Read dyu Zan ka kitabu 8 Bible Online

Zan ka kitabu 8 - dyu bible

Zan ka kitabu 8

²Sɔgɔmada joona dɔrɔn, a segira ka na Alabatosoba kɔnɔ. Jama tun be nan'a fɛ minkɛ, a sigira ka to k'u kalan.

³Sariya karamɔgɔw ni *Fariziɲɛw ye muso dɔ minɛ kakalaya kɛyɔrɔ la ka na n'a ye k'a lɔ jama cɛma

⁴ka Yezu ɲininga ko: «Karamɔgɔ, muso nin minɛna kakalaya la ni cɛɛ dɔ ye.

⁵ Sariya la, Musa y'a fɔ an ye ko an k'o muso sugu bon k'a faga ni kabakuruw ye. Ele do, e ko di?»

⁶U ye jaan la n'u ka kuma ye waasa ka se ka Yezu jalaki. Nga Yezu birila ka to ka sɛbɛnni kɛ duguma n'a bolokunnaden ye.

⁷U tora k'a ɲininga minkɛ, Yezu wilila k'a fɔ u ye ko: «Mɔgɔ min b'aw cɛma n'a ma hakɛ kɛ ka ye, o tigi ka kɔn ka muso nin bon.»

⁸A birila tugu ka to ka sɛbɛnni kɛ duguma.

⁹O fɔra u ye minkɛ, u bɛɛ bɔra kelen kelen, fɔɔ ka taga ban, k'a daminɛ u bɛɛ kɔrɔw ma, ka muso nin to a kelen ni Yezu ye.

¹⁰Yezu wilila, k'a fɔ a ye ko: «Muso, u be min do? Mɔgɔ si m'i jalaki kɛ?»

¹¹A y'a jaabi ko: «Mɔgɔ si, Matigi.» Yezu ko: «Ne fana tena i jalaki. Taga, nga i kana hakɛ kɛ tugu.»]

¹² Yezu kumana jama fɛ tugu ko: «Ne ye diɲɛ ka yeelen ye. Ni mɔgɔ min sɔnna ne ma, o tigi tena taama dibi la. A bena to yeelen na min be taga don sini hɛrɛ yɔrɔ la.»

¹³ O la, *Fariziɲɛw y'a fɔ a ye ko: «E b'i yɛrɛ koo fɔra sisan kɛ, tiɲɛ te i ka fɔta nin na.»

¹⁴Yezu y'u jaabi ko: «Ayiwa, ne be n yɛrɛ koo fɔ, ne be tiɲɛ le fɔra, bari ne be n bɔyɔrɔ lɔn ka n taayɔrɔ lɔn. K'a sɔrɔ aw te ne bɔyɔrɔ lɔn, aw te n taayɔrɔ lɔn fana.

¹⁵Aw kɔni be mɔgɔw jalaki ka kɛɲɛ ni adamadenya ye. Ne te mɔgɔ si jalaki.

¹⁶Nga ni ne be mɔgɔ jalaki, n b'a kɛ ni tilenninya ye. Bari ne kelen t'o kɛ. Ne ni n cibaga le b'o kɛ.

¹⁷A yɛrɛ fɔra aw ka sariya la ko ni mɔgɔ fila ka seereya bɛnna ɲɔgɔn ma, o ye tiɲɛ tigitigi ye.

¹⁸Ne be n yɛrɛ koo fɔ, ani Faa min ye ne ci, ale ye ne seere ye fana.»

¹⁹U y'a ɲininga ko: «E Faa nin be min?» Yezu y'u jaabi ko: «Aw te ne lɔn, aw te n Faa fana lɔn. N'aw tun be ne lɔn, aw tun bena n Faa fana lɔn.»

²⁰Alabatosoba yɔrɔ min be wele ko Nafolo marayɔrɔ, a ye kuma nunu fɔ o yɔrɔ le la, o y'a sɔrɔ a be mɔgɔw kalanna. Mɔgɔ si ma se ka maga a la, bari a ka waati tun ma se fɔlɔ.

