «Aw fana y'a to a sera aw kɔrɔ kɛ?

⁴⁸An ka siya ɲamɔgɔw, walima Fariziɲɛw cɛma, jɔn le lar'a la?

⁴⁹Ni jama nin tɛ, olu te Musa ka sariya lɔn do! U danganinw lo.»

⁵⁰ Nikodɛmu min tun tagara Yezu fɛ loon dɔ, n'ale ye Fariziɲɛ nunu dɔ ye, ale y'a fɔ ko:

⁵¹«Ka kɛɲɛ ni sariya ye, an be se ka mɔgɔ jalaki n'a tigi darakan ma mɛn wa? N'a ka kɛwali ma lɔn wa?»

⁵²U y'ale jaabi ko: «E fana ye Galileka ye wa? Ala ka kuma sɛgɛsɛgɛ kosɔbɛ, i ben'a ye ko kira si te bɔ Galile mara la.» [

⁵³Mɔgɔ nunu bɛɛ tɛmɛna k'u ka soo siraw ta.