Read dyu Cidenw ka kɛwaliw kitabu 11 Bible Online

Cidenw ka kɛwaliw kitabu 11 - dyu bible

Cidenw ka kɛwaliw kitabu 11

¹Cidenw, ni balima minw tun be Zeruzalɛmu, olu y'a mɛn ko siya wɛrɛw fana sɔnna Ala ka kuma ma.

²Piyɛri kɔsegira Zeruzalɛmu tuma min na, zuwifu minw tun lara Yezu la, olu ye Piyɛri jalaki

³ko: «I tagara don kɛnɛkɛnɛbaliw ka soo, fɔɔ ka dumuni kɛ n'u ye.»

⁴O la, koo nin kɛra cogo min na, Piyɛri y'a daminɛ k'a bɛɛ ɲafɔ u ye kelen kelen,

⁵ko: «N tun be Ala daalila Zope dugu kɔnɔ, a ye fɛɛn dɔ yira n na. O fɛɛn nin tun bɔnin be fanibelebeleba dɔ ma n'a be jigira ka bɔ sankolo la fɔɔ ka na se ne kɔrɔ. Juru sirinin tun b'a dakun naani nunu na.

⁶N y'a filɛ furutututu, n ma sɔn ka n ɲaa bɔ a kan. N ye sogow ye a kɔnɔ: sennaanifɛnw, ni kongosogow, ni minw be fofo, ani kɔnɔw.

⁷O tuma na, n ye kumakan dɔ mɛn ka bɔ sankolo la ko: ‹Piyɛri, wili ka nunu dɔ faga k'a ɲimi.›

⁸Ne y'a jaabi ko: ‹Abada, Matigi, fɛɛn min man kan ka dumu, fɛnnɔgɔnin, ne ma deli k'o don n daa la ka ye.›

⁹A y'a fɔ tugu ko Ala ye fɛɛn min saniya, ko n kan'a fɔ k'o ma kan ka dumu.

¹⁰A y'o fɔ fɔɔ siɲɛ saba. O kɔ, fɛnbelebeleba nin fosira ka yɛlɛ sankolo la.

¹¹O waati yɛrɛ la, an tun be luu min kɔnɔ, ciden mɔgɔ saba nana lɔ o daa la. Mɔgɔ dɔ le tun y'u ci ne fɛ ka bɔ Sezare.

¹²Nii Senuman y'a fɔ n ye ko ne kana sigasiga ka taga n'u ye. Mɔgɔ wɔɔrɔ nunu fana ye n bila sira Sezare. An sera ka don cɛɛ ka soo.

¹³A y'a fɔ an ye ko mɛlɛkɛ dɔ y'a yɛrɛ yira ale la a ka soo k'a fɔ ale ye ko a ka mɔgɔ ci Zope, ka taga cɛɛ dɔ wele min tɔgɔ ko Simɔn, k'u b'a wele ko Piyɛri fana.

¹⁴Ko a bena kuma dɔw fɔ a ye min bena kɛ sababu ye, a n'a ka somɔgɔw bɛɛ ka kisi.

¹⁵Ne y'a daminɛ ka kuma n'u ye dɔrɔn, Nii Senuman jigira u kan i n'a fɔ a tun jigira anw kan koow daminɛtuma na cogo min na.

¹⁶ O tuma na, ne hakili jigira Matigi ka kuma nin na ko: ‹Zan ye aw batize ni jii ye, nga aw bena batize ni Nii Senuman ye.›

¹⁷Ni Ala yɛrɛ ye Nii Senuman d'u ma i n'a fɔ anw, bari an lara Matigi Yezu Krista la, ne ye jɔn ye, ni ne bena Ala sɔsɔ o la?»

¹⁸Kuma nunu y'u dusu suma. U y'a daminɛ ka Ala tanu ka to k'a fɔ ko: «Tiɲɛ na, Ala ye sira di siya wɛrɛw fana ma u ka nimisa ka faran u ka kojuguw la ka kisi.»

¹⁹ Tɔɔrɔ min tun daminɛna Etiyɛni fagalɔn na, o tun kɛra sababu ye kalanden dɔw tagara Fenisi ni Sipɔrɔ jamana na, ani Antiyɔsi dugu kɔnɔ. Nga u tun te Yezu ka kibaru diman fɔ siya wɛrɛw ye fɔɔ zuwifuw dɔrɔn.

²⁰O bɛɛ n'a ta, kalandenw dɔw bɔra Sipɔrɔ, ni Sirɛni ka taga Matigi Yezu ka kibaru diman fɔ siya wɛrɛw ye.

²¹Ala y'a ka sebagaya d'u ma fɔɔ mɔgɔ caaman lara Matigi la ka sɔn a ma.

²²Krista ka jama min tun be Zeruzalɛmu, olu y'o kibaru mɛn, u ye Barinabasi ci u fɛ Antiyɔsi.

²³Ala y'a ka ɲumanya yira mɔgɔ nunu la cogo min na, Barinabasi sera yen k'o ye, a nisɔn diyara. A y'u jaa gwɛlɛya k'u ka banba ka nɔrɔ Matigi kelen na.

²⁴Barinabasi tun ye mɔgɔɲuman ye, a tun fanin be Nii Senuman na, a lanin tun be Yezu la kosɔbɛ. Mɔgɔ caaman lara Matigi la o la.

²⁵O tuma na, Barinabasi tagara Sɔli yɔrɔ ɲini Tarasi.

²⁶A y'a ye, u nana ɲɔgɔn fɛ Antiyɔsi. U ye saan kelen kɛ ɲɔgɔn fɛ o yɔrɔ la ni Krista ka jama ye. U ye mɔgɔ caaman kalan ni Ala ka kuma ye. Ka Yezu ka kalandenw wele kretinyɛw, o daminɛna Antiyɔsi le.

²⁷O waati la, kira dɔw bɔra Zeruzalɛmu ka taga Antiyɔsi.

²⁸ U dɔ tɔgɔ tun ko Agabusi, o wilila k'a fɔ Nii Senuman barika la ko kɔngɔ bena don diɲɛ yɔrɔ bɛɛ. Tiɲɛ na, o kɔngɔ nin donna masacɛba Kulodi ka tile la.

²⁹Antiyɔsi kalandenw ye ŋaniya ta k'u bolo farafara ɲɔgɔn kan ka kɛɲɛ n'u bɛɛ seko ye, k'u b'o ci u balima Zudekaw ma.

³⁰U y'a kɛ ten. U y'o bolomafara nunu don Barinabasi ni Sɔli bolo k'u ka taga u di Krista ka jama ɲamɔgɔw ma Zude mara la.