²¹Yezu y'a fɔ jama ye tugu ko: «Ne be taga, aw bena ne yɔrɔ ɲini ka dɛsɛ, aw bena sa aw ka hakɛw la. Ne be tagara yɔrɔ min na, aw te se ka taga yen.»

²²O la, zuwifuw y'a fɔ ko: «N'a sɔrɔ a b'a fɛ k'a yɛrɛ faga le, bari a b'a fɔra ko ale bena taga yɔrɔ min na, ko an te se ka taga yen.»

²³Yezu y'u jaabi ko: «Aw ye dugukolo kan mɔgɔw ye, nga ne bɔra sankolo la. Aw ye diɲɛ nin mɔgɔw ye. Nga, ne te yan mɔgɔ ye.

²⁴O kama lo ne y'a fɔ aw ye ko aw bena sa aw ka hakɛw la. Ne ko ne ye min ye, n'aw ma la o la, aw bena sa aw ka hakɛw la sɔbɛ la.»

²⁵O la, u y'a ɲininga ko: «E ye jɔn ye?» Yezu y'u jaabi ko: «Kabini a daminɛ na, n m'o fɔli dabila.

²⁶Kuma caaman be n fɛ k'o fɔ aw ka koo la, k'aw jalaki. Ne cibaga ye tiɲɛtigi ye, ne ye min mɛn ale fɛ, ne b'o le fɔ mɔgɔw ye.»

²⁷U ma se k'a faamu ko a be Faa Ala le koo fɔra u ye.

²⁸O la, Yezu y'a fɔ u ye ko: «N'aw ye Mɔgɔ Dencɛ kɔrɔta sanfɛ ka ban tuma min na, ne ye min ye, aw bena o lɔn, ko ne te foyi kɛ n yɛrɛ ma. N Faa ye min fɔ n ye, ne b'o le fɔ.

²⁹Ne cibaga be ni ne ye. A ma ne to n kelen, bari min ka d'a ye, ne be o le kɛ tuma bɛɛ.»

³⁰A tun be kumana ten minkɛ, mɔgɔ caaman lara a la.

³¹Zuwifuw ɲamɔgɔ minw lara Yezu la, a y'a fɔ olu ye ko: «N'aw ye ne ka kuma bato, aw be kɛ n ka kalandenw ye tiɲɛ na.

³²O la, aw bena tiɲɛ lɔn, o tiɲɛ le bena aw kɛ hɔrɔnw ye.»

³³ U y'a jaabi ko: «Anw ye Ibrayima deenw ye. An ma deli ka kɛ mɔgɔ si ka jɔɔn ye. I be se k'a fɔ cogo di ko an bena kɛ hɔrɔnw ye?»

³⁴Yezu y'u jaabi ko: «Tiɲɛ tiɲɛ na, mɔgɔ o mɔgɔ be hakɛ kɛ, o tigi ye hakɛ ka jɔɔn le ye.

³⁵Jɔɔn te jati a kuntigi ka somɔgɔw dɔ ye, nga a kuntigi deen jatinin lo tuma bɛɛ.

³⁶Ayiwa, n'o Deen nin y'aw hɔrɔnya, a be kɛ hɔrɔnya dafanin ye.

³⁷Ne y'a lɔn ko aw ye Ibrayima deenw ye. Nga ne ka kuma te donna aw dusu la, o kama aw be ne fagayɔrɔ ɲinina.

³⁸Ne ye min ye n Faa Ala fɛ, ne b'o le fɔ. K'a sɔrɔ aw ye min mɛn aw faa fɛ, aw b'o le kɛ.»

³⁹U y'a jaabi ko: «Anw faa ye Ibrayima le ye.» Yezu y'a fɔ u ye ko: «N'aw faa ye Ibrayima ye, aw k'a ka kɛwaliw ɲɔgɔn kɛ. [1]

⁴⁰Aw t'o kɛ. Ne ye tiɲɛkuma min mɛn Ala fɛ, ne y'o bɛɛ fɔ aw ye. Nga aw be ne fagayɔrɔ le ɲini, k'a sɔrɔ Ibrayima m'o ɲɔgɔn kɛ.

⁴¹Aw b'aw faa ka kɛwaliw le kɛ.» U y'a jaabi ko: «A ma kɛ i n'a fɔ ko anw ye ɲamɔgɔdenw ye dɛ! Faa kelen le be an fɛ: o ye Ala ye.»

⁴²Yezu y'a fɔ u ye ko: «Ni Ala tun ye aw Faa ye, ne koo tun bena diya aw ye, bari ne bɔra Ala le fɛ ka na. Ne ma na n yɛrɛ ma. Ale lo ye ne ci.

⁴³Ne be minw fɔ aw ye, mun na aw t'o faamu? Bari aw ma sɔn ka mɛnni kɛ.

⁴⁴Aw faa ye Sutana le ye. Aw do b'a fɛ k'ale sago le kɛ. Kabini diɲɛ daminɛtuma na, ka mɔgɔ nii bɔ, o le kɛra a sago ye. A ma sɔn ka tiɲɛ fɔ ka ye, bari tiɲɛtigi tɛ. N'a be kuma o kuma fɔ, o bɛɛ be kɛ galon ye, bari, ale yɛrɛ le ye galon faa ye.

⁴⁵Ne kɔni, ne be tiɲɛ fɔra minkɛ, o kama lo aw te lara ne la.

⁴⁶Aw la jɔn be se k'a disi gosi ko ne ye hakɛ kɛ? Ne be tiɲɛ fɔ aw ye, mun na aw te la ne la?

⁴⁷Mɔgɔ min ye Ala ka mɔgɔ ye, o tigi be mɛnni kɛ Ala fɛ. Aw te Ala ka mɔgɔw ye minkɛ, o kama aw te sɔn ka mɛnni kɛ ne fɛ.»

⁴⁸Zuwifu nunu y'a jaabi ko: «An ye min fɔ, tiɲɛ yɛrɛ lo. I ye Samarika ye, i ye jinatɔ ye.»

⁴⁹Yezu y'u jaabi ko: «Ne te jinatɔ ye dɛ, ne be kunkɔrɔta di n Faa le ma, k'a sɔrɔ aw b'a la ka ne dɔgɔya.

⁵⁰O n'a ta bɛɛ, ne te n yɛrɛ ka boɲa ɲinina. Ne boɲabaga be yen, min be boɲa la ne kan, a be kiti tigɛ fana.

⁵¹Tiɲɛ tiɲɛ na, ne b'a fɔ aw ye ko ni mɔgɔ min ye ne ka kuma bato, o tigi te sa abada!»

⁵²O la, zuwifuw nunu y'a fɔ a ye ko: «Sisan kɔni, an y'a lɔn ko i ye jinatɔ ye tiɲɛ na! Ibrayima sara, kiraw fana sara. E ko ni mɔgɔ min ye ele ka kuma bato, k'o tigi tena sa abada!

⁵³An faa Ibrayima min sara, e ka fisa n'o ye wa? Kiraw fana sara. E b'i yɛrɛ jati mun le ye?»

⁵⁴Yezu y'u jaabi ko: «Ni ne be n yɛrɛ tanu, o tanuli nin te foyi ɲa. Ne Faa le be n tanu. Aw k'o min y'aw ka Ala ye.

⁵⁵K'a sɔrɔ aw do t'a lɔn. Ne kɔni b'a lɔn. Ni ne y'a fɔ ko n t'a lɔn, an bɛɛ be kɛ kelen ye, ne fana be kɛ galontigɛla ye. Nga, ne b'a lɔn, n b'a ka kuma bato fana.

⁵⁶Aw faa Ibrayima nisɔn tun diyara, bari a miirila ko a bena ne ka tile ye. A do y'a ye, o nisɔndiya nin y'a wasa.»

⁵⁷Zuwifu nunu ko: «E yɛrɛ sii ma saan bi duuru bɔ fɔlɔ, e ko i ye Ibrayima ye!»

⁵⁸Yezu y'a fɔ u ye ko: «Tiɲɛ tiɲɛ na, ne b'a fɔ aw ye ko sanni Ibrayima ka wolo, ne tun be yen.»

⁵⁹O la, u ye kabakuruw cɛ k'u be Yezu bon, nga a dogora ka bɔ Alabatosoba kɔnɔ.